Hiob 10
10
Wuarom schient daut aus wan Gott met daut spält waut hee jemoakt haft?
1Mie es mien Läwen jäajenaun;
ekj woa frie doavon räden, woo schwoa daut es,
un miene Vetwiewlunk rutkomen loten.
2Ekj woa to Gott sajen: Doo mie nich vedaumen,
saj mie wuarom ekj aufjeprooft woa.
3Waut es die daut, daut du mie daut schwoa moakst,
daut du daut, waut du jemoakt hast, veachst,
un de gottloose äa Väahaben jelinjen latst?
4Sent diene Uagen soo aus onse,
daut du soo aus Menschen venemst? #1Sam 16,7
5Es diene Tiet soo aus onse,
läfst du mau soo lang aus Menschen?
6Ooda wuarom kjikjst du no miene Schult,
un sieekjst no miene Sinden,
7wan du weetst daut ekj nich schuldich sie,
un daut mie kjeena von diene Macht raden kaun?
8Du hast mie met diene Henj jemoakt
un hast mie mien Jeschekj jejäft,
woascht du die nu von mie wajchdreien un mie vedoawen? #Psa 139,14
9Denkj doaraun, daut du mie von Ieed jemoakt hast.
Woascht du mie nu wada loten Ieed woaren? #1Mo 2,7; 3,19; Hiob 33,6
10Hast du mie nich utjegoten, soo aus Malkj,
un loten saten, soo aus Kjees?
11Du hast daut Fleesch un de Hut äwa mie jetrocken,
un mie met Knoakes un Sänen toopjestekjt.
12Du jefst mie daut Läwen un diene truhoatje Leew,
un derch diene Oppsecht es mien Odem behoolen jebläwen. #Apost 17,28
13Oba en die, wists du waut du deetst;
ekj weet, daut du daut em Senn hautst.
14Wan ekj mie vesindjen wudd, wurscht du oppaussen,
un mie nich aus oschuldich aunseenen, wan ekj orrajcht deed.
15Wan ekj mie veschuljd, wia daut schlemm fa mie;
un wan ekj em rajchten wia,
kunn ekj mien Kopp nich huach hoolen,
wiels ekj beschämt, un met Älent äwaschwommen sie.
16Un wan ekj mien Kopp huach häw,
dan vefolchst du mie aus een Leiw;
un wiests diene groosoatje Macht jäajen mie. #Jes 38,13
17Du hast emma mea Zeijen jäajen mie,
un brinjst eenen jratren Oaja opp mie;
du stalst emma wada mea fresche Jäajna jäajen mie.
18Wuarom hast du mie loten to Welt komen?
Wan ekj doch jestorwen wia, daut mie kjeena jeseenen haud, #Hiob 3,11; Jer 20,14
19un daut soo met mie jegonen wia, aus met dee,
waut verem Tiet stoawen un veschoaft woaren.
20Mien Läwen es aul mau kort,
lot mie emol toch, daut ekj mie een bät veholen kaun,
21ea ekj wajch mott un nich mea trigj kom.
Ekj go no eene Städ wua aules dunkel un diesta es, #Hiob 7,10
22wua daut stockdiesta es un aules ut Raunt un Baunt es,
wua daut Licht gaunz diesta es.
Currently Selected:
Hiob 10: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
