Sacharja 1
1
Äwaschreft un Woarnunk
1En de 8. Moonat von daut 2. Joa daut Darius Kjennich wia, jeef de Har däm Profeet Sacharja dise Norecht. Sacharja wia Berechja sien Sän, un Ido däm Profeet sienen Grootsän. #Esra 5,1
2En de Norecht säd de Har to däm Profeet: De Har es sea oajalich jewast äwa june Elren. 3Un nu sajcht de Har, dee aules rejieet: Komt trigj no mie, un dan woa ekj trigj no junt komen. Dit sajcht de Har, dee aules rejieet. #Mal 3,7; Jak 4,8 4Siet nich soo aus june Elren. To dee säden de Profeeten: “De Har, dee aules rejieet, sajcht: Komt trigj von june schlajchte Wäaj, un von jun beeset Väahaben.” Oba see horchten doa nich no, sajcht de Har, dee aules rejieet. #Jer 3,12; Hes 33,11 5Un waut es met june Elren jeworden? Ooda waut es met de Profeeten passieet? Läwen dee noch? 6Oba sent miene Woarnungen, un daut waut ekj derch miene Profeeten säd, nich aula soo romjekomen? Un onse Vodasch besonnen sikj doaräwa un säden: “De Har, dee aules rejieet, haft krakjt soo met ons jedonen, aus hee säd daut hee wudd, wan wie opp onse ieejne Wäaj gonen wudden, un bie ons ieejnet Väahaben bliewen wudden.”
1 De Pieed
7Dan en däm Kjennich Darius sien 2. Joa en de 11. Moonat, de Moonat Schebat aum 24. Dach, jeef de Har däm Profeet Sacharja eene Norecht. Un Sacharja säd: 8Horcht emol, ekj sach en de Nacht een roodet Pieet met eenen Ritta bie de Mirtenbeem em Tol stonen. Un hinja am wieren mea roode, brune, un witte Pieed. #Sach 6,1-8 9Un ekj säd: Waut bedieden dise Pieed, mien Har. Un de Enjel, dee to mie räd, säd: Ekj woa die wiesen, waut dit bediet. 10Dan säd de Maun bie de Mirtenbeem: Dit sent dee, dee de Har schekjt, daut see oppe Ieed noseenen sellen. 11Dan säden dee, dee bie de Mirtenbeem stunden, to däm Enjel: Wie sent aulawäajen oppe Ieed jewast, un de Ieed es ruich un frädlich. 12Dan säd däm Harn sien Enjel: Har, dee aules rejieet, woo lang woascht du nich Metleet äwa Jerusalem un de Städa en Juda haben? Du best nu aul 70 Joa äwa an oajalich jewast. #Psa 102,14; Dan 9,2 13Dan räd de Har leeftolich to däm Enjel un treest am. 14Un de Enjel säd to mie: Saj de Lied, daut de Har, dee aules rejieet, sajcht: Ekj vedroag daut nich, daut aundre de Macht äwa Jerusalem un Zion haben. 15Ekj wia een beskje oajalich äwa Israel, oba de prauzje Velkja haben daut too wiet jedräwen. Ekj sie sea veoajat äwa an. #Jes 47,6
16Un nu horcht no waut de Har sajcht: Ekj sie met Metleet trigj no Jerusalem jekomen. Mien Hus woat doa jebut woaren, sajcht de Har, dee aules rejieet. De Motbaunt woat aulawäajen en Jerusalem em Jebruck komen. #Sach 8,3 17Un dan saj uk noch dit: De Har, dee aules rejieet, sajcht: Miene Städa woaren noch wada goot buaren. Un de Har woat Zion noch wada treesten, un hee woat uk noch wada Jerusalem fa sien Tus wälen. #Jes 40,1-2; 14,1
Currently Selected:
Sacharja 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.