Matäus 3
3
Johanes, de Deepa, prädicht
(Mrk 1,2-6; Luk 3,1-6; Joh 1,19-23)
1En dee Tiet kjeem Johanes de Deepa un prädijd en Judäa en de Wiltnis un säd: #Luk 1,13
2Kjieet om, daut Himmelrikj es dicht bie! #Mat 4,17; Reema 12,2 3Dit es dee von däm de Profeet Jesaja jesajcht haft #Jes 40,3
“Eene Stemm roopt en de Wiltnis:
Moakt een Wajch reed fa onsen Harn,
moakt fa am eenen jlikjen Stich.” #Joh 1,23
4Johanes oba haud een Kjleet von Kameelenhoa jemoakt, un hee druach dee met een Ladagort om de Lint, un äten deed hee Graushoppa un willen Honnich. #2Kjen 1,8 5Un de Menschen von Jerusalem un gaunz Judäa un de Jordan Jäajenden kjeemen no am, 6bekjanden äare Sinden un leeten sikj von am em Jordan deepen.
De Deepa foddat opp, omtokjieren
(Luk 3,7-9)
7Oba aus hee sach, daut väl Farisäa un Saduzäa kjeemen sikj von am deepen to loten, säd hee to an: Jie Schlangenbroodsel! Wäa haft junt jesajcht daut jie daut komende Jerecht utem Wäaj komen kjennen? #Mat 23,33 8Bewiest met jun Läwen, daut jie junt oppjemoakt haben, 9un denkjt nich, daut jie bie junt selfst sajen kjennen: Abraham es ons Voda. Ekj saj junt: Gott kaun Abraham ut dise Steena Kjinja schaufen. #Joh 8,33.39; Reema 2,28-29; 4,12 10De Akjs licht de Beem aun de Wartel reed, un jieda Boom, dee nich goode Frucht drajcht, woat aufjehakt un em Fia jeschmäten. #Luk 13,6-9
De Deepa wiest de Menschen no Christus
(Mrk 1,7-8; Luk 3,15-18; Joh 1,24-28)
11Ekj deep junt met Wota daut jie omkjieren. Oba dee waut no mie kjemt es stoakja aus ekj, däm ekj nich wieet sie de Schoo to droagen. Dee woat junt met dän Heiljen Jeist un met Fia deepen. #Joh 1,26-27.33; Apost 1,5; 2,3-4 12Hee haft siene Schmietscheffel en de Haunt, un woat de Draschflua rein moaken, un dän Weit em Spikja brinjen. Oba daut Sprie woat hee em Fia schmieten, daut nich uttomoaken jeit. #Mat 13,30
Jesus lat sikj von Johanes deepen
(Mrk 1,9-11; Luk 3,21-22; Joh 1,32-34)
13Dan kjeem Jesus von Galiläa no Johanes, om sikj von am em Jordan deepen to loten. 14Johanes oba proowd am doavon auftoräden un säd: Ekj sull mie von die deepen loten, un du kjemst no mie? #Joh 13,6 15Jesus oba auntwuad am: Doo daut mau, wiels doamet doo wie waut Gott siene Jerajchtichkjeit velangt. Dan leet hee daut too. 16Un sooboolt aus Jesus jedeept wia, kjeem hee utem Wota rut, un dan muak sikj de Himmel äwa am op, #3,16 Eenje oole Schreften sajen de Himmel op. un hee sach Gott sien Jeist, soo aus eene Duw rauf komen un sikj opp am saten. #Jes 11,2 17Un eene Stemm vom Himmel säd: Dit es mien leewa Sän, met däm ekj sea tofräd sie. #Jes 42,1; Mat 17,5
Currently Selected:
Matäus 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.