Johanes 5
5
Jesus heelt eenen kranken bie Betesda
1Aus dit äwa wia, hauden de Juden een Fast, un Jesus jinkj uk no Jerusalem. #Joh 2,13 2Doa en Jerusalem es dicht biem Schopspuat een Wota, daut en Hebräisch Betesda #5,2 Eenje oole Schreften sajen Betsaida. jenant woat. Om daut Wota sent fief Schautendäakja. #Neh 3,1 3Hia lagen een Schoof kranke, blinje, jelämde un sikj vebrukt feelende Menschen, (dee doano luaden, daut daut Wota sikj bewäajen sull. 4Een Enjel kjeem emma wada no eene jewesse Tiet rauf un bewäajd daut Wota. Wäa dan daut ieeschte nenn stieech, wan sikj daut Wota bewäajd, wort jesunt von siene Krankheit.) #5,4 Eenje oole Schreften haben dit Poat nich. 5Nu wia doa een Maun, dee doa aul 38 Joa krank jewast wia. 6Aus Jesus dän doa ligjen sach un enwort, daut hee aul soo lang jeläajen haud, fruach hee am: West du jesunt woaren? 7De kranka Maun säd to am: Har, ekj hab kjeen Mensch, dee mie en daut Wota nenn halpt, wan daut Wota sikj bewäacht, un bat ekj kom, sticht emma een aundra ver mie nenn. 8Jesus säd to am: Sto opp, nemm dien Bad un go! 9De Maun wia plazlich jesunt, neem sien Bad un jinkj. Un daut passieed aum Sabat. 10Dan säden de Juden to däm, dee jesunt jeworden wia: Daut es vondoag Sabat, daut es nich rajcht, daut du dien Bad drajchst. #2Mo 20,10; Jer 17,21-22 11Hee säd to an: Dee, dee mie jesunt muak, säd to mie: Nemm dien Bad un go! 12Dan fruagen see am: Wäa es dee Maun, dee to die säd: Nemm dien Bad un go? 13Oba dee, dee jeheelt wia, wist nich, wäa daut wia, wiels doa wia soo väl Volkj aun däm Plauz, un Jesus haud sikj wajch jebrocht. 14Nohäa funk Jesus am em Tempel un säd to am: Kjikj emol, du best jesunt jeworden. Doo nich fresch sindjen, daut die nich waut oajret traft. #Joh 8,11 15De Mensch jinkj wajch un säd to de Juden, daut et Jesus wia, dee am jesunt jemoakt haud. 16Wiels Jesus dit aum Sabat jedonen haud, stunden de Juden am nom Läwen un vesochten, am doot to moaken. #Mat 12,14 17Jesus oba säd to an: Mien Voda oabeit bat vondoag, un soo oabeid ekj uk. #Joh 9,4 18Dan vesochten de Juden noch soo väl mea, am doot to moaken, nich bloos wiels hee dän Sabat jebroaken haud, oba wiels hee säd, daut Gott sien Voda wia, un sikj selfst Gott jlikj stald. #Joh 7,30; 10,33
Däm Sän siene Volmacht
19Dan säd Jesus to an soo: Ekj saj junt opprechtich: De Sän kaun ut sikj selfst nuscht doonen. Hee kaun bloos daut doonen, waut hee sienen Voda doonen sitt. Waut de Voda deit, deit de Sän uk. #Joh 3,11.32 20De Voda es däm Sän goot un wiest am aules, waut hee deit. Un hee woat am noch jratre Woakjen wiesen, soo daut jie junt wundren woaren. #Joh 3,35 21Wiels soo aus de Voda de Doodes oppwakjt un an Läwen jeft, jrod soo jeft de Sän uk daut Läwen, wäm hee well. 22De Voda recht kjeenen; oba haft daut Rechten aula däm Sän äwajäft. #(22 un 23) Dan 7,13-14; Apost 10,42 23See sellen aula dän Sän ieren, soo aus see dän Voda ieren. Wäa dän Sän nich ieet, ieet uk nich dän Voda, dee am jeschekjt haft. 24Ekj saj junt de Woarheit: Wäa mien Wuat hieet un däm jleeft, dee