DANIEL 1
1
Daniel hay Babilon
1Hay busata ɦidita vi Yehoyakim hay mulda vi Yuda, Nebukadnesar mul ma Babilon co'o, nam mot Yerusalem. 2Bum-Sumuna vul Yehoyakim mulla vi Yuda hay ɓalamu, hiɗi galla vi slen ma ka hay ziyda vi Lawna kaw. Nam jokom hay nagata Sineyar,#1:2 Sineyar ti Mesopotamiya. hay ziyna vi lawayna valamu. Nam lak jakŋa hay timgilla vi ziyda vi lawayna valamu.
3Mulla di tam Aspenaz, ma tuni ŋol kay sa sunna sa patayna, kay nam ma maram sa as jar sa Israyella, hay jafna vi mulda, kuɗ jafna vi sum sa ŋulona kaw. 4Guro-jufay nisina may tisiɗi, sa ɗuw jifiy ŋolo, sa yalla visi asay ŋaa'a ŋolo, wida visi asay ŋolo, asay kay hat ŋolo kaw, sa nagay kay sun hay ziyna vi mulla, a nisi ma hat ɗota hiɗi vunna vi Kaldeena kaw. 5Mulla ɗeksi goy kay tina ma nisi as kay tum hay buurta buurta kafna, hiɗi vinna ma nisi as cumna. Kay nisi min hatsi ir busat ɦidi. Hay li ma busat ɦidi vatawana, nisi ma lak sun vok mulla. 6Gurona vi yuda sa jarsin kayni mi Daniel, Hananiya, Mikayel hiɗi Azariya. 7Ma ŋolla vi sa patayna kaasi sem mara'a, Daniel nam kaam selem ala Belsasar, Hananiya mi Sadrak, Mikayel mi Mesak, Azariya mi Abed-Nego may.
8May Daniel so'ot dikamu a nam min muɗ tuwam liwisi hiɗi tina ma jibetna vi mulla hiɗi dolayna ma mulla ka cumnaɗi, nala nam giɗel del ma ŋolla vi sa patayna kay nam ma muɗum liwisi hiɗi tin namnaɗi. 9Wulini Lawna hin Daniel fi ŋaata hiɗi slugota vok ir ma ŋolla vi sa patayna. 10Ma ŋolla vi sa patayna di tam Daniel: Nan li nari kay mulla bum-ziyna vanu, nam ma ɗekan kay slen ma nigi ma ti'e hiɗi ci'e. Kay hay li ma vokgiya ma ɗuw kiram joo'o suw nuroygin ɗawni, nan ma mar joot kanu vokom nam mulla! 11Kay na'ta Daniel di tam sa ma ŋomda ma sa ma ŋolla vi sa patayna colom kay ŋom Daniel, Hananiya, Mikayel hiɗi Azariya Ala: 12Kemkem', wakaŋ sa sunda vaŋu ir buur doogo, hinsi vulma hadafna a ti'e, niyna a ci'e kawge, 13bugol kayni naŋ ma sarma vokma'a hiɗi iraŋu, naŋ ma sar vok segena kaw sa ka ti tin ma jibetna vi mulla, bugolda naŋ ma li hiɗi sa sunda vaŋu kuɗ va ma iraŋ wi'e. 14Nala nam hum jobta visiya, nam waksi ir buur doogo. 15Hay ma buur doogo vatawana, voksiya muɗi ɗuw jifiy suwa, nisi ɗoray suw guron sa ka ti tin ma ŋaana vi mulla. 16Nala sa ma ŋomsina min so kay vulsi tin ma jibetna hiɗi vinna loɗi, nam vulsit kayni mi hadafna ɦawa.
17Guro joriyo sa fiɗin lakŋi Lawna vulsi wida-yalla, hatta hay ɗot kaf, hiɗi yalla kaw, Daniel di caw sle ma vul tuwam kir sana hiɗi duwayta goy kaf.
18Hay li ma buura asawa kay marsi tam mulla, ma ŋolla vi sa sunna marsi vok ir Nebukadnesar. 19Mulla kus yoboyn hiɗi nisiya, jarsi kaf kayni sa ma ŋray hiɗi Daniel, Hananiya, Mikayel, hiɗi Azariya mayɗi. Kay na'ta nisi lakay sun mulla. 20Hay slen ma yalla hiɗi wida kaf ma mulla ka job kalamna, nam fisi ŋaa'a sem doogo suw sa li gul-yalda hiɗi sa wi caw mislekŋa sa ka hay nagata valamu kafe. 21Daniel ay ɗawni ta-ta hay busata ta Sirus kal hay mulda.
Currently Selected:
DANIEL 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001