Lukas 16
16
Daut Jlikjnis vom ojjerajchten Vewaulta
1Hee säd uk to siene Jinja: Doa wia emol een jewessa rikja Maun, dee een Vewaulta äwa sien goot haud. Am wort aunjemalt, daut dis Vewaulta sien goot vekwosen deed. 2Dan roopt hee sikj am han un säd: Waut es dit, daut ekj von die hia? Jeff emol Räakjnunk von diene Buakfierunk! Wiels du kaust nich lenja Vewaulta sennen. 3Dan säd de Vewaulta to sikj selfst: Waut saul ekj doonen? Mien Har nemt mie mien Vewaulta Aumt wajch. Growen kaun ekj nich, un ekj schäm mie to prachren. 4Ekj weet waut ekj doonen woa, daut see mie dan, wan ekj mien Vewaulta Aumt velia, en äare Hiesa oppnämen. 5Un hee roopt sikj aul sienen Harn siene Schildna un säd to dän ieeschten: Wooväl best du mienen Harn schuldich? 6Un dee säd: 100 Mot Eelj. Hee säd to am: Nemm dien Schultzadel, sat die schwind dol un schriew 50. 7Dan säd hee to een aundren: Un wooväl best du schuldich? Un dee säd: 100 Mot Weit. Un hee säd to am: Nemm dien Schultzadel un schriew 80.
8Doaropp lowd de Har dän ojjerajchten Vewaulta, daut hee kluak jehaundelt haud, wiels dise Weltmenschen #16,8 Eenje oole Schreften sajen wiels de Menschen en dise Tiet. sent em Omgank met äaresjlikjen kjlieekja aus de Lichtkjinja. #Efs 5,8-9 9Un ekj saj junt uk, brukt daut ojjerajchte Rikjtum, #16,9 Griechisch Mamon Frind to moaken, daut wan daut met eemol nich mea doa es, see junt dan en eewje Woninjen oppnämen. #Mat 6,20; 19,21; Luk 14,14
10Wäa em kjlienen tru es, es uk tru em grooten; un wäa em kjlienen nich tru es, es uk nich tru em grooten. #Luk 19,17 11Doawäajen, wan jie met daut ojjerajchte Rikjtum #16,11 Griechisch Mamon nich sent tru jewast, wäa woat junt dän woaren Rikjtum aunvetruen? 12Un wan jie met daut waut een aundren sient es, nich sent tru jewast, wäa woat junt dan jäwen waut junt es? 13Kjeen Kjnajcht kaun twee Haren deenen: hee woat eenen nich lieden kjennen un von dän aundren väl hoolen, ooda hee woat aun eenen henjen un dän aundren veachten. Jie kjennen nich Gott un daut Rikjtum #16,13 Griechisch Mamon tojlikj deenen. #Mat 6,24
Daut Jesaz, de Profeeten un daut Kjennichrikj
(Mat 11,12-13; 5,31-32; Mrk 10,11-12)
14De jeltjieeje Farisäa hauden dit aula jehieet un dreewen doawäajen äaren Spott äwa am. 15Un hee säd to an: Jie sent dee, dee sikj ver de Menschen rajchtfoadjen. Gott, oba, kjant june Hoaten, wiels waut von Menschen huach aunjeseenen woat, es en Gott siene Uagen een Aufschu. #Luk 18,9-14
16Daut Jesaz un de Profeeten worden jeprädicht bat Johanes kjeem. Un von dan aun es daut Gottesrikj jeprädicht worden, un aulemaun drenjt doa met Jewault nenn. #Mat 11,12-13 17Daut es oba leichta fa Himmel un Ieed to vegonen, aus daut een Sträakjskje vom Jesaz wajch felt. #Mat 5,18 18Wäa sikj von siene Fru scheeden deit un eene aundre friet, brakjt de Ehe; un wäa sikj dee friet, dee derch eene Scheedunk jegonen es, brakjt uk de Ehe. #Mat 5,32; 19,9
De rikja Maun un de oama Lazarus
19Doa wia een jewessa rikja Maun, dee sikj met Purpur un en feinsten Lienzeich kjleeden deed, un aule Dach en Freiden huachhäa läwd. 20Doa wia uk een oama Pracha Lazarus, voll Schwäaren, dee am ver de Däa jelajcht wort, 21un een velangen haud de Kjreemels to äten, dee däm rikjen Maun vom Desch follen; soogoa de Hunj kjeemen un lekjten am de Schwäaren rein. 22Eenen Dach storf de oama Maun un wort von de Enjel en Abraham siene Schoot jedroacht. De rikja Maun storf uk un wort begroft. 23Un aus hee en de Hal, en siene Kwol oppkjikjt, sach hee Abraham dort wiet auf, met Lazarus opp de Schoot. 24Dan roopt hee: Voda Abraham, hab Metleet met mie un schekj Lazarus, daut hee sikj de Finjaspetz em Wota dukt un mie de Tung kjeelt, wiels ekj woa en dise Flaumen jekjwält. 25Abraham oba säd: Sän, denkj doaraun, daut du dien goodet en diene Läwestiet jekjräajen hast, un Lazarus em Jäajendeel kjrieech beeset. Nu oba woat hee jetreest, un du hast diene Kwol. #Luk 6,24 26Un bowenenn es tweschen ons un junt een deepa Aufgrunt, soo daut et ommäajlich es fa dee von hia dort hantokomen un uk fa dee von dort, häa to komen. 27Dan säd hee: Voda, dan pracha ekj die, daut du am no mien Voda sien Hus schekjst, 28wiels ekj hab fief Breeda, daut hee an dit väastalt, daut see nich uk en disen Uat en de Kwol nenn komen. 29Abraham säd to am: Dee haben Moses un de Profeeten. Lot see an hieren. #2Tim 3,16 30Hee oba säd: Nä, Voda Abraham, wan von de Doodes wäa wudd hangonen, wudden dee omkjieren. 31Hee oba säd to am: Wan dee nich no Moses un de Profeeten horchen, wudden dee sikj uk nich beräden loten, wan eena von de Doodes oppstunt.
Currently Selected:
Lukas 16: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.