1. Mose 3
3
De Onjehuarsom em Goaden Eden
1De Schlang wia lestja aus irjent een aundret willet Tia, waut Gott de Har jemoakt haud. Un dee säd to de Fru: Haft Gott werkjlich jesajcht, daut jie von irjent een Boom nich äten sellen? #Opb 12,9; 20,2 2Un de Fru säd to de Schlang: Wie derwen von de Frucht von de Beem em Goaden äten, #1Mo 2,16 3oba Gott säd: Jie sellen nich Frucht von däm Boom äten, dee medden em Goaden steit. Jie sellen doa nich von äten un dän nich emol aunschieren, soo daut jie nich stoawen. #1Mo 2,17 4Oba de Schlang säd to de Fru: Jie woaren goanich stoawen. #Joh 8,44 5Gott weet, daut soo boolt aus jie doavon äten, woaren june Uagen op sennen, un jie woaren soo aus Gott sennen, un weeten, waut goot un waut schlajcht es.
6Un de Fru sach, daut de Frucht goot leet, un daut dee goot to äten wia, un daut dee eenem kunn waut Vestentnis jäwen. Dan neem see von de Frucht un eet, un jeef äaren Maun uk, un dee eet. #1Tim 2,14; Jak 1,14-15 7Dan vestunden see aulebeid un sagen, daut see noaktich wieren. Un see muaken sikj waut von Fiejenbläda toom sikj bedakjen. #1Mo 2,25 8Aus de Dach aunfunk auftokjeelen, hieeden see, daut de Har Gott em Goaden jinkj. Un de Maun un de Fru vestuaken sikj von däm Harn Gott mank de Beem em Goaden. #Psa 139,7-10; Jer 23,24 9Un Gott de Har roopt däm Maun un säd: Wua best du? 10Un de Maun säd: Ekj hieed die em Goaden un ekj haud Angst, wiels ekj noaktich sie, un dan vestuak ekj mie. 11Un Gott de Har säd: Wäa säd die daut du noaktich wieescht? Hast du von däm Boom jejäten, von däm ekj säd, daut du nich äten sust? 12Un de Maun säd: De Fru, dee du mie jeefst, jeef mie von de Frucht von däm Boom, un ekj eet. 13Un Gott de Har säd to de Fru: Waut hast du bloos jedonen? Un see säd: De Schlang muak mie waut väa, un ekj eet. #2Kor 11,3
14Un Gott de Har säd to de Schlang:
Wiels du dit jedonen hast,
woa ekj die bestrofen.
Von aule Tieren woascht du daut eensje sennen,
dee oppem Buck krupen mott,
un du woascht läweslank motten Ieed fräten.
15Du un de Fru woaren junt fientlich sennen,
un june Nokomen woaren sikj nich lieden kjennen.
Hee woat die dien Kopp vewunden,
un du woascht am de Hak vewunden. #Opb 12,4-5.15-17
16Un to de Fru säd hee:
Ekj woa die väl mea Weedoag jäwen
wan du schwanga best,
un du woascht bie de Jeburt groote Weedoag haben.
Doch woascht du een velangen no dienen Maun haben,
un hee woat äwa die daut Wuat fieren. #Efs 5,22-23; 1Tim 2,12
17Un to däm Maun säd hee:
Wiels du no diene Fru äa Wuat jehorcht hast,
un hast von däm Boom jejäten,
von woonen ekj bestalt haud,
daut du doa nich von äten sust,
woa ekj mien Wuat jäwen,
daut de Ieed nich soo väl droagen woat.
Dien gaunzet Läwen woascht du schaufen motten,
daut doa woat jenuach to äten sennen fa junt. #1Mo 8,21-22; Hiob 31,38-39
18Doa woaren Distlen un Onkrut opp daut Launt sennen,
un du woascht von de Plaunten oppe Stap äten.
19Du woascht väl schweeten motten, om jenuach Äten to trakjen,
un schlieslich woascht du stoawen un wada to Ieed woaren.
Du best von de Ieed jenomen,
un du woascht wada Ieed woaren. #1Mo 2,7; Psa 90,10; 104,29; Liera 12,7; 2Tess 3,10
20Un Adam jeef siene Fru dän Nomen Eva, wiels see de Mutta fa aulet Menschenläwen es. 21Un Gott de Har muak Kjleeda fa Adam un siene Fru von Ladasch, un kjleed an doamet. 22Un Gott de Har säd: Kjikj emol, de Mensch weet nu waut, waut wie von goodet un schlajchtet weeten. Hee sull nich noch met eemol von de Frucht von däm Boom, dee Läwen jeft, nämen un äten, un opp emma läwen. 23Doawäajen schekjt Gott de Har am ut däm Eden Goaden rut, daut hee sull de Ieed beoabeiden, von woone hee jekomen wia. #1Mo 2,15 24Hee schekjt däm Mensch ut däm Goaden rut, un stald doa aun de oostne Kaunt Cheruben han, met Schwieed, dee doa flaumden un en aule Rechtungen dreiden. Dee wieren doa toom dän Wajch no däm Boom, dee Läwen jeft, too to stalen.
Currently Selected:
1. Mose 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.