Lukas 24
PB
24
Jesus steit opp vom Doot
(Mat 28,1-10; Mark 16,1-8; Joh 20,1-13)
1Dan dän ieeschten Dach en de Wäakj kjeemen see, un jewesse aundre Frues met an, tiedich zemorjes nom Grauf un brochten de Kjriedarie, dee see reedjemoakt hauden. 2Oba aus see hankjeemen, wia de Steen aul vom Grauf wajch jerolt. 3Dan jinjen see nenn, oba fungen dän Harn Jesus sien Kjarpa #24,3 Eenje oole Schreften sajen fungen dän Kjarpa. nich. 4Un wäarent see noch nich soo rajcht wisten, waut doa väajinkj, kjeemen twee Mana en schlockwitte Kjleeda no an. 5Aus see dan veschrocken un sikj met däm Jesecht bat opp de Ieed buagen, säden dee to an: Wuarom sieekj jie dän Läwendjen mank de jestorwne? 6(Dee es nich hia; dee es oppjestonen.) #24,5 Eenje oole Schreften sajen nich Hee es nich hia. Hee es oppjestonen. Denkjt doaraun, waut hee to junt säd, aus hee noch en Galiläa wia, 7aus hee säd: De Menschensän mott de Sinda en de Henj jejäft un jekjriezicht woaren un aum dredden Dach oppstonen. #Luk 9,22 8Dan dochten see aun siene Wieed.
9Dan jinjen see trigj vom Grauf un vetalden daut de Alw un aul de aundre. 10Daut wieren Maria Magdalena un Johana un Maria, Jakobus siene Mutta, un noch aundre met an, dee de Apostel daut vetalden. #Luk 8,2-3 11See oba hilden daut fa ladje Wieed, onen Meenunk, un jleewden daut nich. 12(Oba Petrus stunt opp un rand nom Grauf, bekjt sikj doa nenn, un sach doa sest nuscht aus de Lienzeich Loakes ligjen. Hee jinkj doavon un wundad sikj, waut passieet wia.) #24,12 Eenje oole Schreften haben disen Varsch nich. #Joh 20,6-10
Jesus bejleit twee Jinja opp däm Wajch no Emmaus
13Nu horcht! Twee von an wieren jrod dän Dach opp däm Wajch no Emmaus, een Darp ojjefäa säwen Miel #24,13 Griechisch 60 Stadien ooda 160 Stadien von Jerusalem. 14Un see unjahilden sikj unjarenaunda von aul daut, waut passieet wia. 15Un wäarent see sikj unjahilden un äare Froagen hauden, nodad Jesus sikj an un jinkj met. 16Oba an worden de Uagen jehoolen, daut see am nich kjanen kunnen.
17Un hee säd to an: Von waut räd jie, aus jie toop delenjd däm Wajch jinjen? See stunden en äa Trua stell. 18Dan fruach am Kleopas, eena von an: Best du de eensja framda en Jerusalem, dee nich weet, waut doa dise Doag passieet es? 19Hee fruach am: Waut meenst du? See säden: Daut von Jesus von Nazaret, een Profeet ver Gott un Menschen, met Krauft hinja siene Wieed, uk siene Woakjen; #Mat 21,11 20un woo onse Huagepriestasch un bowaschte am hanjeewen, daut hee toom Doot veuadeelt un jekjriezicht wort. 21Wie oba hopten, daut hee dee wia, dee Israel friemoaken wudd. Un bowenenn, dit es aul de dredda Dach, no däm daut passieed. #Apost 1,6 22Un dan uk noch, haben eenje von onse Frues ons veschrocken, dee tiedich biem Grauf wieren, 23un sienen Kjarpa doa nich fungen. Dee kjeemen trigj un säden, see hauden Enjel jeseenen, dee doa jesajcht hauden, daut hee läwd. 24Un eenje von ons jinjen nom Grauf un fungen daut krakjt soo, aus de Frues jesajcht hauden; oba am hauden see nich jeseenen.
