Amoc 7
7
Lok adek ma Lubaŋa onyuto ma bipoto i kom Icrael
1Rwot Lubaŋa onyutta man: nen, en cen rye ka cweyo lwak bonyo i kare ma bel ma gicoyo me aryo ocako twi, en bel ma gicoyo ka doŋ gikayo pa kabaka. 2I kare ma doŋ gutyeko camo lum woko ki i lobo, awacci,
“Ai Rwot Lubaŋa, timgi kica do!
Yakobo twero cuŋ niŋniŋ, ma kun en tidi kumeno!”
3Ci Rwot oŋut i kom lok man kun wacci, “Man pe doŋ bitimme.”
4Rwot Lubaŋa dok onyutta man: nen, Rwot Lubaŋa onoŋo tye ka ciko ni giŋol kop i kom jone ki mac; ci mac owaŋo kut matut otyeko woko, obedo ka waŋo lobo-ni. 5Ci awacci,
“Ai Rwot Lubaŋa, doŋ iwek do!
Yakobo twero cuŋ niŋniŋ,
ma kun en tidi kumeno?”
6Ci Rwot Lubaŋa oŋut i kom man kun wacci, “Man bene pe doŋ bitimme.”
7Dok onyutta man: nen, Rwot yam ocuŋ i ŋet cel me gaŋ ma gigero kun gipimo ki birigi,” kun omako birigi#7.7, 8 birigi te lokke: gin lapim ot. i ciŋe. 8Ci Rwot owacca ni, “Amoc, ineno gin aŋo?” Ci agamo ni, “Birigi.” Dok Rwot awacca ni,
“Nen, aeketo birigi i dye jona jo Icrael,
pe dok abikato ki ka ŋetgi,
9Kabedo pa Icaka ma yam giwora iye i wi godi gibidoŋ noŋo,
ki kabedo pa jo Icrael maleŋ gibidoŋ obur;
ci abipoto i kom ot pa Jeroboam ki pala lucwan.”
Amoc ki Amajia
10Ci doŋ Amajia, ajwaka me Betel, ocwalo lok bot Jeroboam, kabaka me Icrael, ni, “Amoc opiro lok i komi i dye jo me ot pa Icrael; lobo-ni pe twero ciro lwak lok ducu ma en owaco. 11Pien Amoc doŋ owaco kumeno ni,
‘Jeroboam gibineko ki pala lucwan,
jo Icrael gibikwanyogi ki i lobogi giterogi i opii.’ ”
12Ci Amajia owaco bot Amoc ni, “In lanen, citi iriŋ woko i lobo Juda, icam kwonni kunnu, it yet lok lanebi lanebi ki kunnu. 13Ento pe dok it yet lok i Betel, pien kany kabedo maleŋ pa kabaka, man ot woro Lubaŋa me ker man.”
14Amoc odok iye ki Amajia ni, “An pe lanebi, an bene pe latin pa lanebi mo; ento yam an lakwat, ki layub nyig olam me acama. 15Ci Rwot okwanya ki ka lubo kor romi, ci owacca ni, ‘Cit itit lokka boŋonajo Icrael.’
16“Pi meno, koni doŋ iwiny lok pa Rwot.
In iwacci, ‘Pe it it lok pa Lubaŋa i kom Icrael,’
dok ni, ‘Pe ibed ka lok i kom ot pa Icaka.’
17Pi meno, Rwot owaco kuman ni,
‘Dakoni bibedo malaya i gaŋ,
awobe ki anyirani gibinekogi ki pala lucwan,
pottiwu gibipoko woko kun gipimo ki tol;
in kikomi ibito i lobo ma keni,
ci jo Icrael gibikwanyogi woko ki i lobogi, giterogi i opii ada.’ ”
Currently Selected:
Amoc 7: Aco85
Highlight
Copy
Compare
Share
Want to have your highlights saved across all your devices? Sign up or sign in
Acholi Bible © Bible Society of Uganda, 1985.
