Matäus 5
PB

Matäus 5

5
1Aus Jesus aul dee Menschen sach, jinkj hee opp däm Boajch nopp un sad sikj dol. Un siene Jinja saumelden sikj om am. 2Un hee funk aun an to lieren un säd:
Wäa sikj freien doaf (De Seelichpriesungen)
(Luk 6,20-23)
3Seelich sent dee, dee em Jeist oam sent; wiels an jehieet daut Himmelrikj. #Jes 57,15 4Seelich sent dee, dee truarich sent; wiels an saul jetreest woaren. #Psa 126,5; Opb 7,17 5Seelich sent dee, dee saunftmootich sent; wiels dee sellen de Welt oawen. #Psa 37,11; Mat 11,29 6Seelich sent dee, dee een Hunga un Darscht no Jerajchtichkjeit haben; wiels dee sellen saut woaren. #Luk 18,9-14; Joh 6,35 7Seelich sent dee, dee met aundre Metleet haben; met dee woat Gott Metleet haben. #Mat 25,35-46; Jak 2,13 8Seelich sent dee, dee een reinet Hoat haben; wiels dee sellen Gott seenen. #Psa 24,3-5; 51,12-13; 1Joh 3,2-3 9Seelich sent dee, dee doa Fräd moaken; dee woaren Gott siene Kjinja heeten. #Heb 12,14 10Seelich sent dee, dee om Jerajchtichkjeits wellen vefolcht woaren; wiels daut Himmelrikj es äat. #1Pet 3,14 11Seelich sent jie, wan de Menschen om mient haulwen äwa junt schellen, junt vefoljen, un junt aulahaunt schlajchtet noräden, wan daut nich soo es. #Mat 10,22; Apost 5,41; 1Pet 4,14 12Freit junt un siet hechst froo; daut woat junt em Himmel goot beloont woaren. Wiels jrod soo haben see de Profeeten vefolcht, dee ver junt wieren. #Heb 11,33-38; Jak 5,10
De Jinja äare Oppgow Solt un Licht to sennen
(Luk 14,34-35; 11,33)
13Jie sent daut Solt oppe Ieed. Wan oba daut Solt dän Jeschmak velist, wäa kaun daut wada soltich moaken? Daut es dan to nuscht to brucken. Jie kjennen daut bloos noch utschedden un von de Menschen veklunjen loten. #Mrk 9,50; Luk 14,34-35
14Jie sent daut Licht fa dise Welt. Daut es ommäajlich eene Staut to vestäakjen, dee opp däm Boajch licht. #Joh 8,12 15Kjeen Mensch stekjt eene Laump aun un bestelpt dee dan unja eenen Ama. Dee woat doch opp eenen Laumpenhoola jestalt, daut doa fa aulem em Hus Licht es. #Mrk 4,21; Luk 8,16 16Soo lot uk jun Licht ver de Menschen schienen, daut see june goode Woakjen seenen un jun Voda em Himmel doafäa lowen. #Joh 15,8; Efs 5,8-9; Flp 2,14-15
Gott sienen Wellen em Jesaz sea iernst nämen
(Luk 16,17)
17Denkjt nich daut ekj jekomen sie Moses sien Jesaz, un daut waut de Profeeten jelieet haben, to nuscht to moaken. Ekj sie nich jekomen daut äwatsied to brinjen, oba to erfellen. #Mat 3,15; Reema 3,31; 10,4; 1Joh 2,7 18Velot junt doaropp, soolang aus Himmel un Ieed stonen, woat nich de kjlansta Buakstow ooda Punkt vom Jesaz jestrikjt woaren, bat daut aula erfelt es. #Luk 16,17 19Wan irjentwäa daut kjlanste Jeboot opphäft un de Menschen soo lieet, dee woat em Himmelrikj aus de jerinjsta to stonen komen. Wäa de Jebooten oba helt un lieet, woat groot sennen em Himmelrikj. #Jak 2,10
20Wiels dit saj ekj junt: Wan june Jerajchtichkjeit nich woat bäta sennen aus de Schreftjelieede un Farisäa äare, woa jie niemols en daut Himmelrikj komen. #Mat 23,2-33
Biem Jeboot, nich dootmoaken
21Jie haben jehieet daut to dee en de oole Tiet jesajcht wia: “Du saust nich dootmoaken”; wäa oba doch dootmoakt, woat ver Jerecht komen. #2Mo 20,13; 21,12 22Ekj oba saj junt: Wäa sikj met sienen Brooda doll es, #5,22 Eenje oole Schreften sajen onen Uasoak. es aul schuldich ver daut Jerecht to komen. Un wäa to sienen Brooda sajcht: Du dauchst nuscht! saul ver däm Rot jestalt woaren. Wäa to sienen Brooda sajcht: Du Dommkopp! es en Jefoa en daut Halenfia to komen. #1Joh 3,15 23Wan du nom Aultoa jeist diene Gow to opfren un die doa biefelt, daut dien Brooda waut jäajen die haft, 24dan lot diene Gow doa ver däm Aultoa ligjen un go un moak ieescht Fräd met dienen Brooda, un dan go un brinj diene Gow. #Mrk 11,25 25See daut du met dienen Jäajna noch schwind opp däm Wajch nom Jerecht opp däm reinen kjemst, daut dee die nich dän Rechta äwajeft, un de Rechta die dan aum Wajchta utleewat, un dee die dan enstoppen lat. #Mat 18,23-35; Luk 12,58-59 26Ekj saj die woarhauftich: Doa kjemst du nich rut, bat du daut latste Zent betolt hast.
