GATTA-SEM-MA'TA 1
1
GI-HUMDA KAY SLE MA LI JEWNA
Nisi hin Sinay, kaliya
1Kayni mi yoboyn ma Musus dum tam sa Israyel kafna; goy gal hena vi niy-lumna Yordan, hay fulda, hay Araba, ɗiger vok Suf, jar Paran, Tofel, Laban, Hatserot hiɗi Di-Zahab. 2Fokay hay Horeb pa, jik hay hagata vi hiɗiyt Seyir kay kal hay Kades-Barneya kayni, tuɗ ir buur doogo yam kep. 3Hay buurta jewta vi til ma doogo yam kepna vi busata dok-fiɗit kayni, sle ma Ma-Vatɗin dumi mi Mususna nam dum tam sa Israyel kafe. 4Kayni bugol liyn ma nisi kol kay Sihon mulla vi sa Amoriyana, sa ka lakay ziy hay Hesbon, hiɗi Og, mulla vi Basan, ma ka musi hay Astarot hiɗi Edrey. 5Goy gal hena vi Yordan, hay nagata vi Mowab, Musus tun caw visi caw gatta na'ta, nam ka di ala:
6Ma-Vatɗina Lawna vaya law taya hay Horeb ala: Hiɗiyt zawni nigi musawa ka' ŋolo. 7Hina' bugolgiya, tuɗgiya, tuɗgi kay hiɗiyta vi sa Amoriyana, hiɗi liyn ma gala'na kaf, hay Araba, kulo kay hiɗiyna, hay Sevelat hay Negeb hay galla vi niy-lumna, hay nagata vi sa Kanaaniyana, hay Libaŋ kaw, ta-ta kat niy-lum ma ŋolla, vun niy-lumna Eufrata. 8Humgiya, nan tun nagat vokgiya; tuɗgiya, sligi nagata ta Ma-Vatɗina yi va kalamu kay vula' mi sumaygiya, mi Abraham, mi Isaak, mi Yakub kaw, nam min vulsita, mi jafna visi sa bugolsina kaw.
9Hay liy namna kayni, nan di tigi ala: Nan van kep as kay ziygiɗi, 10Ma-Vatɗina Lawna vigiya biyagiyawa, vaydi kaw nigi muɗi ŋol dak-dak ki mislek ma dukalawn nala. 11Hin Ma-Vatɗina Lawna vi sumaygiya muɗgi ŋolo sem birimi, hinim gi bol kigi kaw ki nam di nala. 12Nan van kep as ziy jak ma nekŋa vigiya hiɗi ci-wayta vigi ɗawn ziytige? 13Yawgi sum sa yali, sa wi slen ŋolo, sa sumuna vigi wisi kaf, nan ma tunsi kulo kigiya. 14Nigi hotan dit ala: Va ma naŋ job kay lumna kayni nam mi va ma ŋaa'a. 15Ki kayn nala sum sa nigi tunsi ŋol kay jafna vigiya nan yawsiya, sum sa yali, sa sumun wisiya, nan tunsi vokgiya ki sa ŋulona vi sum sa birimna, sa ŋulona vi sum sa kisna, sa ŋulona vi sum sa dok-vaslna hiɗi sa ŋulona vi sum sa doogona kaw, ki nisi si sa ŋulona vi sojena hay jafna vigi nala. 16Hay liy namna kayni nan vul hagata tam sa ka kitata vigiya ala: Humgi kuɗ ɓosiyogina, kaagi kitat kay ɓasuki marige kaw hay hagata va'a kuɗ law ma jaram hiɗi ɓasulumna hiɗi sa ma pulla. 17Hay li ma nigi ka kitata vigi ɗawni, vargi kay ŋolda vi sanɗi, nigi ma hum kuɗ sum sa gurayna hiɗi sa ŋulona; nigi ma li nar kay saɗi, kay kitat kayni na' vi Lawna, la law tara suwgiyawa, nigi ma mara' vokanu, kay nan ma huma'a. 18Ki kayn nala nan vulgi hagata kay sle ma nigi ma lumna kafe.
