Jon 12
12
Giwiro Yecu ki moo i Betania
(Mat 26.6-13; Mar 14.3-9)
1Ka ceŋ odoŋ nino abicel me o i Kato (Paska), Yecu obino i Betania, ka ma Lajaro bedo iye, en ma ceŋ Yecu ocere ki i kin jo muto-ni. 2Gitedde cam me otyeno kunnu; Marita obedo ka poko cam, Lajaro onoŋo ŋat acel i kin jo ma obedo kwede i dog cam. 3#Luka 7.37, 38 Maliam okwanyo moo ma ŋwece kur me wel madwoŋ, moo nard magili, ma romo ratili acel, owiro ki tyen Yecu, ojwayo tyen Yecu ki yer wiye; ci ŋwec moo oromo i ot ducu. 4Ento Juda me Keriot, ŋat acel i kin lupwonnyene, en ma bidobe, openyo ni, 5“Piŋo moo man pe gicato i wel me ciliŋ miya adek, wek gimi bot lucan?” 6En owaco lok man, pe ni en paro pi lucan, ento pien en yam lakwo, yam gwoko kicaa lim, ci kwanyo gin ma gibolo iye. 7Yecu owaco ni, “Wuweke, wek en okan pi nino me yika. 8#Nwo 15.11 Lucan wutye kwedgi nino ducu, ento an pe abibedo kwedwu nino ducu.”
Giporo lok me neko Lajaro
9Ka lwak Lujudaya madwoŋ guniaŋ ni en tye kunnu, ci gubino, pe pi Yecu keken, ento bene pi neno Lajaro ma en ocero ki i kin jo muto. 10Pi meno ajwagi madito pa Lubaŋa guyubo lok me neko Lajaro bene, 11pien pire Lujudaya mapol gua woko ki botgi, guye Yecu.
Yecu odonyo i Jerucalem macalo kabaka
(Mat 21.1-11; Mar 11.1-11; Luka 19.28-40)
12Orwone lwak jo mapol ma yam gubino i nino madit guwinyo ni Yecu bino i Jerucalem. 13#Jab 118.25, 26 Gukwanyo jaŋ otit, gukato ka jole, kun gidaŋŋe ni,
“Ojana!
Lubaŋa o mi gum i kom ŋat ma bino i nyiŋ Rwot,
ma en Kabaka pa Icrael!”
14Yecu onoŋo latin kana, obedo i wiye, kit macalo gicoyo ni,
15 #
Jek 9.9
“Pe wulwor, wun jo Cion.
Nen, kabakawu bino botwu,
obedo i wi latin kana!”
16Lupwonnyene pe guniaŋ man koŋ; ento ka doŋ giketo deyo i kom Yecu, ci gupo ni ceŋ gicoyo lok magi i kome, dok ni gitimo i kome. 17Lwak ma yam onoŋo tye bote ka en lwoŋo Lajaro ki i lyel me cere ki i kin jo muto gutito pire. 18En aye mumiyo lwak ocito ka jole, pien guwinyo ni en otiyo lanyut man. 19Luparicayo guloko kekengi ni, “Doŋ wuneno ni pe wukonyo gin mo. Nen, lobo ducu doŋ owirre ka lube.”
Lugrik mogo gumito neno Yecu
20I kin jo ma yam gucito ka woro Lubaŋa i nino madit onoŋo jo mogo Lugrik. 21Jo-nu gucito bot Pilipo me Betecaida ma tye i Galilaya, guwacce ni, “Ladit, wamito neno Yecu.” 22Pilipo ocito, otito bot Anderiya; Anderiya ocito kacel ki Pilipo, gutito bot Yecu. 23Yecu odokkigi iye ni, “Cawa doŋ oromo me keto deyo i kom Wod pa dano. 24Adada awacciwu ni, nyig bel ka pe opoto i ŋom, oto, bedo kene; ento ka oto, ci ceko nyige mapol. 25#Mat 10.39; 16.25; Mar 8.35; Luka 9.24; 17.33 Ŋat ma maro kwo mere, birwenyone; ŋat ma kwero kwone i lobo man, bigwoko nio i kom kwo ma pe tum. 26Ka ŋat mo tiyo pira, myero oluba; ka ma an abedo iye, laticca bene bibedo kunnu; ka ŋat mo tiyo pira, ci Won binyuto worone i kome.
