1. Korinta 1
1
Gruss toom Aunfank
1Paulus, derch Gott sienen Wellen aus Christus Jesus sien Apostel aunjestalt, un ons Brooda Sostenes schriewen disen Breef 2aun Gott siene Jemeent en Korint, aun aul dee, dee derch Christus Jesus jeheilicht un aunjestalt sent, Gott siene heilje to sennen. De Breef es uk aun aule Menschen aulawäajen, dee dän Harn Jesus Christus aunroopen, ons un äa Har. #Apost 9,14; 18,1-17; 1Kor 6,11
3Mucht Jnod un Fräd von Gott onsem Voda un däm Harn Jesus Christus met junt sennen!
Dank fa daut waut de Heilja Jeist jeft
4Ekj dank mienem Gott #1,4 Eenje oole Schreften sajen Ekj dank Gott. emma met junt fa de Jnod, dee hee junt derch Christus Jesus jejäft haft. 5Derch Jesus Christus sent jie en aules rikja jeworden, en aules waut jie von am lieren un aules waut jie von am vestonen. 6Waut junt von Christus jesajcht worden es, haft sikj en junt gaunz enjewartelt. 7Soo fält junt daut aun kjeene Gowen, dee de Heilja Jeist jeft, nu daut jie doano luaren, daut ons Har Jesus Christus wadakomen saul. #Tit 2,13; 2Pet 3,13-14 8Hee woat junt uk bat aum Enj staunthauft hoolen, daut jie aun däm Harn Jesus Christus sienen Dach nich to beschuljen sent. #Flp 1,6; 1Tess 3,13 9Gott es tru, dee junt doatoo jewält haft, met sienem Sän Jesus Christus onsen Harn Jemeenschoft to haben. #1Tess 5,24
Spoolungen enne Jemeent
10Breeda, ekj roop junt opp, em Nomen von onsem Harn Jesus Christus, siet junt unjarenaunda eenich, un lot daut nich to Spoolungen mank junt komen. Hoolt toop, daut jie eenen Senn un eene Meenunk haben. #Reema 15,5; 1Kor 11,18; Flp 2,2 11Mie es derch Cloe äare Lied jesajcht worden, leewe Breeda, daut jie junt unjarenaunda zanken. 12Waut ekj meen es dit, daut mank junt eena sajcht: Ekj hool daut met Paulus, dee aundra: Ekj hool daut met Apollos, dee aundra: Ekj hool daut met Kefas (Petrus), un de näakjsta: Ekj hool daut met Christus. #Joh 1,42; Apost 18,24-27; 1Kor 3,4 13Woo es daut: Es Christus oppjedeelt? Wort Paulus fa junt jekjriezicht? Ooda word jie en Paulus sienen Nomen jedeept? 14Ekj dank Gott, #1,14 Eenje oole Schreften sajen Ekj frei mie, daut ekj kjeenen von junt jedeept hab buta Krispus un Gajus, #Apost 18,8; Reema 16,23 15daut kjeena sajen kaun, see wieren en mienen Nomen jedeept. 16Doch jo, ekj hab uk Stefanas un siene Famielje jedeept. Sest weet ekj von kjeenem, dän ekj jedeept hab. #1Kor 16,15
De Bootschoft vom Kjriez
17Christus haft mie nich jeschekjt to deepen, oba daut Evangelium to prädjen. Un daut saul ekj nich met kluake Wieed doonen, daut daut Kjriez von Christus nich siene Krauft velist.
Christus, Krauft un Weisheit von Gott
18Fa dee, dee veloaren gonen, es daut Wuat vom Kjriez soo aus Onsenn. Oba fa ons, dee wie seelich woaren, es daut eene Gotteskrauft. #Reema 1,16; 2Kor 4,3 19Doa steit jeschräwen:
“Ekj woa de kluake äare Kluakheit to nuscht moaken,
un de vestendje äaren Vestaunt auntsied stalen.” #Jes 29,14
20Wua sent de kluake? Wua sent de jelieede vonne Schreft? Wua sent de weltlich weise en dise Tiet? Haft Gott nich de Weisheit von de Welt to Onsenn jemoakt? #Mat 11,25; Reema 1,22 21De Weisheit von Gott wia aulawäajen enne Welt, oba de Welt en äare Weisheit sach nich en wäa Gott wia. Soo jefoll Gott daut, derch de onsennje Prädicht dee to raden, dee doaraun jleewden. 22De Juden froagen no Tieekjens, un de Griechen sieekjen no Weisheit. #Mat 12,38; Joh 4,48; Apost 17,18-21 23Wie oba prädjen dän jekjriezichten Christus, aun dän de Juden sikj steeten un dän de Griechen fa Onsenn hoolen. #Apost 17,32; Gal 5,11; 1Kor 2,14 24Oba fa dee, dee Gott fa sikj jewält haft, beid Juden uk Griechen, es Christus Gott siene Krauft un Gott siene Weisheit. #Kol 2,3 25Gott es doarenn, waut Menschen aus Onsenn bie am aunseenen, weisa aus de Menschen sent, un waut see bie Gott aus Schwakheit seenen, es stoakja aus Menschenkrauft.
No woone Mot Gott Menschen utwält
26Breeda, denkjt doaräwa no, woo daut wia aus Gott junt wälen deed. Doa wieren nich väl weise no menschliche Mot, nich väl sea stoakje, nich väle, dee en de Jesalschoft huach stunden. #Joh 7,48; Jak 2,1-5 27Oba waut de Welt aus Onsenn aunsach, wäld Gott, om de weise toschaund to moaken. Gott haft daut schwake en dise Welt jewält, om waut stoakj es toschaund to moaken. 28Un waut de Welt veachten deit un fa nuscht helt, un waut nuscht wieet es, haft Gott jewält, om daut to nuscht to moaken, waut en de Welt huach steit. 29Soo kaun kjeena sikj ver Gott waut enbillen. #Reema 3,27; Efs 2,9 30Derch daut waut Gott jedonen haft, sent jie en Christus Jesus. Gott haft daut jemoakt, daut wie derch Jesus Christus en ons weis un jerajcht un heilich un jerat sent. #Jer 23,5-6; Mat 20,28; Joh 17,19; 2Kor 5,21 31Daut es soo aus jeschräwen steit: “Wäa sikj puchen well, saul sikj met sienen Harn puchen!” #Jer 9,22-23; 2Kor 10,17
Currently Selected:
1. Korinta 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.