1 SAMUEL 29

Sa Filistin digiɗ David goy jar sojena visiya

1Sum sa Filistin tok vokŋa visi kaf hay Afek, sa Israyella tun vokŋa visi goboy hiɗi niy-ma-riŋŋa vi Yisreel. 2Sa ŋulona vi Filistina ka tuɗ voksiya, segena hiɗi vokŋ kuɗsi kis, segena hiɗi vokŋ kuɗsi birimi may. David hiɗi vokŋa valamu vokŋa visi ay goy cawi hiɗi Akis kuɗsiya. 3sa ŋulona vi sa Filistin di'e: Sum sa Hebren cani lum tan kayn mi mige? Akis hot dita tam sa ŋulona vi Filistin ala: Zawni mi David, ma sunda vi Sawul mulla vi Israyella. Musi ŋolo nam ka hiɗi nan tani, hay cota valam pa ta-ta vaydi nan may fi va ne' ma joo hayamɗi. 4May sa ŋulona vi sa Filistina muɗ ɦiy kat Akis, nisi dumu: Digiɗaŋ san kayni, hinim hot hay liyn ma naŋ musum hayamna; hinim tuɗ hiɗi nay vun duurɗi, kay a nam ma muɗ diram kaya hay duurɗi. San kayni as muɗ tuwam ŋaa'a kir mulamna kayni, hay li ma nam co tam mulamna hiɗi yam sumuna vay hay ɓalamna ɗisu? 5Kayni mi David ma nisi ka gi nul kalamu pir nul kaw ala:

Sawul ci sumun birimi,

David ci sumun birim doogona ɗisu?

6Akis yi David dumu: Ma-Vatɗin ka iriya, naŋ mi sa ma ɗigere, dikaŋ ŋaa'a kay waŋ vun duura hiɗi nanu, kay hay buur ma naŋ co tan pa ta-ta vaydi, nan may fi va ma joo hayaŋɗi; may sa ŋulona vanu naŋ may kirsi ŋaaɗi. 7Wulin kayni naŋ ma hot vo'o hay toyta, kay naŋ ma li va ma joo kir sa ŋulona vi sa Filistinɗi. 8David di tam Akis: May nan lum mi mige? Naŋ fum joo hay dikan mi mige, hay cota van taŋ pa ta-ta vaydi? Lebo nan tuɗ dur sum sa gawta vi mulla vanɗi kay mige? 9Akis hot dit tam David: Nan wi kayni, kay naŋ kiran ŋaa'a ŋolo ki sunda-wuralawn nala; may sa ŋulona vi Filistin ka di ala: Naŋ ma tuɗis dur hiɗi numaɗi. 10Ki kayn nala, fokaŋ kulo'o graw culum culum, naŋu hiɗi sa sunda vanu sa co kuɗaŋu; yawgi kulo graw culum culum, hay li ma nigi wi haraŋawa, nigi ma kalgi de'.

11David hiɗi sumuna valamu yaw kulo hay ŋarpita, kay kal hay graw culumta, kay hot hay nagata vi sa Filistina. May sa Filistin kalay hay Yisreel.

Currently Selected:

1 SAMUEL 29: Massana

Highlight

Copy

Compare