2. Kjennichs 1
1
Elia un de Kjennich Ahasja en Israel
1No Ahab sien Doot, muaken de Moabita sikj loos von Israel. #2Sam 8,2; 2Kjen 3,4-27 2Nu kjeem daut emol soo rom aus de Kjennich Ahasja opp sien Paulaust oppem Dak wia, daut hee von doa rauf foll un eene Tiet must besorcht woaren. Dan schekjt hee Deena no Ekron, de Filista Staut, daut see sullen dän äaren Aufgott, Baal Sebub, froagen auf hee von dise Krankheit wudd jesunt woaren. #1Kjen 22,52-54 3Oba däm Harn sien Enjel kjeem no Elia von Tischbe un säd to am: Moak die schwind reed un go däm Kjennich von Samaria siene Deena entjäajen. Un saj to an: Es doa kjeen Gott en Israel, daut du no Baal Sebub, dän Aufgott von Ekron, no Rot jeist? #Jes 8,19 4Dit es waut de Har to am sajcht: Du woascht nich wada ut daut Bad, opp woont du lichst, rutkomen. Du woascht stoawen. Un Elia jinkj un deed daut. 5Un aus de Deena trigj no däm Kjennich kjeemen, säd hee to an: Wuarom sent jie trigj? 6Un see säden to am: Ons kjeem een Maun entjäajen un säd daut wie sullen trigj no däm Kjennich gonen un am sajen, daut de Har sajcht: Es doa kjeen Gott en Israel, ooda wuarom schekjst du no Baal Sebub, dän ekronschen Aufgott, om no Rot to froagen? Du woascht doawäajen nich wada ut daut Bad rutkomen, opp woont du lichst. Du woascht stoawen. 7Un hee säd to an: Waut fa een Maun wia daut, dee junt bejäajend un junt dit säd? 8Un see säden: Hee haud lange Hoa, un haud een ladanen Gort rome Lint. Un de Kjennich säd: Dan es daut Elia von Tischbe jewast. #Rech 16,17; Mat 3,4
9Dan schekjt de Kjennich eenen Kapitän met siene 50 Mana no Elia. Un aus see no Elia kjeemen, saut hee opp eenen Boajch. Un de Kapitän säd to Elia: Du Gottesmaun. De Kjennich velangt daut du rauf kjemst. 10Un Elia säd to dän Kapitän äwa de 50 Mana: Wan ekj een Gottesmaun sie, dan saul Fia vom Himmel faulen un die un diene 50 Mana vebrennen. Un doa foll Fia vom Himmel un vebrend däm Kapitän un siene 50 Mana. #Luk 9,54; Opb 11,5 11Dan schekjt de Kjennich noch wada eenen aundren Kapitän met 50 Mana no am. Dee jinkj no Elia un säd to am: Du Gottesmaun. De Kjennich bestalt aun die, du saust fuaz rauf komen. 12Un Elia säd: Wan ekj een Gottesmaun sie, dan saul Fia vom Himmel faulen un die un diene 50 Mana vebrennen. Un doa foll een Fia von Gott vom Himmel un vebrend däm Kapitän un siene 50 Mana. 13Dan schekjt de Kjennich noch emol, nu toom dreddemol, eenen Kapitän äwa siene 50 Mana. Aus hee no Elia nopp kjeem, foll hee opp Kjneees ver Elia dol un prachad am: Du Gottesmaun. Ekj bedd die daut du mien Läwen un daut Läwen von dise 50 Mana, dee diene Deena sent, waut räakjnen wurscht. 14Wie weeten daut Fia vom Himmel opp de ieeschte twee Kapitäns un äare 50 Mana jefollen es un dee vebrent haft. Bitscheen, tal mien Läwen waut wieet ver die. 15Dan säd däm Harn sien Enjel to Elia: Go rauf met am un enjst die nich fa am. Un Elia stunt opp un jinkj rauf no däm Kjennich 16un säd to am: Dit es waut de Har sajcht: Wiels du Deena no dän ekronschen Aufgott Baal Sebub schekjst om von däm to froagen, aus wan doa kjeen Gott en Israel wia däm eena froagen kunn, woascht du nich wada von dit Bad, opp woont du lichst, oppstonen. Du woascht stoawen.
17Un daut wort krakjt soo aus däm Harn sien Wuat, daut Elia jerät haud, jesajcht haud. Ahasja storf. Un wiels Ahasja kjeenen Sän haud, wort sien Brooda Joram Kjennich en siene Städ. Dit wia en daut tweede Joa aus Joram, Joschafat sien Sän, Kjennich en Juda wia. #2Kjen 3,1 18Un waut noch mea äwa Ahasja to sajen es un waut hee jedonen haft, daut es aules en daut Buak von de Jeschicht von de Kjennichs en Israel jeschräwen.
Currently Selected:
2. Kjennichs 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.