2. Timotäus 1
1
Gruss
1Paulus, Christus Jesus sien Apostel, derch Gott sienen Wellen, jeschekjt daut Läwen bekaunt to moaken, daut Christus Jesus brinjen deit, 2no Timotäus, mienen leewen Sän: Mucht Gott de Voda un ons Har Christus Jesus die Jnod, Metleet un Fräd schenkjen!
De Apostel sienen Dank fa Timotäus
3Ekj dank Gott, dän ekj met een reinet Jewessen deen, soo aus miene Vodasch ver mie deeden. Ekj dank am uk Dach un Nacht en miene Jebäda, wan ekj aun die denkj. #Apost 23,1; 24,16; Flp 3,5 4Un wan ekj aun diene Tronen denkj, sticht en mie daut velangen opp, die to seenen, wiels daut wudd fa mie eene Freid sennen, #2Tim 4,9 5wiels ekj denkj aun dän woaren Gloowen, dän ieeschtens aul diene Grootmutta Lois un uk diene Mutta Eunike hauden, un dän du secha uk hast. #Apost 16,1-3
Ermonunk tru to bliewen
6Un dit es wuarom ekj die ermon, dee Gow aum Läwen to hoolen, dee Gott die jeef aus ekj die miene Henj oppläd, #1Tim 4,14 7wiels Gott jeef ons nich eenen Jeist dee ons forchtsom muak, oba dän Jeist von Leew un Krauft, un daut wie ons selfst beharschen kjennen. #Reema 8,15 8Doawäajen schäm die nich met dien Zeichnis fa onsen Harn, un schäm die uk nich met mie, wiels ekj sienthaulwen ensetten mott. Well wie toop fa daut Evangelium lieden, doano aus Gott ons Krauft jeft. #Reema 1,16; 1Pet 4,16 9Hee haft ons jerat un beroopen sien Volkj to sennen, nich wäajen onse Woakjen, oba wiels hee sikj daut en siene Jnod, dee ons en Christus Jesus jeschonken es, von Eewichkjeit häa soo väajenomen haud. #Tit 3,5 10Dit es nu doaderch verendach jekomen, daut ons Heilant Christus Jesus en de Welt jekomen es. Dee haft dän Doot de Macht jenomen, un Läwen un Onstoaflichkjeit aun daut Licht jebrocht, derch daut Evangelium, #1Kor 15,55.57; Heb 2,14 11fa daut ekj aus Prädja, Liera un Apostel aunjestalt sie. #1Tim 2,7 12Un dit es de Uasoak wuarom ekj dit lieden doo. Oba ekj schäm mie doamet nich, wiels ekj weet aun wäm ekj jejleeft hab, un ekj sie mie secha, daut hee mie daut, waut ekj am aunvetrut hab, #1,12 Eenje oole Schreften sajen waut hee mie aunvetrut haft. bat aun janen Dach bewoaren kaun. 13Hool die aun de heelsome Wieed, dee du von mie jehieet hast. Dee kjennen die en dän Gloowen un de Leew, dee en Christus Jesus sent, aus Väabilt deenen. #1Tim 6,3; Tit 2,1 14Bewoa de heelsome Wieed, dee die aunvetrut sent, derch dän Heiljen Jeist siene Krauft, dee en ons wont. #1Tim 6,20
Schlajchte un goode Erfoarungen met Metoabeida
15Du weetst, daut dee en Asien mie aula veloten haben, un mank dee sent uk Fiegelus un Hermogenes. #2Tim 4,16 16Mucht Gott Onesiforus un sien Hus väl Jnod schenkjen. Dee haft mie foaken oppjefrescht un schämd sikj nich met miene Kjäden, #2Tim 4,19 17wiels aus hee en Room wia, socht hee sea iewrich, bat hee mie funk. 18Mucht de Har am daut schenkjen, aun janen Dach väl Metleet biem Harn to finjen. Un du weetst sea goot waut hee en Efesus fa Deensten jedonen haft.
Currently Selected:
2. Timotäus 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.