Markus 5
5
Jesus heelt eenen Maun met eenem beesen Jeist
(Mat 8,28-34; Luk 8,26-39)
1Un see kjeemen no de aundre Sied Mäa, en de Gadarena #5,1 Eenje oole Schreften sajen Gergaseena. äare Jäajent. 2Un aus hee ut de Lomm stieech, kjeem am fuaz een Maun von mank de Jräwa entjäajen, dee von eenem orreinen Jeist besäten wia. 3Dis Maun wond mank de Jräwa un wia met nuscht mea to binjen, nich emol met Kjäden. 4Hee wia aul foaken aun Henj un Feet jekjät wast, oba hee haud noch emma de Kjäden tweijeräten un de Iesasch aun de Feet tweijebroaken. Un doa wia kjeena, dee am faustnämen kunn. 5Hee waundad, Dach un Nacht, mank de Jräwa un en de Boaj, schrieech un schluach sikj met Steena. 6Aus Jesus kjeem, sach hee am aul von wiet auf. Hee rand am entjäajen un schmeet sikj ver am opp de Kjneeen. 7Hee schrieech met lude Stemm: Waut hab ekj met die to doonen, Jesus? Du best däm hechsten Gott sien Sän. Schwia ver Gott, daut du mie nich kjwälen woascht! #Mrk 1,24 8Wiels Jesus haud to am jesajcht: Du beesa Jeist, komm ut disem Mensch rut! 9Dan fruach Jesus #5,9 Eenje oole Schreften sajen hee. am woo hee heet. Hee säd: Ekj heet dusende, wiels wie sent onsa väle. 10Un hee prachad Jesus emma wada, an nich ut de Jäajent rut to schekjen. 11Doa dicht bie aum Boajch grosd eene groote Häad Schwien. 12Dan prachaden de orreine Jeista am, an en de Schwien nenn foaren to loten. 13Jesus jeef an de Frieheit, un de beese Jeista kjeemen rut un fuaren en de Schwien nenn. Un de Häad von 2.000 Schwien moaragd em Mäa nenn, un dee vesoopen. 14Un de Schwienshoad randen un vetalden en de Staut un uk opp daut Launt, waut jeworden wia. Un de Menschen kjeemen han to seenen, waut passieet wia. 15Un aus see no Jesus kjeemen, sagen see dän, dee von de orreine Jeista wia besäten jewast, veninftich un jekjleet setten, un see ferchten sikj. 16Un dee, dee daut jeseenen hauden, vetalden de Menschen, waut met däm Maun passieet wia, dee von beese Jeista besäten jewast wia, un uk woo sikj daut met de Schwien romjenomen haud. 17Dan fungen de Menschen aun Jesus #5,17 Eenje oole Schreften sajen am. drinjent to prachren, äare Jäajent to veloten. 18Aus Jesus en de Lomm nenn stieech, prachad dee Maun, dee von beese Jeista wia besäten jewast, auf hee metkomen kunn. 19Jesus leet daut nich to, oba säd hee sull no Hus, no siene Famielje gonen un an vetalen, woo de Har met am Metleet haud un waut hee am en siene Jnod fa eenen grooten Jefaulen jedonen haud. 20Un hee jinkj loos un funk aun en de tieen Städa to vetalen, waut Jesus aules fa am jedonen haud. Un aulemaun wundad sikj. #Mrk 7,31
Jesus heelt eene kranke Fru un wakjt eene Mejal vom Doot
(Mat 9,18-26; Luk 8,40-56)
21Aus Jesus wada met de Lomm no de aundre Sied Mäa jefoaren wia, saumelden sikj doa biem Wota wada väl Menschen om am. 22Un Jairus, eena von de Leidasch von de Judenschool, kjeem uk, un aus hee Jesus sach, foll hee ver am dol 23un prachad am sea un säd: Miene kjliene Dochta es aum stoawen; komm doch un laj ar diene Henj opp, daut see kaun jesunt woaren un läwen. 24Un hee jinkj met am met. Doa kjeemen väle met un drenjden sikj no am opptoo. 25Un doa wia eene Fru, dee aul 12 Joa jeblat haud. 26Dee haud aul väl jeläden derch een deel Doktasch un aules utjejäft, waut see haud. Oba daut wia met ar en de Städ bäta, bloos emma oaja jeworden. 27Aus see von Jesus hieed, kjeem see derch daut Volkj von hinjen aun am naun un schieed siene Kjleeda aun. 28See haud sikj jesajcht: Wan ekj am bloos aun de Kjleeda aunschieren kunn, wudd ekj jesunt woaren. 29Äa bleeden hieed fuaz opp, un see kunn daut em Lief feelen, daut see von äare Ploag jeheelt wia. 30Un Jesus späad fuaz aun sikj, daut eene Krauft ut am jegonen wia, un dreid sikj mank daut Volkj om un fruach: Wäa haft miene Kjleeda aunjeschieet? #Luk 6,19 31De Jinja säden to am: Du sitst, daut daut Volkj die drenjt, un dan frajchst noch, wäa die aunjeschieet haft? 32Un hee kjikjt sikj om, to seenen, wäa daut jedonen haud. 33De Fru wia angst daut ar flautad, wiels see wist je waut met ar jeworden wia. See kjeem un foll ver am dol un säd am de volle Woarheit. 34Un hee säd to ar: Miene Dochta, dien Gloowen haft die jeholpen. Go en Fräd! Du best von diene Ploag loos.
35Oba aus hee noch räd, kjeemen eenje Mana von daut Hus von däm Leida von de School un säden: Diene Dochta es aul jestorwen. Wuarom woa wie dän Liera noch mea baudren? 36Oba Jesus hieed, waut doa jerät wort, un säd to dän Leida: Fercht die nich lenja, jleew bloos! 37Un hee leet sest kjeenem met komen aus Petrus, Jakobus un Johanes, Jakobus sien Brooda. #Mat 17,1 38Un see kjeemen no däm Leida von de Judenschool sien Hus un sagen dän Klommua un daut jaumarierende Jehiel. 39Jesus jinkj nenn un säd to an: Wuarom moak jie soo een Klommua un Jehiel? Daut Kjint es nich jestorwen; daut schlapt. #Joh 11,11 40Un see fungen aun äwa am to lachen. Hee schekjt an aula rut, neem daut Kjint äaren Voda un Mutta un dee, dee met am wieren, un jinkj en de Stow nenn, wua daut Kjint wia. 41Hee foot daut Kjint aun de Haunt un säd to ar: Talieta kum! daut meent: Mejalkje, ekj saj die, sto opp! #Luk 7,14; Apost 9,40 42Un daut Mejalkje stunt plazlich opp un funk aun to gonen, wiels dee wia aul 12 Joa oolt. Un see wisten sest nuscht, aus doaräwa to staunen. 43Un hee jeboot an sea strenj, daut dit kjeena wudd to hieren kjrieen, un säd, daut see ar sullen to äten jäwen.
Currently Selected:
Markus 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.