TIYNA VI YEREMIYAS 1
1
Nul ma tiyta kay Yerusalem
1He! Mige? Na' hini goy hiweŋ',
nagata ta ay hobay hiɗi sumuna.
Wulini na' muɗawa ki cata duhulta nala,
jewe na' ay ŋolo jar hoyok-ziy hegena,
ay ti mulda kay jaf-sumuna,
wulini na' muɗi gorvo'o.
2Hay henjet kaf na' bur iri tiy talal',
zimiyn jaŋ gaa kira' di-di',
jar nisi sa mina' jew kafna,
sa ma teŋa' ira' may loɗi.
Boniyo'na kaf di newtawa ka'a,
nisi muɗi si sa gaw ka'na.
3Jafna vi Yuda kalay goy gorvo'o,
yisi hoti gaa'a,
muɗi sun sum segena;
nisi lakay goy jar jaf-sumuna,
may fi tun-sukka noŋɗi;
sum sa curoɗsina kalsiyawa vun zlata.
4Hagana vi Siyon kaf ka vun do'olla,
kay sa may co hay yuldena loɗi,
vun-ziyn kaf ɦoy gaa'a,
muliyan-sa-ɗifinna va'a ka tiy tuwsiya,
guro-boy sa wayana va'a ka lasa,
na' kay tuwa'a ka hay galakka.
5Sa gaw ka'na kolawa ka'a,
sa dura'na ka hay sle'ta,
kay Ma-Vatɗina lasa'awa,
kuɗ jiw-zlata va'a ta suwi ŋolta.
Kuɗ ŋel-vunda va'a,
gurona va'a pati gorvo'o vok sa gawta.
6Goot-cata vi Siyon ba wileta va'awa kafe;
sa ŋulona va'a muɗawa ki lafna ma fi hat ma tiɗi,#1:6 Lafna mi muur ma miyokom fiyoko, nam fiyok suw buɗugoora.
ma jaŋ vok sa ma digiɗ muur kayni,
Sutiyam toy tagay-tagay nala.
7Hay buur ma Yerusalem ka vun zlata
hiɗi lasta wulin kayni,
huma' as ga' kay ŋaata va'a ta na' fa' jewta,
hay li ma sumuna va'a puk gaa'a hay ɓam sa curoɗsina,
bay sa gut kisiya.
Sa gaw ka'na wa'a,
nisi cuk tuwsi goy cena kuɗ ni-gaata va'a.
8Yerusalem li sulukŋ ŋolo,
kuɗ na'ta kayni na' muɗi liwisi,
nisi kaf sa ay tiya' se'na muɗi cen kuɗa'a,
hay li ma nisi wi nalata va'a.
Na' kay tuwa' ka tiya,
ka ɦod ira' goyo.
9Liwisna va'a ka goɓi vun sligara va'a,
na' may var kay dabta va'ɗi;
ni-gaata va'a li sa ɦuyum',
sa may teŋa' ira'ɗi:
Ma-Vatɗina ɗuwaŋ hot-yamda van ta gaa voksita,
kay sa ma gawta ka kola.
10Nisi sa gaw ka'na meɗ ɓisi goyo,
yaw sle ma ŋaana va'awa kafe,
sum sa naŋ telsi kay tap jar tokŋa vaŋu
ka kal kalaf hay ziy ma peldetna va'a.
11Sumuna va' kaf ka tiya,
nisi ka gar funa;
slena visi ma ŋaan kaf nisi vulum goyo,
kay gar tin ma suɗ irita visi hiɗi namna.
Ɗuwaŋu, Ma-Vatɗina,
saraŋ nisi ka panan natige?
12Nan di tigiya,
nigi kaf sa ka jik hay hagat waŋŋi,
sargiya, ɗuwgi tige,
las tara ta ŋiray hiɗi lasta van ka su?
Lasta ta nisi lasan hiɗi na'ta,
Ma-Vatɗin watanawa hay buura vi ɦiyda valam ta ŋolda.
13Hay liyn ma kulon pa nam gi kutiyawa,
kay na' kal jar zokonu;
nam gan jawtawa gaa vokanu,
nam hotanawa goy bugolo,
nam noyonawa goyo,
hinanawa goy vun lasta hay buurta kafe.
14Ɓalam jun jukŋa vi jiw-zlata vanawa,
na' slewawa jar tuwa'a,
na' slewawa kulo dekdelanu;
nam geɗ donota vanawa,
Bum-Sumuna hinanawa goyo
hay ɓam sum sa nan fi col kulo voksiɗina.
15Sum sa duura van kaf sa ay hiɗi nanu,
Bum-Sumuna digiɗsiyawa goy vokanu,
nam tok sojenawa katanu,
kay cim sum sa joriyona van goyo;
goor-wayata vi Yuda Bum-Sumuna taya'awa gaa'a.
16Nan ka tiy kayni kisi nisiya, iran ka kus zimiya;
kay sa ma vul teŋ-irta vi tuwamawa goy gine'e hiɗi nanu,
nam ma ay vulan donota,
gurona van donota visi tay loɗi,
kay sa ma gawta donota valam suwawa.
17Siyon meɗ ɓa'awa goyo,
may sa ma teŋa' ira' mayɗi,
sa gawta sa ŋuyi kat Yakubna
Ma-Vatɗina cuksi ayawa kay durumu,
Yerusalem muɗi liwisi jarsiya.
18Ma-Vatɗin hayɗin ɗigere,
kay nan ŋelem gatta valamu.
Humgiya, nigi sumun kafe,
ɗuwgi tuw-tita vanu,
Guro-boyna vanu hiɗi guro-joriyona vanu kalay goy gorvo'o.
19Nan yi nisi sa minanna,
may nisi ketan ketiya,
muliyan-sa-ɗifinna hiɗi sa maariyana
hay hoyok-ziyna van kaf vatawa goyo:
Nisi gar tin kisiya kay hot fi dono'o.
20Ma-Vatɗina ɗuwaŋ lasta van tige,
hayan ka suwa'a,
dikan ka tiya,
kay nan mi sa ma ŋel gatta gasiya,
goy jiya, kew-gaferaŋa ti ɓuraŋawa,
hay kalafi, na' ay ki mitta kay tuwa' nala.
21Nisi humi ala nan ka tiya,
may sa may co kay teŋan iranɗi,
sa gawta van kaf humi kay lasta vanu,
nisi li firiya kay lasta ta naŋ mara' kanta;
buur ma naŋ di kalamna naŋ hinimawa co'o,
nisi ma li ki nan nala kaw.
22Hin jiw-zlata visi kaf co goy vok iraŋ coge.
Naŋ ma li tisiya ki naŋ li tan nan nala kaw,
kuɗ jiw-zlata vanu,
kay tiyta van ka ŋolo,
dikan ka tiy ŋolo kaw.
Currently Selected:
TIYNA VI YEREMIYAS 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001