Hiob 6
6
Hiob sajcht Elifas woo schwoa am daut es
1Dan säd Hiob to Elifas:
2Wan daut doch to wäajen jinkj, woo orruich ekj sie,
un uk woo schwoa mie dit aula es!
3Daut wudd schwanda sennen aus daut Saunt aum Mäa,
doawäajen sull junt miene onbedochte Räd nich wundren.
4Gott, dee aule Macht haft,
haft mie met Feilen derchjeschoten;
un mien Jeist mott daut Jeft von de Feilen oppnämen;
daut, met waut Gott de Menschen enjsten deit,
es jäajen mie jerecht. #Psa 38,3
5Brelt een Äsel wan hee Graus haft?
Ooda schricht een Oss wan dee to fräten haft?
6Kaun eena schmaklooset Äten vedroagen onen Solt,
ooda schmakjt daut Eiwitt no irjent waut?
7Ekj kaun dee nich vedroagen.
Daut Äten moakt mie krank.
8Wan Gott mie doch jeef, no waut ekj froag,
wan hee doch tooleet, waut ekj mie wensch.
9Mucht hee mie doch dolschlonen;
mucht hee siene Haunt utstrakjen
un mien Läwen kort schnieden.
10Dan wudd ekj jlekjlich sennen,
uk en dise schlemme Weedoag,
wiels ekj hab de Wieed von däm
dee heilich es, nich veloagen.
11Waut vonne Krauft saul ekj nämen,
daut ekj dit uthoolen kaun?
Wuatoo es dit jekomen,
daut ekj met dit saul jeduldich sennen?
12Ekj sie doch nich soo stoakj aus een Steen,
un mien Fleesch es nich von Brons jemoakt.
13Ekj weet mie goanich mea to roden,
mie es aule Help wajchjenomen.
14Dee, dee däm näakjsten nich tru un jenstich sent,
haben nich Forcht fa däm, dee aule Macht haft.
15Ekj kaun mie nich dolla opp miene Frind veloten,
aus opp eenen Riefa, dee tweschenenn utdrieecht. #Psa 38,12
16Een stootje ranen see gaunz voll Ies un Schnee,
daut see wilt un moddich woaren,
17oba wan daut heet woat, dan veschwinjt daut;
em Somma es doa kjeen Wota jebläwen.
18De Karawanen kjrenjlen vom Wajch,
no daut, waut nuscht es, un komen doa om.
19De Karawanen von Tema kjikjen doa no Wota;
de Karawanen von Saba spezten sikj doaropp. #Hiob 1,15
20Oba äare Hopninj veschwunk,
un see kjrieejen nuscht, aus see bat doa wieren.
21Daut es waut jie fa mie jewast sent.
Nu daut jie seenen, woo schlemm daut met mie es,
trakj jie junt en Angst trigj.
22Hab ekj junt no eene Gow jefroacht,
ooda velangd ekj, daut jie wäm fa mie bekjeepen sullen?
23Säd ekj, jie sullen mie von eenen Fient raden,
ooda looskjeepen von dee, dee mie dolhilden?
24Wiest mie waut ekj orrajcht jedonen hab,
ekj woa stell sennen un horchen.
25Een weiset Wuat es väl wieet,
oba waut bewies jie met daut, waut jie väalajen?
26Well jie bewiesen daut miene Wieed nuscht meenen,
daut miene Räd aus ladja Wint von een vetwiewelden Mensch es?
27Junt wudd daut goodjenuach sennen,
fa een Weisenkjint een Loss to trakjen,
ooda dän Noba to veschachren.
28Kjikjt mie emol jlikj enne Uagen,
ekj woa junt nuscht väamoaken, waut nich soo es.
29Lot doch no; doot mie nich orrajcht beschuljen.
Lot emol no; waut ekj jesajcht hab, es soo.
30Hab ekj waut orrajcht jesajcht?
Weet mien Mul nich waut schlajcht es?
Currently Selected:
Hiob 6: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
