JOWEL 1
1
Baara ka ti nagata, yita kay hamda
1Ma-Vatɗina di yoboyn tam Jowel, goora vi Petuwel ala:
2Humgi dit kayni nigi sa maariyana,
jakgi humgiya,
nigi sum sa hay nagat kafna,
law ta ki kayn nala li kir sumaygi ka li su?
Lebo li kirgi nigi ka li su?
3Nigi ma vi labar namna mi gurona vigiya,
gurona vigi ma vi labar namna tam guro-misina.
guro-misina ma vi labar namna tam jafsi voksi ɗaw.
4Wa ma hin kuɗ bar ɓok-ɓokona,
baar-jeren tumawa,
wa ma hin kuɗ baar-jerena,
girim-girim tumawa,
wa ma hin kuɗ girim-girimna,
baar-bobon tumawa.
5Zliygi kulo'o,
nigi sum sa hiwiri kay dolayna, tiygiya.
Kay vuɗ gulda-guldana ma li vin ma jibetna hiɗi namna,
nigi ma fum loɗi.
6Kay sum sa dono'o coyawa,
nisi mok nagata vanawa,
nisi dono ŋolo,
sa as ŋaɓsiɗi,
siysi ki siy zlon nala,
Gaŋsi ki gaŋ zlo-tancat nala.
7Nisi ɓulak sinena van ma gulda-guldanawa;
gu-gumna vanu nisi kaam iramawa goy ne; ne',
hom ɓulokomawa goyo,
kaamawa goy gaa'a,
hum gulda-guldana ɓoy goy haɓi.
8Yorgi tuwgiya, ki goot-cat ta darayta
cuk sligar-bolla ta'a,
kay tiy bana' na ma min sla' wulin nala.
9Slen ma vulda hiɗi slen ma yamam goy tam Lawna
may ma hay ziyna valam loɗi;
muliyan-sa-ɗifinna sa sun Ma-Vatɗina,
nisi ka hay godoora.#1:9 godoora kayni mi do'olla.
10Sle ma hay sinen tiy goy kafe,
yam nagat hini goy ɦawa'a
kay alkamaren vati goy kafe.
vin ma jibetna may loɗi,
mula soy goyo.
11Sum sa zum sinena sutaysi toya,
sa pi gulda-guldana ka yor kay fu-alkamarena,
hiɗi fu-orgena,
kay sa fi a feɗ va hay sinen loɗi.
12Gulda-guldan soy goyo,
gu-gumna humam liwekiya,
gu-grenadinna, gu-gomona, gu-pomiyena,
hiɗi gu ma hay sinen kaf humam soy goyo.
Firit ta jar sumuna sleɗay goy kafe.
13Nigi muliyan-sa-ɗifinna,
jungi furgiya, tiygiya,
Yorgi tuwgiya,
nigi sa li lop kulo kay giwin-ma-ɗifinna,
nigiyaya cukgi sligar-bolla tigiya kay ti do'olla,
burgi gaa hiɗi namu,
nigi sa sunda vi Lawna vanu.
Kay vulda hiɗi niyn ma yamam goy vok Ma-Vatɗina
may hay ziyna valam loɗi yo!
14Yigi tuwgi noŋ kaf,
ligi laata,
tokgi sum sa maariyana,
sum sa hay nagat noŋ kaf,
toksi hay ziyna vi Ma-Vatɗina Lawna vigiya,
tiygi tam Ma-Vatɗina.
15Hih! Buurta ta ɦuyumda kuɗa'ta ka co goboyo.
Co ɗawn ti buurta vi Ma-Vatɗina.
Nam ma co'o ki ma gaŋeraŋ-petna ɓulak slen goy nala.
16Tina nay may fum loɗinge.
Firita hiɗi ciriy ma digi-digina
may hay ziyna vi Ma-Vatɗin loɗinge.
17Jaf ma cuki hay sinen soy goyo,
feera hini goy ɦawa'a
zaŋ ma lak wana hini goy ɦawa'a,
kay alkamaren soy goyo.
18Ɗuwgi farayn ka tiy tige?
Farana vi luwayn goyo muɗi bisi,
kay hatna may loɗi,
fukunayna kaw ka ci lasta.
19Nan siwel zawn taŋ naŋu,
Ma-Vatɗina,
kay kut ŋal liyn ma beɗna hay fuldawa,
kay sin-kuta ŋal gu ma hay sinenawa goy kafe.
20Muuriyan ma hay sinen kaw ka siwel taŋu;
kay niyn-ɓatna soy goyo.
Liyn ma beɗna hay fulda kut ŋalamawa goyo.
Currently Selected:
JOWEL 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001