EFESENA 1
1
Ɗek-tuwta hiɗi gi-deɓta
1Paulus, apostolla vi Kristu Yesu, kuɗ minda vi Lawna, tam sa peldetna sa hay Efesus sa vi hay Kristu Yesu: 2Lawna buya hiɗi Bum-Sumuna vaya vulgi slugota hiɗi sle'ta tage.
Asta ŋolda vi bonota ta vuli tam sa vilekay-goyna
Rom 8:15-17, 28-30
3Suburta tam Lawna hiɗi bum Bum-sumuna vaya Yesu Kristu, ma gay bolawa hiɗi bolda kaf ta hay Ŋusta hay liyna ma kulona hay Kristu. 4Ki Lawna vilekay goyo hay namu, jew caw nagata bay tun tuwa, kayni kay nay ma lak peldete, bay joota kaw vok-iramu. Hay minda valamu, 5nam ŋaɓay goy jewe hay Yesu Kristu kay nam fi muɗay goy gurona valamu, hay Yesu Kristu kuɗ varta ŋaata valamu, 6tam suburta ta gajijita vi slugota valamu ta nam vulaya hay nam ma hayam kamna.
7Hay namu, nay fi butta-goytawa hay busuwna valamu, vulda-gida kay sulukŋa hay asta-ŋolda vi slugota valamu, 8ta nam vula' goy ŋol suw asa hay yalda hiɗi yamda-wida pet. 9Hay li ma nam ɗek ŋayayta vi minda valamu, kuɗ varta ŋaata valamu ta nam vilek hayam kay tuwamu, 10kay tok yam slen kaf hay Kristu, slen kaf ma ka hay dukalawna hiɗi ma gaa kay nagatna kaw, kay tuɗum tam dabta valamu hay li ma liyna valam asawa.
11Hay namu nay vilekay goyo kay lak goy ir valamu, ŋaɓay goy jewe kuɗ minda vi nam ma li slen kaf kuɗ minda valamu, 12kay nay ma muɗ goy mi suburta tam gajijita valamu, nay sa ka cub Kristu hiɗi sle'ta jewe.
13Hay namu kaw, hay li ma nigi hum yoboyna vi gasita humna, labara ma firina vi su'da vigiya, hay namu, hay li ma nigi vi'e, nigi hob hiɗi Ŋusta ta ay deŋiya, na'a ta muɗi ti vocota vaya. 14Na'a ta vulay deŋga kay vocota vaya, tam butta-goyta vi sumuna sa Lawna gussina kay subur gajijita valamu.
Siɗawta vi Paulus kay sum sa Efesena
Kol 1:3-6, 9-13; Fil 2:9-11
15Kay na'ta nan kaw, hay li nan hum kay vida vigiya hay Bum-sumuna Yesu, hiɗi minda vigi ta nigi la' tam sa peldetna kaf, 16gi-deɓta van ta kigita nan ra' goyɗi: Nan ka yigi segi dok-dok hay siɗawta van kaf; 17kay Lawna vi Bum-sumuna vay Yesu Kristu, bum gajijita ma vulgi Ŋusta ta yalla hiɗi ŋayayta ta nigi ma wum hiɗi na'ta. 18kay nam ma moɗ ira vi dikgi goy haraŋi, a nigi ma wi ala cubta-sle'ta ta nam yay ta'ta na' ir natage, a wi ŋolda vi gajijita vi vocota valam ta jar sa peldetna, 19a wi lo ir natage gaŋeraŋa valamu ma ŋolla li tay nay sa viyna kuɗ lopna vi donota valamu. 20Ma nam muɗum li lopo hay Kristu hay li ma nam dayam kulo jar sa mitina pa, musum hay gal ɓam ma jufna valamu hay liyn ma kulona, 21musum kulo kay muliyan kaf, donota kaf, ŋolda kaf, gaŋeraŋa kaf, musum kulo kay semda ma yiyna kaf, may kay nagata ta tanta tutaɗi, kay nagata ta vokka kaw. 22Nam cuk slen kaf gaa kuɗ selemu vulum yamda vi tapta, 23kayni mi tuwamu, hobta vi nam ma hob kaf hay kafe.
Currently Selected:
EFESENA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001