Johanes 6
6
Jesus jeft 5.000 Menschen to äten
(Mat 14,13-21; Mrk 6,30-44; Luk 9,10-17)
1Boolt doaropp fua Jesus äwa dän See von Galiläa, dee uk See von Tiberias heet. 2Dan kjeemen am een grootet Schoof Menschen hinjaraun, wiels see dee Wundatieekjens sagen, dee hee aun de Kranke deed. 3Jesus jinkj opp een Boajch nopp un sad sikj doa met siene Jinja toop dol. 4De Juden äa Passafast wia dicht bie. #Joh 2,13; 11,55 5Dan kjikjt Jesus opp, un aus hee de väle Menschen no sikj komen sach, säd hee to Filippus: Wua kjenn wie Broot kjeepen, daut dise äten kjennen? 6Dit säd hee, om am opp de Proow to stalen. Hee selfst wist, waut hee doonen wudd. 7Filippus säd to am: Acht Moonatloon #6,7 Griechisch 200 Denarien wudd nich toorieekjen, fa jiedrem een Biet to kjeepen. 8Eena von de Jinja, Andreas, Simon Petrus sien Brooda, säd to am: 9Hia es een Jung, dee haft fief Joaschtbrood un twee Fesch. Oba waut es daut fa soo väl? 10Dan säd Jesus: Seet doano, daut de Menschen sikj dolsaten. Doa wia väl Graus opp dee Städ. Doa saden sikj ojjefäa 5.000 Maunslied dol. 11Un Jesus neem de Brood, un aus hee jedankt haud, deeld hee siene Jinja dee too, un de Jinja jeewen dee wieda aun dee, dee sikj doljesat hauden. Un soo uk de Fesch, soo väl aus see äten wullen. 12Un aus see ieescht saut wieren, säd hee to siene Jinja: Saumelt de äwajebläwne Brocken toop, daut nuscht vekjemt. 13Dan saumelden see dee toop, un daut jeef twalw Kjarw voll Brocken, dee von de fief Joaschtbrood wieren äwajebläwen.
14Aus de Menschen daut Wundatieekjen sagen, daut Jesus jedonen haud, säden see: Dit es woarhauftich dee Profeet, dee en de Welt komen sull! #5Mo 18,15 15Un aus Jesus enwort, daut de Menschen bat doa wieren, daut see am met Jewault wullen toom Kjennich moaken, veleet hee doa un jinkj fa sikj auleen opp eenen Boajch. #Joh 18,36
Jesus jeit äwa daut Wota
(Mat 14,22-33; Mrk 6,45-52)
16Aus daut ieescht Owent wort, jinjen siene Jinja nom See. 17See stieejen en eene Lomm un fuaren äwa no Kapernaum opptoo. Daut wia nu aul diesta jeworden, un Jesus wia noch nich no an jekomen. 18Dan kjeem een stoakja Storm opp, soo daut de Walen huachhäa rolden. 19Un aus see ojjefäa dree ooda vea Miel #6,19 Griechisch 25 - 30 Stadien jeroodelt hauden, sagen see Jesus opp däm Wota gonen un noda no de Lomm komen, un an wort angst. 20Oba hee säd to an: Fercht junt nich. Dit sie ekj! 21See neemen am jieren en de Lomm nenn, un wieren uk fuaz aum Launt, wua see han wullen.
Jesus es daut Broot, daut Läwen jeft
22De Menschen, dee aun de aundre Sied See jebläwen wieren, dochten aum näakjsten Dach doaraun, daut doa mau eene Lomm jewast wia, un daut Jesus doa nich met siene Jinja toop nenn jestäajen wia, un daut dee onen am jefoaren wieren. 23Doa wieren aundre Lommen von Tiberias, dee doa dicht bie launden deeden, wua de Menschen daut Broot jejäten hauden aus de Har doafäa jedankt haud. 24Aus de Lied utfungen, daut Jesus un siene Jinja nich doa wieren, stieejen see en de Lommen nenn un fuaren no Kapernaum, Jesus doa to sieekjen.
