SA MA KUSTA 1
1
Slen kaf mi va ma waa'a
1Kayni mi dita vi sa ma kusta, goora vi David, mulla vi Yerusalem. 2Slen kaf mi va waa'a, din mi sa ma kusta, slen kaf mi va waa'a.
3Ŋaata ma san fum kuɗ makka vi lop ma nam lum gaa kuɗ fatta kafna mi mige? 4Jaf mara kala, jaf mara vurna'aya, may nagat ka dok-dok hay liya'na waŋ'. 5Fatta day kulo'o, na' ɗig gaa'a; na' gar liyna ma na' dayay hay pana kay hot day mara lo. 6Simeɗna biw hay gal ma kayamna, hot biw hay gal ma gaana, gi duwli lo, hot gi duwli kayn hay liyam na kay'. 7Niy-lum ma gurayna kaf jaŋ kayn hay niy-lum ma ŋolla, may niy-lum ma ŋolla hob noŋɗi, dok-dok niy-lum ma gurayna ka jaŋ malam na kay'. 8Slen kaf ka mak tuwam kay li lopo, san as kay di kayn diy loɗi; ira fi mak kay ɗuwɗi, humda fi mak kay humɗi kaw. 9Va ma aya, mi va ma min co'o, va ma liyna mi va ma min li'e kaw, va ma ala kayni wuliya gaa kuɗ fatta mayɗi. 10La va mara ka'a ma nay di kalam ala van kayni wuliya ni, va namna ay liy hay busa ma kalay ɓa-ɓan li'. 11Humay may gay kay slena ma kalay jew ɓa-ɓan loɗi, nala slen ma min co'o, nisi sa bugolomna humsi ma gisi kalam loɗi kaw.
Lopna kaw mi va ma waa'a
12Nan sa ma kusta, nan ti mulda kay sa Israyella hay Yerusalem. 13Nan tun varta vanu hiɗi yali kay gar a fek slen kaf ma ka li gaa kay nagata, nam kaf kayni mi va ma lop ŋolo ma Lawna hot yam sum-wuran gaa kuɗumu. 14Nan ɗuw lopna kaf ma ka li gaa kuɗ fatta; ɗuwgiya, nam kaf kayni mi va ma waa'a, mi jaŋga kuɗ simeɗna kaw. 15Va ma hormosina as moɗ kuloɗi, va ma mayɗina as kal hay ŋaɓtaɗi kaw. 16Nan ka ɗi hay dikan ala: Nan wulawa hiɗi yalda, nisi kaf sa ti mulda jewanu hay Yerusalem nan suwsiyawa hiɗi yalda kaw, nan wi yalda hiɗi yamda-wida ŋolo kaw. 17Nan vul dikan goyo kay gar yalda, kay gar bay-yalda hiɗi ɦay-ɦayta kaw; nan wi goy haraŋ ala nam kaf kayni mi va waa'a, mi jaŋga kuɗ simeɗna kaw. 18Kay hiɗi wida vi slen ŋolo, yorta jor ŋolo, hiɗi yamda-wida ŋolo, lasta jor ŋolo may.
Currently Selected:
SA MA KUSTA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001