Matäus 8
8
Jesus heelt een Lepra
(Mrk 1,40-45; Luk 5,12-16)
1Aus Jesus vom Boajch rauf kjeem, jinjen am een grootet Schoof Menschen hinjaraun. 2Un nu horcht, doa kjeem uk een Leprakranka, bäd am aun un säd: Har, wan du west, du kaust mie rein moaken. 3Un Jesus strakjt siene Haunt ut, schieed am aun un säd: Daut es waut ekj well; sie rein! Un fuaz oppe Städ wia hee von siene Lepra Krankheit loos. 4Un Jesus säd to am: See doano, daut du daut kjeenem sajchst, oba go un stal die dän Priesta väa un brinj een Opfa, soo aus Moses befolen haft, aus een Bewies ver an. #8,4 Eenje oole Schreften sajen fa daut Volkj. #3Mo 14,2-32; Mrk 8,30
De reemischen Offizia von Kapernaum
(Luk 7,1-10; 13,28-29; Joh 4,46-53)
5Aus Jesus en Kapernaum nenn kjeem, kjeem am een Offizia entjäajen un säd to am: 6Har, mien Kjnajcht licht tus jelämt un sea jekjwält. 7Un Jesus säd to am: Ekj woa komen un am jesunt moaken. 8Oba de Offizia säd to Jesus: Har, ekj sie daut nich wieet, daut du unja mien Dak kjemst. Saj du bloos een Wuat, dan woat mien Kjnajcht aul jesunt woaren. 9Wiels ekj sie een Maun, dee unja Autorität steit, un hab Soldoten unja mie. Ekj saj to eenem: Go! un dee jeit; to een aundren: Komm! un dee kjemt; un to mien Sklow: Doo dit! un dee deit daut. 10Aus Jesus daut hieed, wundad hee sikj un säd to dee, dee met am jinjen: Dit mott ekj junt sajen: Soon Gloowen hab ekj nich emol en Israel #8,10 Eenje oole Schreften sajen noanich. jefungen. #Mrk 6,6; Luk 18,8 11Ekj saj junt dit: Väl woaren vom Oosten un Wasten komen un en daut Himmelrikj met Abraham, Isaak un Jakob aum Desch setten, #(11 un 12) Luk 13,28-29 12oba de Kjinja von daut Rikj woaren rut em diestren jeschmäten woaren. Doa woaren see jaumarieren un met de Tänen kjnirschen. 13Un to dän Offizia säd Jesus: Go, daut woat soo woaren aus du jejleeft hast. Un krakjt dan wort sien Deena jesunt. #Mat 9,29; 15,28
Jesus heelt de Schwieemutta von Petrus un väl aundre Menschen
(Mrk 1,29-34; Luk 4,38-41)
14Aus Jesus bie Petrus em Hus kjeem, sach hee daut Petrus siene Schwieemutta krank em Bad lach, un daut see Feeba haud. #1Kor 9,5 15Hee foot ar aun de Haunt, un daut Feeba veleet ar. Dan stunt see opp un bedeend am. 16Dan zeowes brochten see väle no am, dee von beese Jeista besäten wieren, un hee dreef de Jeista rut met sien Wuat un muak aul äare kranke jesunt, 17daut sikj daut erfellen wudd, waut derch dän Profeet Jesaja jesajcht es, dee doa sajcht:
“Hee haft onse Schwakheiten opp sikj jenomen
un onse Krankheiten jedroacht.” #Jes 53,4
Waut daut kosten kaun Jesus sien Jinja to sennen
(Luk 9,57-62)
18Aus Jesus sach, daut noch soo väl Menschen om am stunden, befool hee äwa to foaren no de aundre Kaunt See. 19Un een Schreftjelieeda kjeem no am un säd: Meista, ekj well metkommen, wuaemma du hanjeist. 20Un Jesus säd to am: Fas haben äare Lajcha, de Väajel haben äare Nasta, oba de Menschensän haft nich een Plauz, sienen Kopp hantolajen. #2Kor 8,9 21Dan säd een aundra Jinja: Lot mie ieescht gonen, mienen Voda begrowen. #Mat 10,37 22Jesus säd to am: Folj du mie no, un lot de Doodje äare Doodes selfst begrowen!
Em Storm oppe Proow jestalt
(Mrk 4,35-41; Luk 8,22-25)
23Jesus stieech en daut Boot nenn, un siene Jinja am hinjaraun. 24Oba horcht emol, een jewaultja Storm kjeem oppem Mäa opp, soo daut de Walen äwa daut Boot schluagen. Oba Jesus schleep. 25Un siene Jinja kjeemen un wuaken am opp un säden: Har, rad ons, wie komen om! 26Un hee säd to an: Wuarom es junt soo angst? Woo es jun Gloowen soo kjlien? Un Jesus stunt opp un befool dän Wint un de Walen sikj to lajen. Un daut wort gaunz stell. #Psa 89,10; Apost 27,22.34 27Un de Menschen staunden doaräwa un säden: Waut es daut fa een Mensch, daut am soogoa Wint un Wota unjadon sent?
Jesus heelt twee besätne Mana von Gadara
(Mrk 5,1-20; Luk 8,26-39)
28Aus Jesus no de aundre Sied Wota kjeem en de Gadarena #8,28 Eenje oole Schreften sajen Gergasena un eenje Gerasena. äa Launt, kjeemen am twee Mana entjäajen, dee von beese Jeista besäten wieren, dee sikj en ladje Jräwa opphilden un soo rietent wieren, daut sikj kjeena woagd dän Wajch to gonen. 29Aus dee Jesus sagen, fungen dee aun to schrieen: Waut hast du met ons to doonen, Jesus du Gott sienen Sän? Best du jekomen ons ver de Tiet to kjwälen? #Luk 4,41; 2Pet 2,4; Jak 2,19 30Een zimlichet Enj auf grosd eene groote Häad Schwien. 31Dan prachaden de Soton Jesus un säden: Wan du ons rut driewen deist, dan lot ons en de Schwien nenn foaren. 32Un Jesus säd: Got! Dan kjeemen dee rut un fuaren en de Schwien nenn. Un de gaunze Häad Schwien moaracht äwa dän Aufgrunt em Mäa nenn, un vesoopen. 33De Schwienshoad randen aus jejoacht en de Staut nenn un vetalden aules waut passieet wia, un uk waut met de Mana passieet wia, dee von de beese Jeista wieren besäten jewast. 34Un aulemaun kjeem ut de Staut rut Jesus to trafen. Un aus see am sagen, prachaden see am äare Jäajent to veloten.
Currently Selected:
Matäus 8: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.