25Dan säd hee to an: Woo dieet junt stomphoatje Noaren daut soo lang, daut aula to jleewen, waut de Profeeten jerät haben! 26Must Christus dit nich aula lieden un dan en siene Harlichkjeit nenn gonen? 27Un hee funk von Moses un aul de Profeeten äare Schreften aun, un läd an daut ut, waut von am jesajcht wia. #5Mo 18,15; Psa 22,1-32; Jes 52,13–53,12
28Un see kjeemen dicht bat daut Darp wua see hanjinjen, un hee deed soo, aus wan hee wieda gonen wull. 29Oba see wieren drinjent am trigjtohoolen, un säden hee sull bie an bliewen, wiels daut wull Owent woaren, un doa wia aul nich väl vom Dach jebläwen. Dan jinkj hee nenn, bie an to bliewen. #Rech 19,9
30Un aus hee met an toop aum Desch saut, neem hee daut Broot, dankt doafäa, bruak daut un jeef an daut. #Luk 9,16; 22,19 31Dan jinjen an de Uagen op, un see kjanden am. Un hee veschwunk ver an. 32Dan säden see eena toom aundren: Brenden onse Hoaten nich en ons, #24,32 Eenje oole Schreften sajen nich en ons. aus hee opp däm Wajch met ons räd un ons de Schreft utläd? 33Un see stunden fuaz opp, un jinjen trigj no Jerusalem, un fungen de Alw un dee, dee met an toopwieren, 34dee doa säden: De Har es werkjlich oppjestonen un haft sikj Simon väajestalt. #1Kor 15,4-5 35Un see vetalden an, waut hinjawäajes passieet wia, un woo see am doaderch jekjant hauden, daut hee daut Broot jebroaken haud.
Jesus bejäajent siene Jinja en Jerusalem
(Mark 16,14-19; Joh 20,19-23; Apost 1,1-14; 1.Kor 15,5)
36Un aus see sikj noch doavon unjahilden, kjeem Jesus selfst medden mank an un säd: Fräd met junt!#24,36 Eenje oole Schreften sajen nich un säd: Fräd met junt! 37An wia sea angst un meenden, see sagen een Jeist. #Mat 14,26 38Un hee säd to an: Wuarom es junt Angst, un wuarom twiewlen jie? 39Kjikjt no miene Henj un miene Feet, un seet daut ekj dit selfst sie, wiels een Jeist haft nich Fleesch un Knoakes, soo aus jie seenen daut ekj hab. 40(Un aus hee daut säd, wees hee an siene Henj uk siene Feet.)#24,40 Eenje oole Schreften haben disen Varsch nich. #Joh 20,20 41Oba aus see dan fa Freid un Wunda nich jleewden, säd hee to an: Hab jie hia waut to äten? 42Un see läden am een Stekj jebrodne Fesch un Honnich väa. #Joh 21,5.10; Apost 10,41 43Un hee neem daut un eet ver an!
44Dan säd hee to an: Dit es waut ekj to junt säd, aus ekj noch bie junt wia, wiels daut mott aula soo romkomen aus en Moses sien Jesaz, en de Profeeten un en de Psalmen von mie jeschräwen steit. #Luk 18,31-33; 24,27 45Dan muak hee an daut Vestentnis op, daut see de Schreft vestunden, #Luk 9,45; Joh 12,16 46un hee säd to an: Soo steit jeschräwen, daut Christus lieden woat un aum dredden Dach vom Doot oppstonen; #Hos 6,2 47un daut en sienen Nomen von omkjieren un von Sindenvejäwunk jeprädicht woaren saul mank aule Velkja. Jie sellen en Jerusalem doamet aunfangen, #Apost 2,38; 17,30 48un met jun Zeichnis doarhinja stonen. 49Un ekj woa junt daut schekjen waut mien Voda junt vesproaken haft. Oba blieft en Jerusalem, bat de Krauft von bowen äwa junt komen woat. #Joh 15,26; 16,7; Apost 2,1-4
Jesus woat em Himmel nenn jenomen
(Mark 16,19-20; Apost 1,9-11)
50Hee neem an rut bat Betanien un hoof siene Henj opp un säajend an. 51Un wäarent hee an säajend, veschwunk hee von an un fua nopp nom Himmel. #24,51 Eenje oole Schreften haben nich un fua nopp nom Himmel. 52See oba bäden am aun, #24,52 Eenje oole Schreften sajen nich bäden am aun un. jinjen met groote Freid trigj no Jerusalem, 53un brochten äare Tiet em Tempel too un dankten un lowden Gott.

© 2003 Kindred Productions and United Bible Societies Association, Inc.

Learn More About De Bibel