Mateo 1
1
So chegoxoguetpi So Jesús
(Lucas 3.23-38)
1So Jesús chegoxoguet so David qataq so Abraham.
Qaq 'ana ana lmalate 'enauac som lauo' le'ecpi maye hua'auñipi, co'ollaq saxanaxa da nvi' Somaye:
2Chegoqchiguiña so Abraham, nache ivitta'a so David, qaq 'ena namayepi:
Abraham, Isaac, Jacob, Judá qataq soua lqaỹa't, 3Fares qataq so Zeraj (qaq aso late'e' soomaye le'enaxat Tamar) Hesrón, Aram, 4Aminadab, Nasón, Salmón. 5Booz (aso late'e somaye le'enaxat Rahab), Obed (aso late'e somaye le'enaxat Rut), Isaí, 6qataq so nta'a David.
Qaq chegoqchiguiña so David, choche ivitta'a co'ollaq so judiopi da qaicoñe' qaỹaueegue da Babilonia, qaq 'ena nam le'enaxat som chegoxoguet Somaye: David, Salomón (aso late'e somaye nachaso aso lhua co'ollaxa so Urías), 7Roboán, Abías, Asá, 8Josafat, Jorán, Ozías, 9Yotán, Acaz, Ezequías, 10Manasés, Amón, Josías, 11Joaquín qataq soua lqaỹa't.
12Qaq chegoqchiguiña co'ollaq so judiopi da qaỹaueegue da Babilonia, choche ivitta'a co'ollaq ñiguiñi So Jesús, qaq 'ena nam le'enaxatpi so chegoxoguet Somaye: Joaquín, Salatiel, Zorobabel, 13Abiud, Eliaquín, Azor, 14Sadoc, Aquín, Eliud, 15Eleazar, Matán, Jacob, 16José som lhua aso María maye late'e So Jesús Som Lca'aguishec Ñim Lo'onatac 'Enauacna.
17Qaq da ima'a't se'eso nta'alpi, qaq ivi' catorce chegoqchiguiña so Abraham, choche ivitta'a so David. Qataq ivi' catorce so laỹepi nta'alpi chegoqchiguiña so David, choche ivitta'a so na'a'q co'ollaq qaỹauega ye Babilonia so Israel le'ecpi. Qataq ivi' catorce so laỹepi nta'alpi, choche ivitta'a so na'a'q co'ollaq ñiguiñi Som Lca'aguishec Ñim Lo'onatac 'Enauacna.
Da lañoxoc So Jesús
(Lucas 2.1-7)
18Da lañoxoc So Jesús 'eeta': Aso late'e María co'ollaq mashe detaxaỹapegue' so José da huotaique da lhua. Qaq co'ollaq saxanaxa da huarona't, nache asomaye mashe hualaxai, chegoqchigui da la'añaxac So Saqcha'a Na'añaxac Qui'itta. 19Qaq so José maye huotaique da lhua asomaye, somaye ỹataqta no'on da lataxac, nache saishet da ỹa'axatec da huaigui aso María. Nachaqrata da huotaique da saishet da ỹaỹaana'a't naqa'en na shiỹaxauapi da ỹalat asomaye. 20Qaq co'ollaq ñaq tatapigui lauel de'era so José, nache anac so lamaxashec Ñim Lo'onatac 'Enauacna, huaigui naqa'en so lo'ochaxa da nachaxana somaye. Nache 'enapega, 'eeta':
–José, 'am maye 'auachegoxoguet so nta'a David, saishet qome da 'añi'i da 'apaca'aguet añi María da 'arhua. Cha'aye dam llalec maye huetaigui añimaye, chegoqchigui da la'añaxac So Saqcha'a Na'añaxac Qui'itta. 21Qaq añimaye qom ñiguiñi ca llalec. Qaq 'am nache 'aỹa'anagui da le'enaxat Jesús. Cha'aye nca'alaxateeguesop qome da nhuaxanaguec na lalamaxatpi souaxat na lasouaxashetpi.
22-25Qaq so José co'ollaq nlouec, nache ỹalaxaguet so lamaxashec Ñim Lo'onatac 'Enauacna, nache lhua aso María. Qalaxaye saishet da nauaña't co'ollaq saxanaxa da ñiguiñi so nogotolec. Qaq co'ollaq mashe ñiguiñi, nache so José ỹanagui da le'enaxat Jesús.
Qaq 'enauac dam huaigui asomaye yo'oq, cha'aye yaqto' ipacchigui dam 'enapec co'ollaxa Ñim Nataxala' maye ỹa'axat so la'aqtaxanaxanec Isaías 'eeta':
«¡Ỹataqta qana'axaỹaxañiichiguiñi!
Aca 'alo saxanaxa da huaron,
acamaye hualaxai qome,
nache huo'o ca llalec.
Qaq camaye
le'enaxat qome da Emanuel.»
De'era ne'enaxat naigui da 'eeta': «Ñim Lo'onatac 'Enauacna qomi' hueta'agueta.»
Currently Selected:
Mateo 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.