HABAKUK 1
1
1Humgi labar kayni, ma Ma-Vatɗina ɗekem kir sa ma jobta-Lawna Habakuk.
2Ma-Vatɗina,
nan min yaŋu kay naŋ ma gutanu,
may naŋ human ɗawn citige?
Nan ka siwel taŋ ala ɦawlat ɓa' suwiya,
may naŋ min gutanɗi su?
3Naŋ min ala nan wi jiw-zlata vi sumun hiɗi iranu kay mige?
Naŋ min sar bay-ɗigerta hiɗi iraŋu kay mige?
ɦawlat hiɗi curo'da ka tuma dok-doko kay mige?
Nefta ka'a, ci-wayt ka fok kulo dok-doko kaw.
4Vun-ma-gatna nisi muɗumawa dirlaya,
ɗigerta donota va' may loɗi;
kay sa ma bay-ɗigera
kitata valam hot vi sa ma ɗigera,
law ma ɗigera ŋolom muɗi goy kisi sin kaf.
5Ɗuwgiya, cukgi irgi jar jaf-sumuna,
sargi tige,
lakgi kiliŋ, muɗgi ɦuyum',
kay hay buur ma nigi hayamna lakŋi,
nan ka li lop mara'a,
law namna la vigit selem kaw,
nigi as a vumɗi.
6Humgiya, nan min hin sum sa Kaldeen kalay jargiya,
sum sa donosi suwiya,
kir-hawt may haysi noŋɗi.
Naga ma ginena nisi ŋuyi hayam kaf,
liyna vi sum segen nisi yawam bay lopo kaw,
7Nisi as li sa ɦuyum',
kay sa col digsiɗi,
nisi col dita visi kayn kuɗ donota visi kay tuwsiya.
8Kulumayna visi koloy ŋolo suw zinilla,
hefteŋ ŋolo suw keŋŋa ma gar hay vulatita,
sa ɓe kay kulumayna zlar goyo,
nisi may goy gine pa, nam pir kulo gif-gif',
ki bakŋa ma min ti sliwn vokom waŋ' nala.
9Sum nisin kaf co kayn hiɗi donota visiya,
irsi cuki goy voksi ŋiresl',
nisi mol sum sa nisi yawsin yam tuwsi ki ŋeslna nala.
10Muliyan kirsi kayn mi va ma waa'a;
Yeriman kirsi kayn mi va ma liw ɦawa,
gulmun ma ŋuyi tam hoyok-ziyna
nisi liw liwi hiɗi nam ɦawa,
nisi mol nagan yam tuwamu,
sli hoyok-ziyna.
11Bugolda nisi li hiɗi dono lo,
nisi kala, li hiɗi wasta,
Lawna visi kayn mi donota visiya tuta.
12May Ma-Vatɗina,
hay jew pa naŋu mi Lawna vanu,
Ma-Vatɗina vanu,
ma peldetna vanu kaw ɗisu?
Numa as mitɗi! Ma-Vatɗina,
naŋ tun sum nisin hay nagat kayni kay ka kitatɗi su?
Naŋ hiɗiyna vanu,
naŋ vul donot mi sum nisin kayni,
kay gat vun sumuna vaŋu ɗisu?
13Kay iraŋ ma peldetna ŋaf hiɗi jootɗi,
naŋ as ɗuw jiw-zlatɗi,
iraŋ min ɗuw sa ma tun lawt kay sumuna vaŋu kay mige?
Naŋ mus kiliŋ hay li ma sa joona
ka las sum sa ɗigera kay mige?
14Wulini naŋ min li sumuna
ki kuluf ma goloŋ jar niyn nala,
ki sle ma ɦarmatna
ma sa ma dum lawam mayɗin nala kay mige?
15Sa ma ciwna yawam kulo hiɗi siwitna,
nam yawam kulo hay dena,
nam tokom yalam hay jella,
nala firit kal hayam may.
16Nam li ɗifin mi dena valamu,
li ɗifin ma his fayna tam jella valamu;
kay tina valamu ma ŋaana ma hobom hayamna,
nam fum kayn kuɗ slen namna cani.
17Nisi ma gulut dena visi goy dok-dok,
kuɗ kayni nam ma ko dena valam goyo lebo,
ma ŋat jaf-sumun goy bay kir-hawta su?
Currently Selected:
HABAKUK 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001