Éxodo 37
37
Yovetsicaquero Cajón onanteari Icantacantiri Tasorentsi
(Éxo. 25.10-22)
1Ari yovetsicaquero aisati Besalel Cajón, yaaque inchato acacia, ocarataque aparoni metro avishimaataque 10 centímetro otsantsataque. Iro 65 centímetro oquimotaroquitaque aisati 65 centímetro ojenoquitaque. 2Ipatacacotaquero oro ioshitaca maaroni tsompoinaqui jero acaquerocapeequi. Irisati ishoncaqueri yoashinampitantacarori onampinapeequi. 3Yovetsicaque aisati 4 oyempita oro iroayeteri oitipeequi. 4-5Impoiji yovetsicashitaquero inchato acacia yoameetsaquiitaquero yapinaicantacaro oro, yoiminqueaquero oyempitapeequi inquijacotantearori.
6Aisati yovetsicaque otatacoro ioshitaca oro, ocarataque aparoni metro avishimaataque 10 centímetro otsantsataque. Iro 65 centímetro oquimotaroquitaque. 7Aisati yovetsicaque oro apite ishiacantaquero inampire Tasorentsi yoameetsatantacari martiyo, irisati vichaacotanaincha otataroqui. 8Itimaque aparoni otsapiqui aisati pashini otsapiqui. 9Cameetsa imontetavacaaca aisati ishivanquitavacaaca, yamenaquero otataro Cajón yojocaaquero.
Yovetsicaquero meesa oantapinitanteari tanta
(Éxo. 25.23-30)
10Ari yovetsicaquero aisati meesa, yaaque inchato acacia, ocarataque 90 centímetro otsantsataque. Iro 45 centímetro oquimotaroquitaque aisati 65 centímetro ojenoquitaque. 11Impoiji ipatacacotaquero oro ioshitaca maaroni, irisati ishoncaqueri yoashinampitantacarori onampinapeequi. 12Aisati yovetsicaque iticaacotaquerori onampinapeequi ocarataroquitaque 7 centímetro, yoashinampitaquero oro ishoncaquero. 13-14Yovetsicaque aisati 4 oyempita oro yoayetaquero osorinapeequi oitipeequiniri, otsipatacaro iticaaquerori. Irotaque isaquiintantacarori inchaquii inquijacotantearori.
15Iro inchato acacia yovetsicaqueri yapinaicantacaro oro. 16Aisati yovetsicayetaque timayetatsineri meesaqui; peraatopee, cocharonepee, jaarapee jero iramentopee ioshitaca maaroni oro.
Yovetsicaquero oro tsiorontsinaqui
(Éxo. 25.31-40)
17Aisati yovetsicaque Besalel tsiorontsinaqui ioshitaca oro yoameetsatantacari martiyo: incatianteari, itincamiro, ishenoquipee, ishintaquipee jero itsotaneyetaqueri apanaquiro inanaque. 18Otimayetaque ijempequipee acaquerocapeequi ocarataque 6, otimaque 3 acaqueroca aisati 3 araquerora. 19Ora ijempequipee caratatsiri 6 otimayetaque 3 ishenoquipee jero ishintaquipee quempetarori oteaqui almendro aisati itsotaneyetaqueri. 20Aisati itincamiro otimaque 4 oshenoquipee jero ishintaquipee quempetarori oteaqui almendro aisati itsotaneyetaqueri. 21Aparopeeni ijempequipee carayetatsiri 3 otimayetaque aparopeeni itsotaneyetaqueri oshaaviji. 22Ora itsotaneyetaqueri jero ijempequipee apanaquiro inanaque tsiorontsinaqui ioshitaca maaroni oro yoameetsatantacari martiyo. 23Aisati yovetsicaque 7 tsiomentotsipee, tenasapee jero platiyopee ioshitaca oro. 24Yovetsicantacariri maaroni tsiorontsi icarataque 33 kilo ioshitaca oro.
Yovetsicaquero altar intaantearori casancajencatatsiri
(Éxo. 30.1-5)
25Aisati yovetsicaque altar intaantearori casancajencatatsiri. Irosati yaaque inchato acacia ocarataque 45 centímetro otsantsataque aisati 45 centímetro oquimotaroquitaque. Impoiji 90 centímetro ojenoquitaque. Ora oshevatapee otimayetaque osorinapeequi irosati otimantayetanaca. 26Impoiji ipatacacotaquero oro ioshitaca maaroni acaquerocapeequi, oshevatapeequi aisati yoashinampitantacaro onampinapeequi. 27Aisati yoayetaque oro iyempitayetaquerori ishaaviji yoashinampitaquerori, ocarati apite ashi acaqueroca osorinaqui aisati apite ashi araquerora, irisaquiintantearori inchaquii iranatacotantearori. 28Ora inchaquiire iranatacotantearori iro yovetsicaqueri inchato acacia yapinaicantacaro oro.
Yovetsicaqueri quejitsi inashitacaacari isainayeetari aisati intaapiniyeteri
(Éxo. 30.22-38)
29Aisati yovetsicaque Besalel quejitsi cameetsatasanotatsiri, inashitacaari isainayeetari aisati intaapiniteri casancajencatatsiri ioshitachari, iquempetacari vetsicayetiriri casancajayetatsiri.
Currently Selected:
Éxodo 37: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
