Kolossa 1
1
Gruss toom Aunfank
1Paulus, dee derch Gott sienen Wellen Christus Jesus sien Apostel es, un Brooda Timotäus 2schriewen no de heilje en Kolossä, de true Breeda en Christus: Wie wenschen junt Jnod un Fräd von Gott onsen Voda!
De Apostel dankt un bät fa de Jemeent
3Wie danken Gott dän Voda von onsem Harn Jesus Christus, emma wan wie aun junt denkjen un fa junt bäden. 4Wie haben von junen Gloowen aun Christus Jesus jehieet, un woo jie aule heilje goot sent. 5Daut haft doamet to doonen, daut doa eene Hopninj fa junt em Himmel reed licht. Doavon hieed jie aus junt daut woare Wuat, daut Evangelium, jeprädicht wort. #1Pet 1,3-4 6Un soo aus daut en de gaunze Welt waust un Frucht brinjt, soo deit daut uk bie junt von däm Dach aun, aus jie daut hieeden un Gott siene Jnod en Christus vestonen kunnen. 7Soo hab jie daut von Epafras, onsen leewen Metoabeida, jelieet. Hee es Christus sien trua Deena fa junt. #1,7 Eenje oole Schreften sajen fa ons. #Flp 1,23; Kol 4,12 8Hee haft ons uk von june Leew jesajcht, dee jie derch dän Heiljen Jeist haben.
Christen läwen em Licht
9Fuaz von don aun aus wie daut hieeden, hild wie aun, fa junt to bäden. Wie bäden, daut Gott junt mucht to vestonen jäwen, waut sien Wellen fa junt es, un daut junt daut nich aun jeistliche Ensecht fälen mucht. #Efs 1,15-17 10Wie bäden, daut jie Gott to jefaulen läwen kjennen, un derch goode Woakjen Frucht brinjen un Gott emma noda kjanen lieren. #Efs 4,1; Flp 1,27 11Un mucht Gott junt stoakj moaken, doano aus siene Macht harlich es, daut jie aules jeduldich un met Freid uthoolen kjennen. 12Dankt Gott dän Voda doafäa, daut hee junt #1,12 Eenje oole Schreften sajen daut hee ons. fäich jemoakt haft, daut Oafgoot to kjrieen, waut Christus fa de heilje em Licht reed jemoakt haft. #Efs 1,11; 1Pet 1,4 13Hee haft ons ut de Jewault vonne diestre Machten rut jerat, un haft ons nenn jesat en daut Rikj von sienen leewen Sän, Jesus Christus. #Kol 2,15 14En Jesus hab wie onse Radunk, daut meent, Jesus haft ons onse Sinden vejäft. #Efs 1,7
Christus brinjt Radunk
15Christus likjent jeneiw Gott, dän wie nich seenen kjennen. Hee wia doa ea irjentwaut oppe Ieed jemoakt wort. #Heb 1,3; Opb 3,14 16Derch am muak Gott aules waut em Himmel un oppe Ieed jemoakt worden es, waut to seenen es un waut nich to seenen es, auf Troonen, Rejierungen, Harschoften un Jewaulten, daut es aules derch am un fa am jemoakt. #Joh 1,3.10; Heb 1,2 17Hee wia doa ea irjent waut jemoakt wort, un derch am besteit aules. 18De Jemeent es sien Kjarpa, un hee es de Kopp (daut Haupt). Von am kjemt daut Läwen, un hee es de Ieeschtjebuarna von de Doodes, daut hee en aules dän ieeschten Plauz haft. #Apost 26,23; 1Kor 15,20; Efs 1,22; Opb 1,5 19Gott jefoll daut, daut de Sän de volle Gottheit en sikj haud. #(19 un 20) 2Kor 5,19; Kol 2,9; Joh 1,16; Efs 1,23 20Derch dän Sän wull Gott aules met sikj veseenen, aules waut oppe Ieed ooda em Himmel es, doaderch daut Jesus Fräd jemoakt haft derch sien Bloot aum Kjriez. #1Joh 2,2
Veendadet Läwen derch de goode Norecht
21Jie selfst wieren verhäa Gott framd, un en jun schlajchtet Läwen wia jie Gott fientlich jesonnen. #Reema 5,10; Efs 2,12-13; 4,18 22Oba Christus haft junt derch sienen kjarpalichen Doot wada met Gott toopjebrocht, om junt rein, heilich un schultloos ver am hantostalen. #Efs 5,27 23Doabie kjemt daut nu doaropp aun, daut jie em Gloowen gaunz faust bliewen, un daut jie nich aufkomen von de Hopninj em Evangelium. Soo hab jie daut jehieet, un soo es daut aule Menschen unja däm Himmel jeprädicht worden. Ekj, Paulus, sie sien Deena jeworden.
Paulus sien Deenst
24Ekj frei mie en daut waut ekj fa junt lieden doaf, om soo aun mienem Kjarpa foadich to moaken waut aun de lieden von Christus fa siene Jemeent noch fält. De Jemeent es sien Kjarpa. #Efs 3,13; 2Tim 2,10 25Ekj sie een Deena aum Evangelium jeworden doaderch daut Gott mie aunjestalt haft, junt sien Wuat sea rikjlich to prädjen. 26Daut es daut Jeheemnis, waut von eewje Tieden häa vestoaken wia, nu oba von Gott fa siene heilje verendach jebrocht worden es. #Reema 16,25; Efs 3,3-6 27Gott wull siene heilje daut nu weeten loten, waut fa een harlichet Rikjtum en dit Jeheemnis fa aule Velkja es. Daut es, Christus en junt, daut es dee Harlichkjeit, met dee jie räakjnen kjennen. #1Tim 1,1 28Disen Christus prädj wie un woarnen un belieren aule Menschen en aule Weisheit. Doaderch well wie eenen jiedren bat doa brinjen, daut hee volkomen es en Christus. 29Dit es wuafäa ekj mie aunstrenj un oabeid derch de Krauft von Christus, dee en mie wirkjt.
Currently Selected:
Kolossa 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.