FILEMON 1
1
Ɗek-tuwta hiɗi gi deɓta
2 Tim 1:1-5; 3 Yoh 1:2, 6
1Paulus sa ma daŋgayna vi Kristu Yesu, hiɗi Timotewus ɓasuyna, Tam Filemon, nirma'na ma hayma kamna hay lopna, 2Tam Afiya, ɓasuma'ta, tam Arkipus, nirma' ma hay duura, tam Ekklesiyata ta ka hay ziyna vaŋga kaw: 3Lawna buya hiɗi Bum-Sumuna vaya Yesu Kristu vulgi slugota hiɗi toyta tage.
4Nan gi deɓ mi Lawna van dok-doko hay li ma nan yaŋ seŋ hay siɗawta van kaf kaw; 5Kay nan ka hum kay minda hiɗi vida vaŋu ma ka ɗek goyo tam bum-Sumuna Yesu, tam sa peldetna kaf kaw. 6Nan ka joboŋu kay tapta kepta vi vida vaŋu ma muɗ li lopo, a naŋ ma muɗ wi slen kaf ma naana kuma'a tam Kristu. 7Kay nan fi firita hiɗi teŋ-irta ŋolo kuɗ minda vaŋu, ɓasunna, kay kuɗaŋ naŋu dik sa peldetna kaf tunawa gaa ŋali.
Paulus siɗaw kay Onesimus
1 Kor 4:7-9
8Kay na'ta hiɗi taala hay Kristu nan buti goy ŋolo kay daŋ sle ma hay liyamna, 9may nan min siɗawaŋ siɗawaya hay sem ti-kamda, ki nan Paulus ka ki kayn nala, sa ma maara, wulin lo sa ma daŋgayna kuɗ Kristu Yesu, 10Nan siɗawaŋ kay goora vanu Onesimus, ma nan vuɗumawa hay jaɓna: 11Jewe nam ay va ma waa'a kaŋu, may wulini nam ma lin mi ma gutaŋu, gutan nan kaw;
12nan gum iramisawa taŋu, namu ma muɗi mi dukanna. 13Nan var kay telemis katanu, kay nam sunan hay baŋalaŋu hay li ma nan ka juni hay jaɓna kuɗ labara ma firina. 14May nan min li kayni bay varta vaŋɗi, a ŋaata vaŋu ma li hiɗi donotaɗi, may kuɗ minda vaŋu.
15Kla, kay jaram ɓuraway goy hiɗi naŋ kayni ir liyn neeɗa, a naŋ ma fumu hay vatɗita, 16may ki gorvona nala loɗi, may ŋaa'a suw gorvona, ki ɓasuŋ ma hayan kalamna nala, suw pet kan nanu, may ŋol suw lo kaŋ naŋu, kuɗ sliwna, kuɗ Bum-Sumuna kaw.
17Kay na'ta kayni, la naŋ ŋaɓan ki banaŋŋa nala, naŋ ma vumu ki naŋ vantin mi nan nala. 18La nam laŋgin mi joo mige kaw, lebo la va vaŋ ka kalam kaw, naŋ ma ŋaɓam kan nanu. 19Nan Paulus ɗo hiɗi ɓan nan kay tuwanu: Nan ma wurakaŋga, a nan ma di ala naŋu kaw mi balla vanuɗi. 20Awa, ɓasunna, lopn kayni, hinan a nan fum kuɗaŋ fi' hay Bum-Sumuna, tunan dikan gaa'a hay Kristu tage.
21Nan kiran ta ala naŋ ma hum kuɗanu, kay na'ta nan ɗo taŋu, hiɗi wida ta ala naŋ ma li slen ɗawni suw ma nan daŋgina.
Gi-deɓta ta vat hiɗi na'ta
22Kotaŋ liyn ma musta kanu kaw, kay nan ka var ala kuɗ siɗawta vigiya nan ma vulis tigiya.
23Epafras niranna ma daŋgayna kuɗ Kristu Yesu ka gaŋ deɓe, 24Markus, Demas, Lukas, nuriyonna sa lopna nala kaw.
25Slugota vi Bum-Sumuna vaya Yesu Kristu mus hiɗi Ŋusta vigi musge.
Currently Selected:
FILEMON 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001