mie jeschekjt haft, haft daut eewje Läwen un kjemt nich en daut Jerecht, oba es vom Doot toom Läwen jekomen. #Joh 3,16.18 25Ekj saj junt de Woarheit: Dee Tiet kjemt un es aul hia, daut de Doodes de Stemm von Gott sienem Sän hieren woaren, un dee, woone daut hieren, woaren läwen. #Efs 2,5-6 26Soo aus de Voda Läwen en sikj selfst haft, haft hee däm Sän daut uk jejäft, Läwen en sikj selfst to haben. #Joh 1,1-4 27Un hee haft däm Sän uk daut Rajcht jejäft, to rechten, wiels hee de Menschensän es. #Dan 7,13-14 28Lot junt daut nich wundren. De Tiet kjemt, daut aul dee, dee en de Jräwa ligjen, siene Stemm hieren woaren. 29See woaren dan verendach komen. Dee doa goodet jedonen haben, stonen opp toom Läwen, un dee, dee bie äare beese Woakjen jebläwen sent, stonen opp toom jerecht woaren. #Dan 12,2; Mat 25,46; 2Kor 5,10
30Ekj kaun ut mie selfst nuscht doonen. Ekj recht doano aus ekj hia, un mien Rechten es rajcht, wiels ekj nich mienen ieejnen Wellen sieekj, oba däm Voda sienen Wellen, dee mie jeschekjt haft. #Joh 6,38
Zeijen fa Jesus
31Wan ekj fa mie selfst zeijen wudd, es waut ekj saj nich woa. 32Doa es een aundra, dee fa mie zeijen deit, un ekj weet, waut hee von mie zeijen deit, es Woarheit. 33Jie schekjten no Johanes, un dee stunt en fa de Woarheit. #Joh 1,19-34 34Ekj oba bruck kjeen Zeichnis von Menschen. Ekj saj dit doawäajen, daut jie kjennen seelich woaren. 35Johanes wia eene brennende, schienende Laump. Un jie wieren wellich, eene tietlank en sienem Licht froo to sennen. 36Ekj oba hab een jratret Zeichnis aus Johanes haud, wiels daut Woakj, daut de Voda mie oppjelajcht haud to verechten, un daut ekj uk doo, rät fa mie, daut de Voda mie jeschekjt haft. #Joh 3,2; 10,25.38 37Un de Voda, dee mie jeschekjt haft, haft selfst fa mie jerät. Jie haben siene Stemm niemols jehieet un siene Jestault niemols jeseenen. #Mat 3,17 38Un sien Wuat es bie junt uk nich tus, wiels jie jleewen nich aun dän, dän hee jeschekjt haft. 39Jie sieekjen en de Schreft, wiels jie meenen, doabennen daut eewje Läwen to haben. Un de Schreft es daut jrod, dee von mie rät. #Luk 24,27.44; 2Tim 3,15-17 40Oba jie wellen nich no mie komen, daut jie daut eewje Läwen haben kunnen.
41Ekj sieekj nich von Menschen jeieet to woaren. 42Oba ekj kjan junt un weet, daut jie Gott siene Leew nich em Hoat haben. 43Ekj kjeem en mien Voda sienen Nomen, un jie neemen mie nich opp. Oba wan een aundra en sienem ieejnen Nomen kjemt, dän woa jie oppnämen. #Mat 24,5 44Woo kjenn jie jleewen, wan jie de Iea eena vom aundren nämen, un dee Iea nich sieekjen, dee von däm eensjen Gott kjemt? #Joh 12,42-43; 1Tess 2,6
45Denkjt nich, daut ekj junt biem Voda vekloagen woa. Doa es eena, dee junt vekloacht, un daut es Moses, opp dän jie hopen. #5Mo 31,24-27 46Wan jie Moses jleewden, wudd jie mie uk jleewen, wiels hee schreef von mie. #1Mo 3,15; 49,10; 5Mo 18,15 47Oba wan jie siene Schreften nich jleewen, woo woa jie dan miene Wieed jleewen? #Luk 16,31
Currently Selected:
Johanes 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.