Neh 1
1
Na'n Dyos Neemiy ti'ju' ttanam
1Toju' xjaw kyislew toj tjunaqi'n (20) ab'q'i nkawin Artajerjes, ayine' Neemiy tk'wal Akaliy, atinqintoqe' toju' nintnam Susa 2tej tponju' ntzike' Anani kyuk'i'l jte' ichan tzajniqe' toj Juda. Xinqani'ntzuntze' kye ti'j Jerusalen ex kyi'j kykyaqilju' aj Juda e'kyaj anq'in toj qtanam teju' jitz'jtib'il. 3Ex tzaj kytzaq'we'n weye': Nche yajtikye' e'kyaj anq'in toj tx'otx' Juda teju' jitz'b'il ex ch'ixb'ilx te'qe'. Atzunte Jerusalen, majx oje kub' xitju' nintapi ti'jile ex majx eb'aju' tjpel tu'n q'aq', chechij.
4Tej nb'inteju'ye' tqanil lu, inkub' qeye' oq'el, ex nkyaj b'isun jte' q'ije', nchin mewayine' ex nchin na'n Dyose' twitz Qman Dyos te toj kya'j. 5Xinma'ne' te: Nman Dyos atiya toj kya'j, aya Dyos nim toklena ex xob'ajilxa, min ntch'exb'e'nju'ya tyola ntzaj ttziya'na kyeju' nche k'u'jlanteya ex njapun tchaq'b'ila kyu'n; 6chin kub'sale' teya ja'lo tu'n ttzaj tb'i'nju'ya nna'j Dyose' twitza q'ijtl ex qonik'an kyi'ju' aj Israel tmajina. Inel nnik'e' qa ayo'ye' aj Israel matxi' qo b'inchan ile' twitza; ¡Ayo'xpe' junqe' kyuk'i'lju' nwitze'le' matxi' qo b'inchan ile'! 7Mixyab'a'n matxi' qb'inchaye' twitza; na'mx kyjapunju' tchaq'b'ila ex tkawb'ila qu'ne', tzaj tq'o'na qeye' tu'ne'lju' tmajina Moyses. 8Na'ntzju'ya tzajni tma'na te Moyses, qama qo b'inchan ile', atitoq tu'n qxi' t-sputi'na toj tkyaqil twitz tx'otx'; 9qatzun matz'anjtzti'j qanmiye' tuk'i'la exqa mache japunju' tchaq'b'ila qu'ne' tu'n qb'inchanteye', maskyepe' matxitoq qopone' tzmax b'ajsb'il twitz tx'otx', qo jawil tiq'i'na ja to'qo'ye' ex qopomel tiq'i'n jumajtla toju' najb'il xjan jaw t-sk'o'na jatu'n tna'njtza'ju' tb'iya. 10Ayo'ye' tmajina ex ttanama, ju' tkola tuk'i'l nimtipumala. 11Nchinkub'sa'ne' teya, Nman Dyos, tu'n ttzaj tb'i'nju'ya nna'j Dyose' ex kykub'sb'ilju' tmajina, ju' o'kx kyajb'ilju' tu'n tjaw nima'na kyu'n. Ex kxe'l nkub'sa'ne' teya tu'n wel b'a'ne' tuk'i'lju' nimaqkawb'il, nchije' toj nna'j Dyose'.
Qu'n ayintoqe' q'olte tk'wa' nimaqkawil Artajerjes.
Currently Selected:
Neh 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999