YouVersion Logo
Search Icon

Jud 1

1
1Ayine' Judas, tmajin Jesukrist qine' ex titz'in Jakob', nche'x nq'olb'e'ne' k'u'jla'nqe' tu'n Dyos ex oje che ttxok, aye' xq'uqi'nqe' tu'n Jesukrist. 2Tzajxwit q'aq'an tk'u'j Dyos kyi'je', tenwt nak'b'il kyeye' ex tenwt kyk'u'jlalile'.
Poqb'ilkye xnaq'tzb'il mya ax
3E'ntzik ex e'witz'in, atixi'x nk'u'je' kyi'je', matxi' kub'xi' nxima'ne' tu'n ntz'ib'a'ne' kyeye' ti'ju' kolb'ilqe kyuk'i'le'; atzu'n ja'lo nojqelan tu'n ntz'ib'a'ne' kyeye' tu'n txi' nkub'sa'ne' tu'n toktilil kyu'ne' toju' okslab'l tzaj tq'o'n Dyos tejumajx qe ayo' okslalqo'. 4Qu'n ate' junjun sb'ulqe' matxi' che okx kyxole', q'ma'ntl kyoj Tu'jil ojtxi' tu'n kyxi' toj naje'n. Myab'a'n xjalqe', nkych'exb'e'n t-xtalb'il Dyos tu'n kyb'inchanteju' myab'a'n, min nche niman te Qman Dyos nim toklen ex te Qajaw Jesukrist.
Tqanil tz'e'ysb'il witzb'aj tu'n Dyos
5Maskye b'i'ntl kyu'ne' tkyaqil ja'lu, kxelnna'ntle' kyeye', e'tkol Qman Dyos aj Israel tej kyb'je'tz tiq'i'n toj Ejipt, yajxi'tzuntl e'kub' tnajsa'nju' min xikynima'n tyol. 6Exqe' anjl elkyik'o'n kyoklen ex kyej kyq'o'n kyja xitq'o'n Dyos kye, jpu'nqe' tu'n Dyos toj qlolj tejumajx tu'n kyok toj xjel toju' q'ij nim toklen. 7Ikyxb'aju' kyi'ju' aj Sodom ex aj Komor, exqe' xjal kyoju' nimaqtnam kyk'etz, xikyq'o'nkyib' toj ajpaji'n, ex toj achb'il myab'a'n. Qu'mtzun kub' tz'e'ysa'n kywitz tu'n q'aq' tejumajx te jun yek'b'il kye kykyaqil xjal.
8Expe' ikyqe'xju' ichan na'j, nok toj kywitz ex nkytxa'jla'n kyib', nelkyik'u'n Qajaw ex nche xmayin kyi'ju' nimaq oklenj toj kya'j. 9Mixpeti' tma Myel kynejel anjl tu'n ttz'e'yset twitzju' tajaw il tej nqtoq che wulj tu'npaj t-xmilal Moyses, a tmaju': ¡Tzak'unjtzwita tu'n Qman Dyos!, chij. 10Aye'tzunkye' xjal na'j inpe' che yolin myab'a'n ti'ju' min kyojtzqi'n; aye'tzu'n ti'xti' ojtzqi'n kyu'n kytzajlenx, najb'en kyu'n tu'n kyxi' toj naje'n kse'nqe' txkup mixti' kynab'l.
11¡Qab'anx kywitz!, qu'n a nxikyb'incha'n se'nte Kayin. Tu'n jamjoni'n ti'j pwaq mache'x txalpuj se'nte B'alaam, ex che najel tu'n kypi'sal kse'nte Kore. 12Ch'ixb'ilqe'x kyxole' toju' wan te tk'u'jlalil nkyik'sa'ne', nxi'x che tzalaj nche wan ex nche k'wan, mixti'x nche niman ch'i'n. O'kx nb'ajxkyk'u'j kyi'jx. Ikyqe' se'n muj mixti' jb'al toj, naq nxitiqa'n kyq'iq'. Ikyqe' se'n tze min nche witzan toj tq'ijlalil, tzqijqe' ex jawniqe' xb'oqi'n. 13Tx'u'jqe' kse'n ttolob' ninnjab', ch'ixb'ilxqe' kyb'inchb'en kse'n twoqotil ninnjab'. Ikyqe' se'n che'w nche eltxalpuj, naqtkub'qe'tl tu'n kyten toj qlolj tejumajx.
14Ex ikx Enok, tchman Adan kyxol twuqi'n tnej tyajajil, yolin kse'nx tma Dyos te kyi'ju' xjal na'j kjalu: Wile' Qajaw, xi'toq ttzaj kyuk'i'l txqan tanjl 15tu'n kyok kykyaqil xjal toj xjel tu'n ex tu'n tkub' ttz'e'ysa'n kywitz tu'n tpaju' kyb'inchb'aj myab'a'n ex tu'n tpaj tkyaqil kyxlab'yol b'inchal myab'a'nqe' ti'j Qajaw, chij. 16Tkyaqil myab'a'n nela' kyeju' xjal lu ex nok kyq'o'n te kypaj txqantl, ex o'kx nkyjyo'n axju' kyajb'il. Nxi'x che yolin te ninb'ilkyib', ex kyexi'x che yolin kye txqantl naqx tu'n kykanb'ante kyajb'il.
Kynab'l okslal tu'n Judas
17-18Aye'tzunkye' e'ntzik ex e'witz'in, atixi'x nk'u'je' kyi'je', kyna'ntze' oje kyma t-apostl Qajaw Jesukrist kyeye' kjalu: Che ul xjal xmayilqe' toj b'ajsb'il q'ij, che anq'il tojx kyachb'il myab'a'n, chechij. 19Aye' che tzajel q'inte pa'jtib'il; qu'n a nkyb'incha'n axju' kyajb'il ex mixti' T-xew Dyos kyuk'i'l.
20Aye'tzunkye' e'ntzik ex e'witz'in, atixi'x nk'u'je' kyi'je', che we'ku'kye' toj kyokslab'le' xjan ti'j Dyos. Che na'n Dyose' kse'nx ntma'n Xewb'aj Xjan. 21Che tenku'ye' toju' tkawb'il Dyos ex kyayome' tq'ijlalil ajttzaj tq'o'n Qajaw Jesukrist qchwinqlal tejumajx tu'n tlaqb'il tk'u'j.
22Kyoninqe'xe' nche jawje tuk'i'l tk'u'jlalil. 23Che kykolpime' junjun tu'n lalun che'x toj q'aq', ex q'aq'an kyk'u'je' kyi'j txqantl, naq o'kx kyka'yinx kyib'e', lalun txikyb'incha'ne' taq'wix nkyb'incha'n naku'j xb'alun b'ajni txa'j.
B'ajsb'il ajwalb'ilte Dyos
24Aku'te Qman Dyos nim tnab'l, Klolqe, ati tipumal ka'yilkyeye' tu'n lalun che kub' tz'aqe', tu'n kypon tiq'i'ne' mixti' kytz'ilile' twitz toj t-spik'umal tuk'i'l nim tzalajb'il. 25Kyajwali'nktze', tz'elx kynik'e' teju' toklen nim ex tenxwit toklen tu'n tkawin, tu'nel Qajaw Jesukrist, tu'nju' matxi' tzajxi', te ja'lo ex tejumajx. Ikyxwitju'.

Currently Selected:

Jud 1: MAMO

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy