Eclesiastés 1
1
'Enauac nam huo'o qaica ca naigui
1'Enaua naua la'aqtaqa so
'aqtaxanaxaic, maye llalec so David,
maye nta'a co'ollaxa ye Jerusalén.
2¡Qaica ca naigui, qaica ca naigui
'enapec som 'aqtaxanaxaic!
¡'Enauac nam huo'o qaica ca naigui!
3¿Negue't ca laueguec ca ỹale
da ỹaguec da lo'onataxanaxac
da netalec ana 'alhua?
4Huo'o na ñiguiñi, qataq huo'o na ileu,
qalaxaye ana 'alhua saishet da nquic da lataxac.
5Nnoxoosheguem añi nala', qataq inoxooñi añi nala',
ime, nache sa naỹaloxon
da ỹe'eguelaxa yem chegoqchiguiña,
da yaqto' qaltaq nnoxoosheguem.
6Na la'at nashiiyesheguem, taigue da taguiñi,
ime qaltaq ncolliiñi,
nache ỹe'eguelaxague da sheu'.
¡Qaq nache queta,
saishet da vi'iiguet!
¡Jec, ime qaltaq ñe'eguelaq!
7Na talapi 'enauac da taỹauga aso auaxai,
qalaxaye aso auaxai saishet da nlaxagui,
na 'etaxat ỹe'eguelaq taỹa ye chegoqchiguiña,
nache ỹe'eguelaqtegue so maiche llec.
8Qaica ca nalaua'a da ishet da ỹa'axategue,
nam chochaqna maye ishet da qanasamiisop.
Qaica ca ilota'a huo'otaq da hua'aqtega
nache ishet da machiguiñi.
9Nam huo'o co'ollaxa
namayepi ỹe'eguelaxalec da yo'oq,
qataq 'enauac nam qaỹo'otpi co'ollaxa
qaltaq qaỹe'eguelaxalec da qaỹo'ot.
¡Nache qaica cam dalaxaic ana'ana 'alhua!
10Qaq saqoue da huo'o ca 'eeta':
«¡Aja', de'era nachera dam ỹoqta dalaxaic!»
Qalaxaye damaye nache 'eetai' da huo'o
co'ollaq saxanaqcaua qomi'.
11Som hua'auñipi somayepi mashe qaicoua'ai,
qaq nataqa'en qaicoua'ai qome nam dalaxaicpi
qataq cam ñaq taỹa'a da yo'oq.
Nam nauane'pi co'ollaxa so 'aqtaxanaxaic
12Aỹem 'aqtaxanaxaic, aỹem lta'a co'ollaxa na Israel le'ecpi yem Jerusalén, 13nache aỹem ỹataqta ñañaneguet co'ollaxa da ñimittac qataq ñaỹaanaxanaqchen da ñapaxagueetega 'enauac nam qaỹo'ottacpi ana'ana 'alhua. ¡Qaq sela'a da ỹataqta qapa'atta nam no'onatacpi maye Ñim Lo'onatac 'Enauacna ỹasaxalec nam shiỹaxauapi, da yaqto' nachena nam huetague' da ỹo'ottac! 14Qaq aỹem ishet da saỹaten da 'enauac nam qaỹo'ottacpi ana'ana 'alhua ỹataqta qaica ca naigui, 'eeta'am da 'eetec da huotaique da qanllañi na la'at.
15¡Cam namaxagui saishet da qanlaxanec, qataq saishet da qanaloqteneuo cam qaica!
16Huaña nache seuennataxaatac nache, sheeta': «Nagui aỹem huo'o da ỹa'amaqchec, qataq nquictasheguem da ỹaỹaanec, ñapacalec 'enauac som hua'au nta'alpi co'ollaxa na Jerusalén, añi iquiyaqte ỹaconeguet da lta'araic naỹaanec qataq da nauattonaxanaxac.» 17Qaq aỹem ỹataqta iuennataxac da ñimitaique da yaqto' saỹaten da naỹaanec, qataq da saỹateeta nataqa'en dam 'oopashec, qataq da 'eetec da qaica ca naỹaanataxanaxac. Qaq nataqa'en saỹaten damaye da 'eeta'am da huotaique da qanllañi na la'at, 18cha'aye da ỹaguec da naỹaanec, nache ỹaguec da que'eenaxac, qaq ca nquictauec da laỹaanec qalaq nquictauec da nqui'ic.
Currently Selected:
Eclesiastés 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.