Nisi yaw kulo'o hay Kades
19Nay yaways hay Horeb pa, nay ŋuy ful na'ta ta ŋolda ta lop ŋolda ta nigi wa'ta kayni; nay sli hagata vi hiɗiyta vi sa Amoriyana, ki Ma-Vatɗina Lawna vaya di taya nala, nay co hay Kades-Barneya. 20Nan digi ala: Nigi coowa kat hiɗiyta vi sa Amoriyana ta Ma-Vatɗina Lawna vaya min vulaya. 21humgiya, Ma-Vatɗina Lawna vigiya tun nagat goy vokgiya, tuɗgiya, sligita, ki Ma-Vatɗina Lawna vi sumaygiya di nala; ligi narɗi, tuwgi wirgiɗi. 22Nigi kaf co vok iranu, nigi ka di tan ala: Cukay sum sara vokaya kay fek nagata, kay vay labara kay hagata ta nay min jik haya'ta, kay hoyok-ziyn ma nay ma co hayamna. 23Var na'ta kayn li kiran ŋaa'a, nala nan yaw sumun doogo yam ma' jargiya, sa kep kuɗ jaf kep kep may. 24Nisi kaliya, jik kulo kay hiɗiyna, nisi co hay lokŋa vi Eskol, nisi fekemu. 25Vuɗna vi sle ma hay nagatna nisi yawam hay ɓisiya, vulum kirma'a, nisi vulma labara, ka di tuma ala: Nagata na'ta ta Ma-Vatɗina Lawna vay vulgita kayni ti naga ta ŋaa'a. 26May nigi may mini kay tuɗ haya'ɗi, slen ma Ma-Vatɗina Lawna vigi digitna nigi min li kuɗumɗi. 27Nigi ŋurnay kalaf hay guɗukŋa vigiya, nigi di ala: Ma-Vatɗin yaway ay goy hay nagata Egipte pa kayni kay nam ka gaw hiɗi naya, kay nam min vulay goy hay ɓam sum sa Amoriyana kay nisi ma vatay goyo. 28Nay ma jikay arige? Bosiyayna muɗay maŋaya hay li ma nisi di ala: Sum nisin kayni ŋulo'o, fiyok ŋolo kaw, suway naya; hoyok-ziy ma nisi hayamna mi hoyok-ziy ma donona, gulmun ma talamna co ta-ta kulo dukalawna, gurona vi Anak kaw numa wisi aya. 29Nan digiya, ligi ɦuyumɗi, tuwgi muɗ nar kirsiɗi. 30Ma-Vatɗina Lawna vigiya ma ka tuɗ vokgiya, nam kay tuwamu ma dur hay baŋalgiya, ki nam li ay kirgiya hay Egipte nala kaw, 31bugol kayni, hay fulda, hay li ma nigi wi ala Ma-Vatɗina ka ziygiya ki san ziy goora valam nala, hay hagat kaf ta nigi poy haya ta-ta cota vigiya hay liyn tani, 32hiɗi kayn kaf nigi min vi kuɗ Ma-Vatɗina Lawna vigiɗi, 33nam ma ka tuɗ vokgi hay hagata kay gargi liyn ma nigi lak haya, hay henjeta nam ka hay ɗugul ma kuta kay ɗekgi hagata ta nigi as tuɗ haya'ta, hay falayta nam ka hay ɗugulla.
34Ma-Vatɗina hum winekŋa vigiya, kuɗ dikam ma ɓulakŋa, nam yi slen kalamu ka di ala: 35Sum nisin sa joon tani sa kuɗsi kep kaw, nagata ŋaata ta nan yi va kanu kay vula' mi sumaysit waŋŋi, irsi ma wa' noŋɗi. 36Ma wa' mi Kaleb goora vi Yefune tuta. Nam ma wa'a, nan ma vula' malam namu hiɗi gurona valamu, kay nam hum kuɗ sle ma Ma-Vatɗin dumtin kafe. 37Ma-Vatɗina dikam ɓulak katan nan kaw, kuɗgi nigiya, kay nam di ala naŋ kaw, naŋ as kal hay naga na'taɗi. 38Yosuwa goora vi Nun, ma sunda vaŋu ma kala, naŋ vulum kursulita kay nagat na'ta vula' mi sa Israyel ɗawn mi namu. 39Guro-ŋolona vigiya sa nigi di ala sumun ma vurumsiyana, gurona vigiya sa vaydi may wi ŋaatɗi wi jootɗi kawna, ma kal haya' ɗawn si nisiya, nan vul naga na'ta ɗawn misi nisiya, ma sli naga na'ta ɗawn si nisiya. 40May nigiya, muɗgi ŋorgiya, tuɗgi hay fulda, hay galla vi niy-lum ma slawna.
41Nigi hot dit tan ala: Numa li sulukawa kat Ma-Vatɗina, numa min tuɗa, numa as li duura, ki Ma-Vatɗina Lawna vuma'a vul hagat katma nala. Nala nigiya, gigekaw jun sle ma duura valam hay furamu, nigi varay ala jik kulo kay hiɗiyn kayni may lop noŋɗi. 42Ma-Vatɗina hot di tan ala: Naŋ ma disiya: Tuɗgi kay dursiɗi, kay nan may hiɗi nigiɗi, kay la naɗi sa gawta ma kol kigiya. 43Nan digiya, may nigi min humɗi, nigi ŋel dita vi Ma-Vatɗina, nigi muni kulo kay hiɗiyt jaŋi hay ɦiyda vigi ɦawa nala. 44Ki kayn nala sa Amoriyana sa ka kulo kay hiɗiyta munay goy kirgi jaŋi, nisi jaŋ kuɗgiya, ki yumna ka li nala, nisi cigiya hay Seyir ta-ta hay Horma. 45Hay hotta vigiya, nigi tiy vok Ma-Vatɗina; may Ma-Vatɗin min humgi delgiɗi, min jak humam tigiɗi kaw, 46Nigi lakay hay Kades lo, nigi musi ɗawn ta-ta.
Currently Selected:
GATTA-SEM-MA'TA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001