Matäus 4
4
Jesus vom Soton vesocht
(Mrk 1,12-13; Luk 4,1-13)
1Dan wort Jesus vom Jeist en de Wiltnis nenn jebrocht, om doa vom beesen Fient vesocht to woaren. #Heb 4,15 2Un aus hee 40 Doag, Dach un Nacht jefaust haud, hungad am. #2Mo 34,28; 1Kjen 19,8 3Dan kjeem de Vesieekja un säd to am: Wan du Gott sienen Sän best, dan jebeed dise Steena, daut dee Broot woaren. #1Mo 3,1-7 4Jesus oba auntwuad: Daut steit jeschräwen: “De Mensch läft nich bloos von Broot, oba von aule Wieed, dee Gott jerät haft.” #5Mo 8,3
5Dan neem de beesa Fient am en de heilje Staut nenn un stald am opp dän Tempelspetz 6un säd to am: Wan du Gott sien Sän best, dan sprinj rauf, wiels daut steit jeschräwen:
“Hee woat siene Enjel Befäl äwa die jäwen,
un dee woaren die opp de Henj droagen,
daut du die nich de Feet aun eenen Steen steeten woascht.” #Psa 91,11-12
7Jesus säd to am: Daut steit uk jeschräwen: “Du saust Gott dienen Harn nich vesieekjen.” #5Mo 6,16
8Dan neem de Soton am wada met sikj opp een huagen Boajch nopp, un wees am aule Kjennichsrikjs un äare Pracht opp de Ieed 9un säd to am: Dit woa ekj die aula jäwen, wan du die ver mie bieejen un mie aunbäden woascht. #Mat 16,26 10Dan säd Jesus to am: Wajch met die, Soton! Wiels daut steit jeschräwen: “Du saust Gott, dienen Harn, aunbäden un eensich am deenen.” #5Mo 6,13 11Dan veleet de beesa Fient am un de Enjel kjeemen un deenden am. #Joh 1,51; Heb 1,6.14
Jesus fangt sienen Deenst en Galiläa aun
(Mrk 1,14-15; Luk 4,14-15)
12Aus Jesus hieed, daut Johanes faustjenomen wia, trock hee no Galiläa. #Mat 14,3 13Hee veleet Nazaret, kjeem un wond en Kapernaum, daut en de Sebulon un Naftali Jäajent aum Mäa licht, 14daut et sikj erfellen wudd, waut de Profeet Jesaja jesajcht haud: #Jes 8,23; 9,1
15“Daut Launt Sebulon un daut Launt Naftali,
dee aum Mäa ligjen, aun de aundre Sied vom Jordan,
daut gottloose Galiläa,
16daut Volkj, daut em diestren saut,
haft een grootet Licht jeseenen;
un äwa dee, dee em diestren wonden,
es een Licht oppjegonen.” #Joh 8,12
17Von dee Tiet aun funk Jesus aun to prädjen un to sajen: Kjieet om, wiels daut Himmelrikj es dicht bie. #Mat 3,2
Jesus beroopt vea Fescha aus Jinja
(Mrk 1,16-20; Luk 5,1-11)
18Aus Jesus aum galiläischen Mäa jinkj, sach hee twee Breeda, Simon, dee Petrus jenant wort, un sien Brooda Andreas, dee daut Nat en daut Mäa schmeeten. Daut wieren Fescha. 19Un hee säd to an: Folcht mie no, un ekj woa Menschenfescha von junt moaken! #Mat 28,19-20 20Un see veleeten soofuaz äa Nat un jinjen met am met. #Mat 19,27 21Un aus see von doa wieda jinjen, sach hee noch twee Breeda, Jakobus un Johanes, met äaren Voda Zebedäus toop en een Boot äare Nats flekjen, un roopt an. 22Dee veleeten soofuaz daut Boot uk äaren Voda, un jinjen met am met.
Jesus lieet, un heelt; om am saumelt sikj daut Volkj
(Mrk 3,7-12; Luk 6,17-19)
23Un Jesus jinkj derch gaunz Galiläa un lieed en äare Judenschoolen un prädijd daut Evangelium vom Rikj un heeld jieda Krankheit un Liedenschoft em Volkj. 24Un hee wort doaderch en gaunz Sierien beriemt, un see brochten aul äare kranke no am, dee von veschiedne Liedenschoften jekjwält worden, dee waut vom Soton besäten wieren, dee waut Aunstoot hauden un de Jelämde, un hee muak dee aula jesunt. #Mrk 6,55 25Un von Galiläa un de Tieen Städa, von Jerusalem un Judäa, un von hinja däm Jordan kjeem am väl Volkj hinjaraun.
Currently Selected:
Matäus 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.