HEBRENA 10
10
1Kay gatta kayn mi ŋus sle ma ŋaana ma min ma'a, na' may ti ŋrata gasita vi slen ma gasinaɗi, kay na'ta hiɗi ɗifinna ma nisi lum dok-dokŋa hay busata busata, na' as ɦur sa kulo tam Lawna goy pasiyak noŋɗi. 2Lali naɗina, nisi hin vulda vi ɗifinnawa ɗisu? Kay nisi sa li girifta na'ta fisi poray goy vatiya sem kep, suluk mara ma hay tap-wida visiya ma ka kitata kisi may loɗi. 3May hay ɗifinna kayni, humsi gisi kay sulukŋa busata busata kaf. 4Kay busuwna vi luway-jufayna hiɗi fok-gamalana as yaw sulukŋ goy noŋɗi.
5Kay na'ta hay li ma Kristu ma hay nagata nam di ala:
Naŋ min ɗifinnaɗi, vuldaɗi kaw,
may naŋ kotan tuwnawa kanu.
6Ɗifin ma ŋal-goyna hiɗi ɗifinna
ma kay sulukŋa kaw dikaŋ may vumɗi,
7Nala nan di'e: ɗuwaŋu nan ka ma'a,
hay ɗerwel ma ɗutina dita ɗoy kan ala:
Kay li minda vaŋ naŋ Lawna.#10:7 Ɗuw Nul 40:7-9.
8Nam di jew ala: Ɗifinna, vulda, ɗifin ma ŋal-goyna, hiɗi ɗifinna ma kay sulukŋa kaw naŋ minimɗi, dikaŋ vumɗi kaw, nam ma li hay hagata kuɗ gatta kaw. 9Bugolda nam di'e: Ɗuwaŋu nan ma ma kay li minda vaŋu. Nam ɦas girifta ma jewna goyo kay tun ma wuliya. 10Hay minda na'ta kayni, hay vulda-goyta vi tuwna vi Yesu Kristu, ma sem kep kay kaf, nay porawa goyo.
11Mul ŋol ma-ɗifinna gigekaw col hay liyna ma lopna valamu, buurta kaf kay li lopna valamu, kay li ɗifin ma nam ka lumna ma as kay yaw sulukŋa goy noŋɗi. 12May namu, hay li ma nam li ɗifin sem kep kay sulukŋa lina, nam musawa gaa gal ɓam ta jufta vi Lawna kay dok-doko, 13nam ka cub kay sa gawta ma muɗ goy mi va ma nam tun selem kalamna. 14Kay hiɗi vulda kep, nam muɗ sa li goy peldetna goy pasiyak ta-ta hay vatɗita.
15Kay kayni mi va ma Ŋusta-Peldetta ka di goy taya. Kay hay li ma bugolda nam di ala:
16Kayni ti bonota ta nan min juna' hiɗi nisiya,
bugol buur namna kayni, din Bum-Sumuna:
Nan ma tun gatna van hay diksiya,
nan ma ɗom kalaf hay yamda-wida visiya.
Nam di mara lo:
17Human ma gan kay sulukŋa visi loɗi,
human ma gan kay jiw-zlata visi loɗi kaw.#10:17 Ɗuw Yer 31:31-34.
18May hay li ma gida kay sulukŋa ka'a, ɗifinna ma kay sulukŋa may loɗi.
TEŊ-IRTA HAY LITA VI SLENA
Teŋ-irta kay col dono'o hay vida
Heb 6:1-20
19Kay nay kaw ɓosiyonna, nay fi butta-goytawa kay cuk kalafi hay liyn ma peldetna hay busuwna vi Yesu Kristu, 20Liyn ma Yesu malam goyo kaya ki hagata ta wulita ta iriya kaw, raw hay sligar-gaɓayna, kayn min di'e hay sliwna valamu; 21nay fi mul ŋol ma-ɗifinna ma tuni kay ziyda vi Lawna. 22nay ɦuray goboy talamu hiɗi dikga ta gasita, hiɗi vida ta hobay ŋaa'a, dikay muzi goy peldet kay tap-wida joota, tuway kaw muzi goyo hiɗi niyn ma kilira. 23Lay di-goyta kay cubta-sle'ta vaya bay giriŋi, kay nam ma li deŋga nam mi gasiya kaw. 24Gatay tuway dono'o jar-tuwaya, kay nay ma zut tuwaya kay li minda hiɗi lop ma ŋaana kaw. 25Nay ma hin dakka vaya goy ki segen ka li naɗi, may gatay jar-tuwaya tuwaya, li kayni ŋol suwa hay li ma nigi wi buura ka ma goboyo.
26Kay la nay li suluku hiɗi minda vaya bugol nay fi wida vi gasita fina, hay na'ta kayni, ɗifin ma kay sulukŋa may hini loɗi, 27may narta joo ŋolo kay kitata hiɗi kuta ta zal wizik-wizikka ma mut sa ŋel gatta! 28La sa raw gatta vi Musus goyo, nam ma fi cita-goyta bay kir-hawta, kuɗ di-goyta vi sa di-goyta ma' lebo ɦidi. 29Wurakŋa joo'o ŋol suw kayni ma ŋamis kay sa ma tay goora vi Lawna gaa kuɗ selemu, ɗuw busuwna vi bonota ma nam muɗi goy peldet hiɗi namna ki va ma waa'a nala, ma ŋul Ŋusta vi slugota kaw, nigi vara' naɗi su? 30Kay nay wi nam ma di ala: Hot joot kayn mi nanu, wurak joot kay joota mi nanu. Mara lo: Bum-Sumuna ma ka kitata kay sumuna valamu. 31Joo ŋolo (kay sana) kay nig gaa hay ɓam Lawn ma irina pa.
32May humgi jak' kay buur ma jewna ma, hay li ma nigi fi haraŋa fi, nigi lak dono hay duur ŋolla hay lasta; 33nigi muɗi ki va ma sumun ɗuwumu, cen kuɗum ɦawa kaw nala, hay ŋulda hiɗi zumalda, hay liy hena lo, nigi tap hay lasta vi nisi sa ka las kaw. 34Kay sa daŋgayna kaw muɗi haw kirgiya, nigi va'awa tigi hiɗi firita kay nisi yaw farayna vigiya, kay nigi wi ala nigi ka hiɗi farayna ma ŋaa suwna ma mus dok-dokŋa kaw. 35Nala vida vigi ta wurakŋa juni kuɗa' ŋolda nigi ma hina' goyɗi! 36Nigi yiya kay so tuwgiya, kay hay li ma nigi li minda vi Lawna lina, nigi ma fi va ma Lawn ŋamay tigina. 37Lo,
kay liyn neeɗa, kiɗay ne' ɦawa,
nam ma min ma'a ma ma'a,
nam ma musayɗi,
38Ma ɗigera vanu ma mus iriya kuɗ vida.
May hay li ma nam hotawa goy bugolomu,
ciwta van may firi kalam noŋɗi.#10:38 Ɗuw hay Hab 2:3-4.
39May nay say si sa hot bugolaya kay tuɗ tam ba-goytaɗi, may jar nisi sa vi'e, tam su'da vi ciwta visiya.
Currently Selected:
HEBRENA 10: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001