25Aus see am aun dee aundre Sied Mäa fungen, säden see to am: Liera, #6,25 ooda Rabi wanea best du häa jekomen? 26Jesus säd to an: Ekj saj junt gaunz bestemt: Jie sieekjen mie nich doawäajen, daut jie Wundatieekjens sagen, oba wiels jie von däm Broot jejäten un saut jeworden sent. 27Schauft junt Äten aun, daut nich vekomen deit. Schauft junt Äten aun, daut fa daut eewje Läwen blift. De Menschensän woat junt soont jäwen, wiels daut es wuatoo Gott de Voda mie jeschekjt haft. #Joh 5,36 28Dan säden see to am: Waut sell wie doonen, om Gott siene Woakjen to wirkjen? 29Jesus auntwuad un säd to an: Gott sien Woakj es dit, daut jie aun dän jleewen, dän hee jeschekjt haft. 30Dan säden see to am: Waut deist du fa een Wundatieekjen, daut wie daut seenen un aun die jleewen? Waut woascht du doonen? 31Onse Vodasch haben en de Wiltnis daut Mauna jejäten, soo aus jeschräwen steit: “Hee jeef an Broot vom Himmel to äten.” #2Mo 16,13-15; Psa 78,24 32Jesus säd to an: Ekj saj junt de Woarheit: Daut wia nich Moses, dee junt daut Broot vom Himmel jeef, oba mien Voda jeft junt daut woare Broot vom Himmel. 33Daut Broot von Gott es dee, dee vom Himmel raufkjemt, un de Welt daut Läwen jeft. 34Dan säden see to am: Har, jeff ons emma soon Broot. 35Jesus oba säd to an: Ekj sie daut Läwensbroot. Wäa no mie kjemt, däm woat nich mea hungren, un wäa aun mie jleeft, däm woat nich mea darschten. #Joh 4,14; 7,37 36Oba ekj hab junt jesajcht, jie haben mie jeseenen, oba jie jleewen doch nich aun mie. 37Aules, waut de Voda mie jeft, kjemt no mie, un wäa no mie kjemt, dän woa ekj nich rutsteeten. #Mat 11,28 38Ekj sie nich vom Himmel raufjekomen, mienen Wellen to doonen, oba däm sien Wellen to doonen, dee mie jeschekjt haft. #Joh 4,34 39Dit es däm Voda sien Wellen, dee mie jeschekjt haft, daut ekj kjeenen von dee velia, dee hee mie jejäft haft, oba daut ekj dee aum latsten Dach oppwakjen doo. #Joh 10,28-29; 17,12 40Mien Voda well, daut wäa dän Sän sitt un aun am jleeft, daut eewje Läwen haben saul, un dän woa ekj aum latsten Dach vom Doot oppwakjen. #Joh 5,29; 1,24
41Dan grumsaujden de Juden äwa am, wiels hee jesajcht haud: Ekj sie daut Broot, daut vom Himmel raufjekomen es. 42See säden: Es dis Jesus nich Josef sien Sän, un wie kjanen sienen Voda un siene Mutta? Woo kaun hee dan nu sajen: Ekj sie vom Himmel rauf jekomen? #Luk 4,22 43Jesus säd to an: Hieet opp to grumsaujen. 44Kjeena kaun no mie komen, wan de Voda, dee mie jeschekjt haft, am nich trakjen deit. Un ekj woa am aum latsten Dach oppwakjen. 45En de Profeeten steit jeschräwen: “See woaren aula von Gott jelieet sennen.” Wäa dän Voda hieet un von am lieet, kjemt no mie. #Jes 54,13 46Nich daut wäa dän Voda jeseenen haft, buta dee, dee vom Voda es, dee haft dän Voda jeseenen. #Joh 1,18 47Ekj saj junt de Woarheit: Wäa aun mie jleeft, haft eewjet Läwen. #Joh 3,16 48Ekj sie daut Läwensbroot. #Joh 6,35 49June Vodasch eeten Mauna en de Wiltnis, un sent jestorwen. #1Kor 10,3-5 50Dit es daut Broot, daut vom Himmel raufjekomen es. Wäa doavon at, brukt nich to stoawen. 51Ekj sie daut läwendje Broot, daut vom Himmel raufkjeem. Wäa von dit Broot äten woat, woat eewich läwen. Un daut Broot, daut ekj jäwen woa, es mien Fleesch, daut ekj doatoo jäw, daut de Welt läwen kaun. #Mrk 14,22
52Dan streeden de Juden sikj unjarenaunda un säden: Woo kaun disa ons sien Fleesch to äten jäwen? 53Jesus säd to an: Ekj saj junt de Woarheit: Wan jie dän Menschensän sien Fleesch nich äten, un sien Bloot nich drinkjen, hab jie kjeen Läwen en junt. 54Wäa mien Fleesch at, un mien Bloot drinkjt, haft eewjet Läwen, un ekj woa am aum latsten Dach oppwakjen. #Joh 15,4; 1Joh 3,24 55Mien Fleesch es de woare Noarunk, un mien Bloot es de woara Drunk. 56Wäa mien Fleesch at un mien Bloot drinkjt, blift en mie, un ekj en am. 57Soo aus de läwendja Voda mie jeschekjt haft, un ekj wäajen am läw, soo woat uk dee, dee mien Fleesch at, wäajen mie läwen. 58Dit es daut Broot, daut vom Himmel raufkjeem. Un daut es nich soo aus daut Broot, daut june Vodasch eeten. Dee sent jestorwen. Oba wäa dit Broot at, woat eewich läwen bliewen. 59Dit säd hee, aus hee en Kapernaum en äare School lieren deed.
Jesus siene Wieed meenen eewjet Läwen
60Väl von siene Jinja, aus see dit hieeden, säden: Daut sent hoade Wieed, wäa kaun daut vestonen? 61Aus Jesus enwort, daut siene Jinja doaräwa ontofräd wieren, fruach hee an: Stieet junt daut? 62Waut woa jie dan sajen, wan jie dän Menschensän woaren seenen trigj doahan foaren, wua hee ieescht wia? #Luk 24,50-51 63Daut Läwen kjrie wie derch dän Jeist. Daut Fleesch kaun doarenn nuscht halpen. De Wieed, dee ekj to junt räd, sent Jeist un sent Läwen. #Joh 3,6; 2Kor 3,6 64Oba mank junt sent soone, dee nich jleewen. Wiels Jesus wist von Aunfank aun, woont dee wieren, dee nich jleewden, un wäa am veroden wudd. 65Un hee säd: Doawäajen säd ekj to junt, daut kjeena no mie komen kaun, wan am daut nich von mienem Voda jejäft woat.
66Von don aun jinjen väl von siene Jinja trigj un jinjen nich mea met am. 67Dan säd Jesus to de Twalw: Well jie uk wajchgonen? 68Dan säd Simon Petrus to am: Har, no wäm sell wie gonen? Diene Wieed sent eewjet Läwen. 69Un wie sent uk bat doa jekomen, daut wie jleewen un weeten, daut du Christus, Gott sien heilja Sän, best. #Mat 16,16 70Jesus säd to an: Hab ekj nich junt Twalw jewält? Un eena von junt es een beesa Fient. 71Hee räd von Judas, Simon Iskariot sien Sän, eena von de Twalw, dee am veroden wudd.
Currently Selected:
Johanes 6: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.