بُطْرُسْ التَّانِيَّة 1
1
الْفَصْلْ اللّْوّْلْ
السّْلَامْ
1أَنَا سِمْعَانْ بُطْرُسْ الْعَبْدْ وْالرَّسُولْ دْيَالْ يَسُوعْ الْمَسِيحْ، كَنْكْتَبْ لْهَادُوكْ اللِّي عَنْدْهُمْ إِيمَانْ غَالِي بْحَالْنَا بْفْضَلْ التَّقْوَى دْيَالْ إِلَاهْنَا وْمُنَجِّينَا يَسُوعْ الْمَسِيحْ. 2كَنْطْلَبْ مْنْ اللَّهْ بَاشْ يْكَتّْرْ فِيكُمْ النِّعْمَة وْالْهْنَا بْفْضَلْ الْمَعْرِفَة دْيَالْكُمْ لْلَّهْ وْرَبّْنَا يَسُوعْ.
اللَّهْ عَيّْطْ لِيكُمْ وْخْتَارْكُمْ
3رَاهْ اللَّهْ بْالْقُدْرَة دْيَالُه الْإِلَاهِيَّة عْطَانَا كُلّْ مَا كَنْحْتَاجُو لِيهْ فْالْحَيَاةْ وْفْالتَّقْوَى، بَاشْ نْعَرْفُو هَادَاكْ اللِّي خْتَارْنَا بْالْعَزّْ وْالْخِيرْ دْيَالُه، 4اللِّي بِيهُمْ عْطَانَا الْحْوَايْجْ الْمْزْيَانِينْ وْالْغَالْيِينْ اللِّي وَاعْدْنَا بِيهُمْ، بَاشْ تْقَدْرُو تْشَارْكُو فْالطّْبِيعَة الْإِلَاهِيَّة، وْتْهَرْبُو مْنْ الْفْسَادْ اللِّي كَيْجِي مْنْ الشَّهْوَة اللِّي فْالدّْنْيَا. 5عْلَى هَادْشِّي، دِيرُو جَهْدْكُمْ بَاشْ تْزِيدُو عْلَى إِيمَانْكُمْ الْخِيرْ، وْعْلَى الْخِيرْ الْمَعْرِفَة، 6وْعْلَى الْمَعْرِفَة الرّْزَانَة، وْعْلَى الرّْزَانَة الصّْبَرْ، وْعْلَى الصّْبَرْ التَّقْوَى، 7وْعْلَى التَّقْوَى مْحَبَّةْ الْخُوتْ، وْعْلَى مْحَبَّةْ الْخُوتْ، الْمْحَبَّة. 8حِيتْ إِلَا كَانُو فِيكُمْ هَادْ الْأُمُورْ وْتّْزَادُو بْالْكْتْرَة، مَا غَيْخَلِّيوْكُمْشْ تْكُونُو مْعْݣَازِينْ وْلَا بْلَا غْلَّة بَاشْ تْعَرْفُو رَبّْنَا يَسُوعْ الْمَسِيحْ. 9وَلَكِنْ اللِّي مَا عَنْدُوشْ هَادْ الْأُمُورْ رَاهْ هُوَ عْمَى كَيْشُوفْ عْلَى قْدُّه، وْنْسَى بْلِّي رَاهْ تّْنَقَّى مْنْ دْنُوبُه الْقْدَامْ. 10هَادْشِّي عْلَاشْ آ الْخُوتْ، دِيرُو جَهْدْكُمْ بَاشْ تْبَيّْنُو بْلِّي اللَّهْ عَيّْطْ لِيكُمْ بْالصَّحْ وْخْتَارْكُمْ. حِيتْ إِلَا دْرْتُو هَادْشِّي عَمّْرْكُمْ مَا غَتْطِيحُو. 11حِيتْ هَكَّا غَيْتّْحَلّْ لِيكُمْ الْبَابْ كَامْلْ بَاشْ تْدَخْلُو لْلْمَمْلَكَة الدَّايْمَة دْيَالْ رَبّْنَا وْمُنَجِّينَا يَسُوعْ الْمَسِيحْ.
