Ec 1
1
Tkyaqil Naqx toqwitz nok
1Tej tten jun tk'wal Dab'i te nimaqkawil toj Jerusalen, ojtzqi'nxi'xtoq tu'nju' nim tnab'l, aye' junjun yol ja'lu e'tma.
2¡Tkyaqil naqgan!
¡Naqxgan, mixti'x tajb'en!
3¿Titi' ntkanb'a'nju' xjal
tu'n tkyaqilju' ntaq'una'n twitz tx'otx'?
4Nche itz'ji junjun, nche kyim junjuntl,
atzunte tx'otx' kukx ttenju'.
5In jawu'lu' q'ij, ex innex,
innanj junmajtlti'j tojxju' tb'e
tu'n tjawu'l junmajtl.
6Njub'in kyq'iq' toj tnayajkya'j
inanjtz jumajtlti'j toj tb'a'nq'ob'kya'j.
¡Insutyanju' kyq'iq', insutyan!
¡Insutyan ex nnanj jumajtlti'j!
7Kykyaqilju' nin a' nche pon toj ninnjab',
atzunte' ninnjab' mixti'x innoj;
axtzuntzu' nnanja' kyi'ju' nin a' janche jatza' anq'in
tu'n kyb'et jumajtl tojxju' kyb'e.
8Mixti'x jun tu'me'l tu'n tq'met
b'ajx qgan tu'n tkyaqilju' ti'xti' lu;
mixti'x nqe tk'u'ju' qwitz tu'nju' ntka'yi'n
exju' qẍkyin tu'nju' ntb'i'n.
9Mixti'te jun ti'xti' ktenb'el qa min ten ojtxi'
mixti'te jun ti'xti' kb'inchetil qa min b'ent ojtxi'.
¡Mixti'te jun ti'xti' ak'a'jwit twitzju' tx'otx'!
10Kukx kymantekye xjalju':
¡Ak'a'jtzunte' lu!, chechij.
Extzun oje tente' ojtxi' kyeqwitz.
11Oje b'jik'kyna'lju' ti'xti' ojtxi',
ikyqe'xtzun ti'xti'ju' che ul k'ik'el kyna'l
kyu'nju' che itz'jel yajxi'tel.
Twitzlalil tu'n Pakb'al
12Ayine' pakb'al, inten te nimaqkawil kye aj Isarael toj Jerusalen, 13oknxon nk'u'je' tu'n kyb'aj nka'yi'ne' tkyaqilju' nb'aj twitz tx'otx' tu'n kykane tuk'i'l nab'l. ¡Jun nin iqtzte' oje tzaj tq'o'n Qman Dyos kyib'aju' xjal tu'n lalun jaw kynima'n kyib'! 14Eltzun nnik'tze' qa naqx toqwitzte' nnok tu'n tkyaqilju' nb'inchet twitz tx'otx', ikte' kse'n qajb'il tu'n qxi' knolte kyq'iq'.
15¡Layx b'ent ttzinsetju' ch'okti'j, ex lay b'ent tokju' mixti'x toj tajlal!
16-17Nmatzuntze' wib'xwib'e': Inchin okq'o'ne' te jun nimaqxjal, atixi'x tnab'l kyekywitz kykyaqilju' txqantl nimaqkawil e'kawin nejtl nwitze' toj Jerusalen; majx q'o'n wib'e' tu'n tel nnik'e' b'a'nxi'x ti'ju' nab'l ex ti'j ojtzqib'l, ex ti'ju' ti'xti' myab'a'n ex xnakyil, naqx tu'n tel nnik'e' qa ikxju' kse'n qajb'il tu'n qxi' knolte kyq'iq', nchije'. 18Axxi'x, qa nim qnab'l, ex nim yajb'il qe; qa nimxi'xju' b'i'n qu'n, inqo yajtixi'xtl.
Currently Selected:
Ec 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999