Biem Jeboot, nich de Ehe bräakjen
(Luk 16,18)
27Jie haben jehieet, daut doa to dee en de oole Tiet jesajcht wia: “Du saust de Ehe nich bräakjen.” #2Mo 20,14 28Ekj oba saj junt: Wäa een Frumensch doaropp aunkjikjt, daut hee ar haben mucht, haft bie sikj em Hoat aul met ar de Ehe jebroaken. #2Sam 11,2; Hiob 31,1; 2Pet 2,14 29Wan dien rajchtet Uag die veuasoakt to sindjen, dan riet daut ut un schmiet daut wajch. Daut es bäta wan du een Poat vom Kjarpa velist, aus wan dien gaunza Kjarpa en de Hal jeschmäten woat. #(29 un 30) Mat 18,8-9; Mrk 9,47.43; Kol 3,5 30Wan diene rajchte Haunt die veuasoakt toom sindjen, dan hak dee auf un schmiet dee wajch. Daut es väl bäta fa die, wan du een Jlett velist, aus wan dien gaunza Kjarpa en de Hal jeschmäten woat.
Ehescheidunk
(Mat 19,9; Mrk 10,11-12; Luk 16,18)
31Doa wia uk jesajcht: “Wäa sikj von siene Fru scheeden deit, saul ar een Entlotungsschien utschriewen.” #5Mo 24,1; Mat 19,3-9; Mrk 10,4-12 32Oba ekj saj junt: Daut wäaemma sikj von siene Fru scheeden deit, buta wäajen Ehebruch, dee veuasoakt, daut see eene Ehebräakjarin woat; un wäa sikj ar friet, brakjt uk de Ehe. #Luk 16,18; 1Kor 7,10-11
Biem Jeboot, nich Schwieren
33Dan hab jie uk jehieet, daut to oole Tiet jesajcht wia: “Du saust nich faulsch schwieren; oba daut ver Gott hoolen waut du jeschwuaren hast.” #3Mo 19,12; 4Mo 30,3 34Oba ekj saj junt: Doot äwahaupt nich schwieren, nich biem Himmel, wiels daut es Gott sien Troon; #(34 un 35) Mat 23,16-22; Jes 66,1 35uk nich bie de Ieed, wiels daut es siene Footbenkj; ooda bie Jerusalem, wiels daut es dän grooten Kjennich siene Staut. #Psa 48,3 36Du saust uk nich bie dien ieejnen Kopp schwieren, wiels du kaust nich emol eene Hoa witt ooda schwoat moaken. 37Lot jun jo, jo sennen, un jun nä, nä sennen. Waut jie doaräwa gonen, kjemt vom beesen. #5,37 ooda von beeset #Jak 5,12
Biem Jeboot, nich Rach eewen
(Luk 6,29-30)
38Jie haben uk jehieet, daut doa jesajcht wia: “Een Uag fa een Uag, un eene Tän fa eene Tän.” #2Mo 21,24 39Oba ekj saj junt, doot äwahaupt nich Rach eewen, wan junt wäa orrajcht deit; leewa, wan die wäa opp de rajchte Bak schleit, dan hool am de linkje uk han. #Kloag 3,30; Joh 18,22-23; Reema 12,19.21; 1Pet 2,20-23 40Un wan die wäa ver Jerecht nemt un dien Rock velangt, dan jeff am uk dien Äwarock. #1Kor 6,7; Heb 10,34 41Un wan wäa velangt eene Miel met am to gonen, dan go twee Miel met am. 42Wan die wäa om waut prachat, dan jeff am daut, un saj dän nich auf, dee sikj von die waut lieen well.
Biem Jeboot, de Metmenschen goot sennen
(Luk 6,27-28.32-36)
43Jie haben jehieet, daut doa jesajcht es: “Du saust dienen Noba goot sennen” un to dienen Fient schlajcht sennen. #3Mo 19,18 44Oba ekj saj junt: Siet june Fiend goot, un säajent dee, dee junt flieekjen; doot goots fa dee, dee schlajcht to junt sent; bät fa dee, dee junt beleidjen un vefoljen, #2Mo 23,4-5; Luk 6,27-28; 23,34; Apost 7,60; Reema 12,14.20 45soo daut jie jun Voda em Himmel siene Kjinja kjennen sennen, wiels hee lat siene Sonn oppgonen äwa de goode un schlajchte, un lat daut räajnen äwa jerajchte un ojjerajchte. #Efs 5,1 46Wan jie dee goot sent, dee junt goot sent, woo kjenn jie met eenen Loon räakjnen, wiels daut doonen soogoa de Takskollakjta. 47Un wan jie bloos june Frind frintlich bejreessen, waut doo jie mea aus aundre? Daut doonen soogoa de Takskollakjta. 48Oba jie motten volkomen sennen, jrod soo aus jun Voda em Himmel volkomen es. #3Mo 19,2

Plautdietsch Bible © 2003 Kindred Productions and United Bible Societies Association, Inc.


Learn More About De Bibel

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.