الْغَرَضْ مْنْ هَادْ الرِّسَالَة
12وْعْلَى هَادْشِّي، غَنْبْقَى دِيمَا نْفَكّْرْكُمْ بْهَادْ الْأُمُورْ، وَاخَّا كَتْعَرْفُوهُمْ وْتَابْتِينْ فْالْحَقّْ اللِّي عَنْدْكُمْ. 13وَلَكِنْ كَنْشُوفْ بْلِّي وَاجْبْ نْفَكّْرْكُمْ بْهَادْشِّي، مَا حَدّْنِي فْهَادْ الْحَيَاةْ. 14أَنَا عَارْفْ بْلِّي وْصَلْ الْوَقْتْ دْيَالِي فَاشْ غَنْرْحَلْ مْنْ هَادْ الْحَيَاةْ، كِيفْ بَيّْنْ لِيَّ رَبّْنَا يَسُوعْ الْمَسِيحْ. 15وْغَنْدِيرْ جْهْدِي كُلُّه بَاشْ بَعْدْمَا نْمُوتْ، تْبْقَاوْ دِيمَا تْفَكّْرُو فْهَادْ الْأُمُورْ.
16رَاهْ مْلِّي خَبّْرْنَاكُمْ عْلَى قُوَّةْ رَبّْنَا يَسُوعْ الْمَسِيحْ وْالْمْجِي دْيَالُه، مَا كْنَّاشْ كَنْعَاوْدُو لِيكُمْ الْخْرَايْفْ دْيَالْ الْكْدُوبْ. وَلَكِنْ شْفْنَا بْعِينِينَا الْعَظَمَة دْيَالُه. 17حِيتْ هُوَ خْدَا مْنْ اللَّهْ الْآبْ الْكَرَامَة وْالْعَزّْ مْلِّي تّْكَلّْمْ مْعَاهْ وَاحْدْ الصُّوتْ مْنْ عَنْدْ مُولْ الْعَزّْ الْكْبِيرْ وْݣَالْ: «هَادَا هُوَ وْلْدِي الْعْزِيزْ اللِّي بِيهْ فْرَحْتْ».#متى 17:1-5؛ مرقس 9:2-7؛ لوقا 9:28-35 18وْحْنَا بْرَاسْنَا سْمَعْنَا هَادْ الصُّوتْ جَايْ مْنْ السّْمَا مْلِّي كْنَّا مْعَاهْ فْالجّْبَلْ الْمْقَدّْسْ.
19وْعَنْدْنَا كْلَامْ الْأَنْبِيَا اللِّي زَادْ أَكّْدْ لِينَا هَادْشِّي، عْلِيهَا رْدُّو الْبَالْ مْزْيَانْ، رَاهْ هُوَ بْحَالْ شِي قْنْدِيلْ كَيْضَوِّي فْبْلَاصَة مْضَلّْمَة، حْتَّى يْطْلَعْ النّْهَارْ وْتْبَانْ نْجْمَةْ الصّْبَاحْ فْقْلُوبْكُمْ. 20وْقْبَلْ مْنْ كُلّْشِي، مْزْيَانْ تْعَرْفُو بْلِّي مَا كَايْنْ حْتَّى شِي وَاحْدْ اللِّي يْقْدَرْ يْفَسّْرْ مْنْ رَاسُه شِي نُبُوَّة مْنْ الْكْتَابْ. 21حِيتْ عَمّْرْ شِي نُبُوَّة مَا جَاتْ بْالْمُرَادْ دْيَالْ بْنَادْمْ، وَلَكِنْ شِي نَاسْ بْالْقُدْرَة دْيَالْ الرُّوحْ الْقُدُسْ تّْكَلّْمُو بْكْلَامْ اللَّهْ.
Currently Selected:
بُطْرُسْ التَّانِيَّة 1: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved