1. Mose 6
6
Gott sat Jrensen
1Aus de Menschen sikj oppe Ieed vemieeden un see Dajchta hauden, 2neemen de Säns von de Jetta soone Mejales von mank de Menschen aus an schmock leeten, un befrieden sikj met dee. #Hiob 1,6; 2Pet 2,4; Jud 1,6 3Un de Har säd: Ekj woa däm Mensch nich opp emma läwen loten, hee es doch Fleesch. Ekj woa am 120 Joa läwen loten. 4To dee Tiet, un uk lota, wieren doa Nefiliten oppe Ieed, dee doa Nokomen wieren von de Säns von de Jetta un Frumenschen. Lang trigj wieren daut stoakje un huach aunjeseene Mana. #Hes 32,27
5De Har sach daut de Menschen sea bees oppe Ieed wieren un daut äare Jedanken bloos dän tietäwa schlajchte Jedanken wieren. #1Mo 8,21 6Un däm Harn deed daut leet daut hee haud Menschen oppe Ieed jemoakt. Am wia daut sea schod. #1Sam 15,11.35; Jer 18,7-10 7Un hee säd: Ekj woa dise Menschen, waut ekj jemoakt hab von oppe Ieed utrodden. Ekj woa Menschen un aule Tieren un Väajel utrodden, soo schod es mie daut, daut ekj an jemoakt hab. #4Mo 23,19; Reema 3,3-4; 2Tim 2,13 8Oba Noah wia goot aunjeseenen biem Harn. #Heb 11,7
De Jeschicht von Noah
9Dit es de Jeschicht von Noah. Noah wia een jerajchta Maun; kjeena kunn am en siene Tiet beschuljen. Noah läwd en Jemeenschoft met Gott. #1Mo 5,22 10Noah haud dree Säns. Dee heeten Sem, Ham, un Jafet. 11Un Gott sach woo bees de Menschheit wia, un daut de Ieed voll von orrajchtet un onbandjet Läwen wia. 12Hee sach daut aule Menschen oppe Ieed schaundhauft läwden. #Psa 14,2-3 13Un Gott säd to Noah: Ekj hab bie mie beschloten met aule Menschen un Tieren een Enj to moaken. De gaunze Ieed es voll von äa onbandjet Läwen. Nu woa ekj an ombrinjen un een Enj met de Ieed moaken. #Amos 8,2 14Du saust nu een grootet Schepp von goodet Holt buen. Doa sellen miere Stowen bennen sennen, un von buten un von bennen saust du daut met Pekj beschmäaren. 15Du saust daut Schepp 150 Meeta lank, 25 Meeta breet, un 15 Meeta huach moaken. 16Moak een Dak opp daut Schepp, een haulwet Meeta hecha aus de Sieden. Moak eene Däa aun de Sied, un bu doa dree Fluaren nenn. 17Doo dit, wiels ekj eene Äwaschwamunk woa komen loten. Dee woat aule Menschen un Tieren met läwendjen Odem oppe Ieed un unjarem Himmel ombrinjen. 18Met die, oba, woa ekj een Bunt moaken un die en daut Schepp nenn nämen. Ekj woa die un diene Säns, un diene Fru, un diene Säns äare Frues en daut Schepp nenn nämen. #1Mo 9,9 19Un du saust von jieda Sort Tieren, emma twee en daut Schepp nenn brinjen. Soo woaren dee aum Läwen bliewen. Doa sellen emma een hee en eene see von jieda Sort sennen. 20Twee von jieda Sort Väajel, twee von jieda Sort Tieren, un twee von jieda Kruptia sellen no die komen, daut du dee aum Läwen helst. 21Nemm uk von jieda Sort Fooda un spikja daut opp, daut doa woat to äten sennen fa an un fa die. 22Un Noah deed aules waut de Har am väajesajcht haud. #Heb 11,7
Currently Selected:
1. Mose 6: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.