Wod pa dano myero gitiŋe malo
27“Cwinya koni oŋabbe aŋaba. Abiwaco lok aŋo? Abana, lara i kom cawa man? Ento pi lok man omiyo ao i kom cawa-ni. 28Abana, ket deyo i kom nyiŋi.” Dwan oa ki i polo ni, “Doŋ aketo deyo i kome, dok abiketo aye.” 29Lwak ma gucuŋ ka ŋete guwinyo, ci guwaco ni, “Polo omor.” Jo mukene ni, “Lamalaika oloko kwede.” 30Yecu ogamo ni, “Dwan man pe obino pira, ento piwu. 31Koni gitye ka ŋolo kop i kom lobo man; koni lalo lobo man gibibole woko. 32An ka gitiŋa malo nia i lobo, ci abipeyo dano ducu bota.” 33En oloko lok man pi nyuto kit to ma ebito kwede 34#Jab 110.4; Ic 9.7; Ejek 37.25; Dan 7.14 Lwak gugamo doge ni, “Wan wawinyo ki i cik ni Kricito ma Lubaŋa oyero bedo nakanaka. In dok iwaco niŋniŋ ni Wod pa dano myero gitiŋe malo? Wod pa dano man en aŋa?” 35Yecu owaccigi ni, “Ceŋ pud tye botwu pi kare manok. Wuwot ma kun wutye ki ceŋ, wek piny macol pe oŋukwu. Ŋat ma woto i piny macol pe ŋeyo ka ma ecito iye. 36Ka pud wutye ki ceŋ, wuye ceŋ, wek wudok litino me ceŋ.”
Lujudaya pe guye Yecu
Yecu ka oloko lok man, ci opokke ki botgi, okanne woko ki botgi. 37Kadi bed otiyo lanyut ma rom meno i nyimgi, pe guye en; 38#Ic 53.1 wek lok pa lanebi Icaya ocobbe kakare, ni,
“Rwot, aŋa ma oye lok ma watito?
Dok aŋa ma Rwot onyuto tekone
bote?” 39Man en gin mumiyo pe gitwero ye,
pien Icaya dok owaco ni, 40#Ic 6.10 “En oneko waŋgi,
omiyo cwinygi odoko nwaŋ,
wek pe gunen ki waŋgi,
pe bene guniaŋ ki cwinygi,
wek omi pe gulokke gudwog
bota acaŋgi.”
41Icaya owaco lok man pien oneno deyo mere, oloko pire, 42Kadi bed kit meno, jo mapol ma i kin luloc bene guye en, ento pi lworo Luparicayo omiyo pe gituco, wek pe giryemgi woko ki i kacokke; 43pien gimaro deyo ma dano keto i komgi makato ma Lubaŋa miyo.
Lok ma Yecu loko ŋolo kop i kom dano
44Yecu odaŋŋe, owacci, “Ŋat ma ye an, pe oye an, ento oye ŋat ma oora. 45Ŋat ma onena, noŋo oneno ŋat ma oora. 46An abino i lobo pi bedo ceŋ me lobo, wek dano ducu ma ye an owek bedo i piny macol. 47Ka dano mo winyo lokka ci pe mako, an pe aŋolo kop i kome; pien pe abino ka ŋolo kop i kom lobo, ento abino ka laro lobo. 48Ŋat ma kwera, ma pe winyo lokka, tye ki ŋat ma biŋolo kop i kome; lok ma aloko biŋolo kop i kome i nino me agik. 49Pien pe aloko pira kena: Won ma oora, en kikome aye omiya cik, i gin ma myero awaci ki ma myero aloki. 50Aŋeyo ni cikke en kwo ma pe tum; pi meno gin ma awaco, awaco macalo Won oloko bota.”
Currently Selected:
Jon 12: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.