1 SAMUEL 27

David hay nagata vi sa Filistina

1David di tuwam ala: Li ŋalɗina, fat tara kep Sawul ma can goyo. ŋaat kayni nan ma pir goy hay nagata vi sa Filistina, kay a Sawul ma garan hay nagata vi Israyel loɗi; ki kayn nala nan ma hulot goy hay ɓalamu. 2David fokay kulo'o, namu hiɗi sumuna valamu sa kis-karkiya sa ay hiɗi namna, nisi kal goy vi Akis, goora vi Mawok, mulla vi Gat. 3David hiɗi sumuna valamu lak hay Gat kat Akis; gigekaw hiɗi jafna valam kuɗumu kuɗumu. David ka hiɗi boyna valam sa ma'n kuɗumu: Ahinowam ta Yisreelta, hiɗi Abigayil ta Karmelta, cata vi Nabal. 4Hay li ma Sawul hum labara ala David pirawa hay Gat, nam min slum giɗerem loɗi.

5David di tam Akis: La nan fi slugotawa vok iraŋu ni, hay nagata vaŋ tani naŋ ma vulan liyn hay hoyok-ziy mara kepe kay nan ma mus haya; kay sa ma sunda vaŋu as mus hiɗi naŋ kep hay hoyok-ziy ma mulda tuni hayna ɗawn mustige? 6Hay buur na'ta de', Akis vulum Siklag. Kuɗ kayni Siklag na' muɗi nagata vi muliyana vi Yuda ta-ta vaydi. 7Liyn ma David mus hay nagata vi Filistina co noŋ pet busat kep hiɗi til fiɗi. 8David hiɗi sumuna valamu ka tuɗ goyo kay mok sum sa Gesuriyena, sa Gizriyena hiɗi sa Amalekŋa; kay sum nisina li ziyn hay liyn ma ɓa-ɓan kayni hay liy namna, hay galla vi Sur ta-ta hay nagat Egipte. 9David ka ti sum nisin ɓuraŋi; boyn kaw jufayn kaw nam may hin mara kuɗsi iri noŋɗi, nam ka yaw fok-dimina, luwayna, kurona, lamgana, sligara, bugolda nam hot hay nagata vi Akis. 10Hay li ma Akis jobom ala: Vaydi nigi ti ɓuraŋ kayni hay gal marige ni, David hotom dit ala: Hay gal ma kayamna vi Yuda, hay gal ma kayamna vi sa Yerahmeella, hiɗi gal ma kayamna vi sa Keniyena. 11David may hin sa juf iriɗi lay, may hin ca iriɗi lay, kay nam min cosi tam Gatɗi; kay nam var ala, Gat ɗawn ma di ala David ka li slen ki kayn nala nala. Hay li ma nam ka musi hay nagata vi Gat kaf kayni, nam ka li slen ki kayni nala. 12Akis vi kuɗ dita vi David, nam ka di ala: David muɗ tuwamawa bisi kir sumuna valam sa Israyella, nam ma muɗ ɗawn dok-dok sa ma sunda vanu.

Currently Selected:

1 SAMUEL 27: Massana

Highlight

Copy

Compare