Hiob 8
8
Bildad von Schuach siene Räd: Wie weeten doch woo daut rant
1Dan säd Bildad von Schuach to Hiob:
2Woo lang woascht du soo räden,
un diene Wieed met soo väl Wint stormen loten?
3Meest du werkjlich daut Gott nich rajcht recht,
un daut dee, dee aule Macht haft, em Jerecht scheef es? #Hiob 34,10
4Wan diene Kjinja orrajcht jedonen haben,
dan haft hee an fa äare Sinden bestroft. #Hiob 1,4-5
5Oba wan du die bemieechst ver Gott to komen,
un du däm, dee aule Macht haft, aunbäden deist,
6wan du onen Schult un jerajcht best,
dan woat hee oppkomen un die halpen,
un die daut wada häastalen, waut die jehieet. #Psa 35,23
7Wan du uk von waut kjlienet must aunfangen,
woascht du lota sea goot auf sennen. #Hiob 42,10
8Forsch die daut no, woo daut en aundre Tieden jewast es;
horch no daut, waut de Vodasch jefungen haben.
9Wie sent noch mau von jistren hia,
un wie weeten soo goot aus nuscht;
ons Läwen veschleit soo väl aus een Schauten.
10Woaren dee die nuscht sajen un die nich waut lieren,
wan dee waut ut äa Jedajchnis väabrinjen?
11Kaun daut Schelp waussen, wua daut nich naut es,
ooda daut Rua, wua kjeen Wota steit?
12Un doch wan dee noch blieecht,
un nich aufjeschnäden es, vedrieecht dee,
un daut noch ea aus aundret Graus.
13Soo jeit daut met aul dee, woone Gott vejäten;
onen Gott velist eena aule Hopninj. #Hiob 11,20; Spr 10,28
14Dee veloten sikj opp eenen Twierem,
un saten äa vetruen opp Spandenjewäw.
15Wäa sikj opp soon Hus velat,
kaun nich stonen bliewen;
wan eena sikj aun daut länt,
woat daut nich hoolen.
16Dee sent aus Plaunten, dee schmock enne heete Sonn stonen,
un äare Auflaja derch däm gaunzen Goaden vespreeden.
17Dee äare Wartlen schlenjen rom de Steena
un hoolen sikj faust aum Steengrunt.
18Wan dee ut äare Städ jeräten woaren,
dan velicht de Städ an un sajcht:
Ekj hab junt noch nienich jeseenen.
19Soon Jlekj haben dee, oba dan
komen aundre un nämen äare Städen en.
20Jleew daut, Gott veschmitt däm oschuldjen nich,
hee helt däm gottloosen nich bie de Haunt.
21Hee woat die wada aum lachen moaken,
un du woascht fa Freid schrieen.
22Diene Fiend woaren sikj schämen motten,
un de gottloose woaren äare Städ velieren.
Currently Selected:
Hiob 8: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
