Nahúm 1
1
1Ana nere maye huetalec da lauanaqchec so Nahúm maye lma' ye Elcos. Qaq 'era da na'aqtac maye taỹa'a ye huaqta'a't nỹecpi ye Nínive.
2Ñim Nataxala' maye Lo'onatac 'Enauacna, Ñimaye ca'alaxanaxaic, qataq ishet da ipalaique lvi',
qataq ishet da ipalaique lvi' da dataỹa'aguet nam ipa'agueetacpi Ñimaye,
nache sa ỹala'ac da dalemataỹa na npa'aguenaxauapi.
3Ñim Nataxala', ỹataqta qaỹoqchiguinguit da lalemataic,
qalaxaye ỹataqta lta'araic da la'añaxac,
nache saishet da sa ỹauo'o ca nhuaxanaguec cam huo'o ca lasouaxashet,
Ñim Nataxala', Ñimaye quetaigui na la'at lta'araic,
qaq nam lo'oc na piguem qalaq namoxoỹaxatsheguem naua lapia'ate, 'eeta'am na namoxoỹaxa.
4Qaq da ỹarenapega aso auaxai nache asomaye deqaxaỹañi,
qataq deqaqa naqa'en 'enauac na talapi.
Qaq na no'onaxapi ye Basán qataq añi qasoxonaxa Carmelo qalaq deqaqa,
qataq deqaqa ana lauoxopi maye hualec na no'onaxapi ye Líbano.
5Nache Ñimaye da choche nlectelec ana qasoxonaxapi nache cholaxan,
qataq ana lcomaraxalatepi qalaq nlaguiñi.
Qaq ana 'alhua qalaq cholaxan qataq na netalecpi anamaye iviloxol da lcolanaxa.
6Qaq ¿negue'tom cam ishet da nachaateguet da layeloxo Ñimaye?
Qataq ¿negue'tom cam ishet da nalota'aguet da layeloxo?
Qaq de'era layeloxo Ñimaye 'eeta'am ca norec,
qataq da choche nlectelec aca coma' late'erai nache acamaye dolagui.
7Ñim Nataxala' soxoraic, Ñimaye ñe'eguenaxala' da qaivireguet ca nhuogoxo,
qataq npaxaalec nam pe'etecot Ñimaye,
8qalaxaye nmichiguiñi naqa'en qome na npa'aguenaxauapi,
'eeta'am ca qapa'atteguet ndep da ỹache 'enauac na huetangui na llec,
qataq Ñimaye 'eeta'am ca napalaxa da iviralec na npa'aguenaxauapi.
9Qaq ¿negue't cam qalapaqaiteguiñi da qauo'ochec Ñim Nataxala'?
Ye Ñimaye qami' ilaxachiguilo qome.
Cha'aye Ñimaye saishet da dos da ỹe'eguelaxalec da dataỹa'aguet na npa'aguenaxauapi.
10Qaq ỹoqo'oye qoñiita'am qome aca ipogotta't qo'oipaq lepi,
qataq ca 'auaqpi deqaqta da nmichiguiñi qome da ỹavic.
11Qaq 'am Nínive, nache 'am chegaqaigui som ỹo'ottac na qauem maye dataỹa'aguet Ñim Nataxala',
som chegoqtecot naua qauema nqataxaco.
12Qaq ỹoqo'oye Ñim Nataxala' 'eeta':
«Na'aictaxa da 'añaxaicpi qataq da qalota na asiiriopi,
qalaxaye namayepi nlachiguiñi ñaqa'en nache totegue qome.
Qaq 'am Judá, na'aictaxa da sauo'o co'ollaxa da 'anque'eenaxac,
qalaxaye saishet qome da nache shecto'ot da so'ottac da 'anque'eenaxac.
13Nache 'am ñeqateeguesop dam qapa'atta 'anque'eenaxac maye 'am huetalec,
qataq sechiigui nam 'ancoñetaxat lcatpi».
14Qalaxaye 'am nta'a na Nínive, Ñim Nataxala' 'am talec naqa'en de'era 'eeta':
«Qaica qome ca 'aỹa'alaqpi da yaqto' nache queta da 'are'enaxat,
qataq añi atamnaxaqui maye lalamaqte nam 'anatamnaxala'pi
qalaq ñelaxaañi qome nam ne'enaqtacpi atamnaxala'pi maye chegaqaigui na nqachilliguishec lcat,
qataq nache naña ñaqa'en qome aca 'anhuachiqui, cha'aye ỹataqta 'am nqaigaxat».
Qaỹa'axata'a da qailaxachigui ye Nínive
15¡Ña qanloisheguem! ¡Mashe anactalec ana qasoxonaxapi,
nam namaxashec maye ndoi' cam no'on na'axaỹaxac,
nam ỹa'axata'aguet cam nlagaxayec!
Qaq ỹoqo'oye 'am Judá, 'auo'ot qome cam 'arquia'axac,
qataq 'aupacchigui qome cam 'aỹa'an 'ara'aqtac.
Cha'aye nache saishet qome da qaltaq 'am nnoxotaua'a nam qauemaicpi,
cha'aye mashe imauec da nlachiguiñi.
Currently Selected:
Nahúm 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.