Oseas 1
1
1Qaq 'era da la'aqtac Ñim Nataxala' co'ollaq 'enapega so Oseas, som llalec so Beerí, maye huetoigui co'ollaxa da lo'onataxanaxac so Uzías, Yotán, Ajaz qataq so Ezequías, maye nta'al ye Judá, qataq so Jeroboán, maye llalec so Joás, som nta'a ye Israel.
Aso lhua qataq soua llalqa so Oseas
2Qaq 'ena na chegoqchiguiña da la'aqtac Ñim Nataxala' maye chegoqchigui naqa'en so Oseas, 'eeta':
«'Aue qojec, nache 'auaroneguet qome aca 'alo quisheguetaxai,
nache huo'oi qome caua 'aỹa'alqa,
qaq caamaye nache chegaqaiguilo
qome da quisheguetaxac,
cha'aye nam netalecpi ne'ena 'alhua Israel
ỹataqta nquisheshigui da la'amqaanataxanaxac,
nache namayepi ỹataqta ca'ai Ñim Nataxala'.»
3Huaña co'ollaxa nache so Oseas jec, nache huaroneguet aso Gomer, asom llale so Diblayin, huaña nache asomaye hualaxai, nache co'ollaq deco'o, nache ỹale so llalec. 4Nache Ñim Nataxala' 'enapega so Oseas, 'eeta':
«Yi'iye nogotolec, 'aỹa'anagui
qome da le'enaxat Jezreel,
cha'aye sa ñaỹaloxon da sauo'o ca
nhuaxanaguec na chegoxoguetpi so nta'a Jehú,
souaxat da ỹataqta qalota so
lalaatacpi co'ollaq huaña ye Jezreel,
yaqto' nache loga't ñaqa'en da
lo'onataxanaxac da nta'a na Israel.
5Qaq que'eca na'a'q, nache huaña
ñaqa'en ye ca'amapega't ye Jezreel,
da huacaigui ñaqa'en ca lchecnec ye Israel.»
6Qaq aso Gomer, qaltaq hualaxai co'ollaxa, nache co'ollaq deco'o, nache 'alo aso llale. Nache Ñim Nataxala', 'enapega so Oseas, 'eeta':
«Aya'aye nogotole, 'aỹa'anagui
da le'enaxat Lorrujama,
cha'aye aỹem saishet da qaltaq
sechoxoreetac da lo'onataxanaxac na Israel le'ecpi,
qataq nache saishet da sapalaxat na lasouaxashetpi.
7Qalaxaye nachaqnata qome na maiche nalamaxat nhuo' Judá le'ecpi da sechoxoren, nache ñeca'alaxatec, Aỹem Nataxala' maye Natamnaxala' namayepi. Qalaxaye saishet da sachegoxotchigui ca nchecnec, ỹeelonec, alaataxac, caipi huo'otaq ca alleppi maye netalec na caaỹo, da ñeca'alaxatec namayepi.» 8Qaq aso Gomer, co'ollaq ỹaxaañi naqa'en da l-llepaxac aso Lorrujama, nache asomaye qaltaq hualaxai, nache co'ollaq deco'o, nache ỹale so llalec. 9Nache Ñim Nataxala', 'enapega so Oseas, 'eeta':
«Yi'iye nogotolec, 'aỹa'anagui
qome da le'enaxat Loamí,
cha'aye qami' nhuo' le'ecpi,
mashe saishet da qami' ỹalamaxatpi,
qataq mashe saishet da aỹem Qanatamnaxala'ai.»
10Qalaxaye ñaqaiyeta ne'ena Israel
le'ecpi ỹataqta qalota qome,
nache 'eeta'am na coma' lsoche maye auaxai le'ec,
nache qaica ca ishet da naloqten ca
tachiguiña qataq ye lcata namayepi.
Qaq qom qoỹeeta':
«Qami' saishet da qami' ỹalamaxatpi»,
qalaxaye Ñim Lo'onatac 'Enauacna qami'
'enapegalo, 'eeta':
«Qami', nache qami' llalaqpi Ñim
Lo'onatac 'Enauacna maye nca'altauec.»
11Huaña qome nache lapona't na Judá, qataq na Israel le'ecpi, nache namayepi 'oonolec naqa'en ca lataxala', nache 'enauac na shiỹaxauapi ñe'eguelaxa qome ye Jerusalén. Nache ỹataqta lta'araic qome da la'amaqchec ye Jezreel que'eca na'a'q.
Currently Selected:
Oseas 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.