Jakobus 1
1
Breefaunfank
1Jakobus, Gott un däm Harn Jesus Christus sien Kjnajcht, schrift no de twalw Stam, dee wiet un breet äwa de Welt vestreit sent:
Gloowen un Twiewel
2Miene Breeda, nämt daut met Freiden aun, wan jie opp veschiedne Wäaj jeprooft un vesocht woaren. #Reema 5,3-5; 1Pet 4,13 3Doaderch daut jun Gloowen en de Vesieekjungen bestonen blift, lia jie jeduldich sennen. Daut derw jie weeten. 4Derch jeduldich sennen sell jie bat aum Enj behoolen bliewen, daut jie fälaloos un onbeschädicht sent, un junt daut aun nuscht fält.
5Wan daut bie irjentwäm von junt aun Weisheit fält, dan saul hee Gott doano froagen. Wiels Gott jiedrem jieren jeft un kjeenen schelt, woat am de Weisheit jejäft woaren. #Spr 2,3-6; Jak 3,15 6Lot am oba em Gloowen froagen, un nich twiewlen. Een Twiewla es soo aus eene Wal oppem Mäa, dee vom Wint han un häa jedräwen woat. #Mrk 11,24; 1Tim 2,8 7Wäa twiewelt saul nich meenen, daut hee von Gott waut kjrieen woat. 8Een Twiewla es han un häa opp aul siene Wäaj.
Oam sennen un rikj sennen
9De läachstonenda Brooda saul sikj freien, daut hee huach steit. #Jak 2,5 10Un de rikja saul sikj freien, daut hee läach steit, wiels soo aus eene Bloom opp de Stap veschwinjt, woat hee uk met eemol wajch sennen. #1Tim 6,17; 1Pet 1,24 11De Sonn jeit opp met äare brennende Hett, un daut Graus vedrieecht, un de Bloom felt auf, un met schmock loten es daut jewast. Soo woat daut uk däm rikjen Maun en aul siene Drockichkjeiten gonen. #Jes 40,6-7
Von wua de Vesieekjungen komen
12Seelich es dee Maun, dee nich vesajcht, wan hee vesocht woat, un uthelt, wan hee oppe Proow jestalt woat. Wan hee de Proow bestonen haft, woat am de Läwenskroon jerieekjt woaren, dee de Har dämjanjen vesproaken haft, dee am goot es. #2Tim 4,8
13Wan een Mensch vesocht woat, saul hee niemols sajen, daut Gott am vesieekjt. Gott kaun nich toom beesen vesocht woaren, un hee vesieekjt uk kjeenem. 14Oba een Mensch woat vesocht wan hee von siene ieejne beese Lost metjeräten woat. #(14 un 15) 1Mo 3,6; Reema 7,7-8 15Wan de beese Lost sikj ieescht faustjesat haft, woat de Sind jebuaren. Un wan de Sind jedonen es, brinjt see dän Doot. #Reema 7,10 16Lot junt nuscht väamoaken, leewe Breeda. 17Aule goode Sachen un aule volkomne Gowen komen von bowen rauf. Dee komen vom Voda, dee daut Licht jemoakt haft. Hee veendat sikj nich, un hee vewakjselt nich dachet met diestret. #1,17 Eenje oole Schreften sajen hee veendat sikj nich, soo aus een Schauten daut sikj dreit. #Mat 7,11; 1Joh 1,5 18Hee haft ons derch sien woaret Wuat jemoakt soo aus hee daut wull, daut wie dän ieeschten Plauz haben sullen bie aules waut hee jemoakt haft. #Joh 1,13; 1Pet 1,23
Nich bloos hieren, uk doonen
19Miene leewe Breeda, siet schwind bie de Sach toom horchen, äwalajcht goot ea jie räden, un woat nich leicht doll. #Spr 29,20; Liera 5,1-2; 7,9 20Een Mensch, dee en Wutt haundelt, deit nich waut ver Gott rajcht es. #Spr 29,22; Efs 4,26 21Lajcht aules auf waut orrein es un waut schlajcht es. Un nämt daut Wuat wellich opp, daut en junt jeplaunt es un de Krauft haft, june Seelen to raden. #1Pet 2,1 22Jie motten oba uk doonen waut daut Wuat sajcht, wiels bloos hieren, rieekjt nich too, sest beschummel jie junt selfst. #Mat 7,21; Reema 2,13 23Wäa daut Wuat bloos hieet un nich deit, waut daut sajcht, dee es aus een Mensch, dee sikj em Spieejel bekjikjt 24un dan doavon jeit, un fuaz vejat, woo daut am utsach. 25Wäa en daut volkomne Jesaz Gottes nenn kjikjt, waut ons frie moakt, wäa doabie blift un nich een vejätsoma hiera es, oba deit waut daut sajcht, dee woat bie sienem schaufen tofräd sennen. #Joh 13,17; Reema 8,2; Jak 2,12 26Wan wäa meent daut hee Gott deent, un kaun siene Tung oba nich em Toom hoolen, dee schmäat sikj aun, un soon Mensch sien Gottesdeenst es vejäfs. #1Pet 3,10 27De Weisen un Wätfrues en äare Noot besieekjen un sikj von de Welt rein hoolen, daut es een reina un ajchta Gottesdeenst ver Gott dän Voda.
Currently Selected:
Jakobus 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.