1. Samuel 24
24
David ieet Gott sienen Jesaulwden
1Un David jinkj von doa un bleef en de Heelen bie En Gedi. #Jos 15,62 2Aus Saul trigj kjeem von däm Kaumf met de Filista, säden see am, daut David en de Wiltnis bie En Gedi wia. 3Un Saul neem 3.000 jewälde Mana von ut gaunz Israel, un jinkj David sieekjen bie de Wille Kosen Boaj. 4Un hee kjeem no eene Heel bie de Schophocks. Un Saul jinkj doa nenn sikj ladich to moaken. Oba David un siene Mana wieren wieda bennen en de selwje Heel. #Psa 142,1 5Un David siene Mana säden to am: Dit es de Dach von woonen de Har säd: Ekj woa die diene Fiend en diene Macht jäwen, daut du met dee doonen kaust waut du west. Dan kroop David sea stell doahan un schneet eene Akj von Saul sien Rock auf. 6Oba dan baudad David daut Jewessen, daut hee Saul sien Rock aufjeschnäden haud. 7Hee säd to siene Mana: Mucht de Har mie doavon wajchhoolen, daut ekj mienen Harn, däm Harn sien Jesaulwden, soont aundoo. Ekj sull nienich miene Haunt jäajen däm Harn sienen Jesaulwden brucken. #2Sam 1,14 8Un soo beräd David siene Mana, daut see Saul nich aunjriepen wudden. Un aus Saul foadich wia, jinkj hee ut de Heel un jinkj sienen Wajch wieda. 9Dan jinkj David ut de Heel rut un roopt Saul: Mien Har un Kjennich! Un aus Saul sikj omdreid, sach hee David met sien Jesecht bat opp de Ieed jekjneet. 10Un David säd to Saul: Wuarom horchst du no dee, dee sajen daut David die Schoden aundoonen woat? 11Kjikj emol. Nu kaust du selfst seenen, woo de Har mie die en de Heel en miene Macht jeef, un eenje rooden mie too, daut ekj die sull ombrinjen. Oba ekj säd, daut ekj kunn nich miene Macht jäajen die brucken, mien Har, wiels du best däm Harn sien Jesaulwden. 12Kjikj emol, mien Voda. Sitst du daut Enj von dienen Rock en miene Haunt? Nu kaust du seenen un weeten, daut wan ekj dien Rock hab aufjeschnäden un ekj die nich doot muak, daut ekj nuscht beeset well, un hab nich jäajen die jeplont. Ekj hab mie nich jäajen die vesindicht, nich emol wan du uk mie no daut Läwen steist. 13De Har woat de Rechta sennen tweschen mie un die, un mucht hee mie aun die rajchen. Oba ekj woa die nich met miene Haunt aunschieren. #Reema 12,19; 1Pet 2,23 14Soo aus daut foaken jesajcht woat: Ut däm beesen kjemt beeset. Oba miene Haunt saul nich jäajen die utfoaren. 15Jäajen wäm es de Kjennich von Israel rutjekomen? Ekj sie aus een doodja Hunt ooda een Kjniepa ver die! 16Mucht de Har de Rechta sennen, un tweschen mie un die daut Uadeel jäwen. Mucht hee sikj daut beseenen un fa mie enstonen un mie von diene Macht raden.
17Aus David dit aula to Saul jesajcht haud, säd Saul: Es daut nich diene Stemm, mien Sän, David? Un Saul bruak dol un hield lud. 18Un hee säd to David: Du best rajcht un nich ekj. Du hast met goodet trigjetolt, wua ekj met beeset trigjtolen deed. 19Un du hast vondoag kloa bewäsen, woo du met mie omjeist. Du hast nich mien Läwen jenomen wan de Har mie uk gaunz en diene Macht jeef. 20Wudd irjent wäa sienen Fient gonenloten, wan hee däm funk? Mucht de Har die goodet tookomen loten fa daut, waut du vondoag to mie jedonen hast. 21Nu es mie daut kloa, daut du Kjennich woaren woascht, un daut daut Rikj von Israel derch diene Macht woat stoakj woaren. #1Sam 23,17 22Oba vespräakj mie daut opp een Eit ver däm Harn, daut du miene Famielje nich aula woascht ombrinjen, un daut du mienen Nomen nich gaunz utroden woascht en Israel. 23Un David muak dän Eit. Dan jinkj Saul no Hus un David un siene Mana jinjen no äare Heel.
Currently Selected:
1. Samuel 24: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.