HEBRENA 1
1
Yam lawta
Yoh 1:1-3; Kol 1:15-17
1Hay li ma jew ɓa-ɓana, Lawna law sem ŋolo hay hagata mara'a mara'a hay sa jobta-Lawna kaw tam sumiyaya, 2May hay buur ma cawn wulin lakŋi, nam law tayawa hay goora valamu, ma nam tunum kay slen kaf hay vocota, nam ma nam kot slen kaf hiɗi namna kaw. 3Goor namna gajijita vi Lawna wile goy hay tuwam pa, nam ŋray ca hiɗi namu kaw, ma ziy slen pet kulo'o hiɗi donota vi yoboyna valamu, hay li ma nam vat hiɗi poora vi sulukŋa vatna, nam musawa gaa gal ɓamta jufta vi Lawna ma gaŋeraŋ-petna hay liyn ma Kulo-Jamna, 4nam muɗi ŋolo suw sa sunda-wuralawna, ki nam hay vocota fi semda ta tiy ŋaa'a suwsiya kaw.
Yesu Kristu ŋol suw sa sunda-wuralawna
5Tam Sunda-Wuralawna marige ma Lawna di ala:
Naŋ mi goora vanu,
nan vuɗaŋawa vaydi na?
Lo nam di ala:
Nan min mus mi bulumu,
nam ma mus mi goora vanu kaw?#1:5 Ɗuw kayni hay Nul 2:7; 2 Sam 7:14.
6May hay li ma nam mar ma vuɗi jewna hay nagata, lo nam di'e:
Sunda-Wuralawna vi Lawna kaf ma girifimu,
7Nam di kay sa sunda-wuralawna ala:
Nam muɗ sa sunda-wuralawna valamu goy simeɗna,
sa sunda valamu nam muɗsi goy sin-kuta.#1:7 Ɗuw kayni hay Gsm 32:43; Nul 104:4.
8May kay goora nam di'e:
Zlamda-mulda vaŋ naŋ Lawna ka ta-ta
hay vatɗita,
lo,
Zugulda mulda vaŋu kayni ti zugulda ta ɗigere.
9Naŋ min ɗigertawa, may ka
gawtawa hiɗi bay-ɗigerta;
kay na'ta Lawna, Lawna vaŋ
ɦok mul ma firita kaŋawa
suw nuriyoŋŋa kafe.#1:9 Ɗuw Nul 45:7-8.
10Di mara lo ala:
Naŋu Bum-Sumuna,
hay cawa'ta tunita naŋ kot nagata,
dukalawna kayni mi lopna vi ɓaŋu;
11Nam ma ɓulak goyo, may naŋ ma musa;
sle namna kaf ma muɗ busaya ki sligara nala;
12Naŋ ma ɗutum ki sligar ma cukŋa nala kaw,
nam ma muɗ ki sligar ma kepna nala,
may naŋ ka dok-dok ki jew nala,
busata vaŋ fi vatɗi kaw.#1:12 Fi kayni hay Nul 102:26-28; Es 51:6.
13Tam Sunda-Wuralawna marige ma nam di ala:
Musaŋ hay gal ɓan ta jufta,
ta-ta nan muɗ sa gawt kaŋŋa va ma
naŋ tun wur-seŋ kalamna?#1:13 Fi kayni hay Nul 110:1.
14Nisi kaf say si ŋusiyana sa sunda vi Lawna sa cuki goyo kay li sunda kay sa as fi su'da hay vocota ɗisu?
Currently Selected:
HEBRENA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001