1 SAMUEL 24

David hay zul hiɗiyna vi En-Gedi. David min ci Sawulɗi

1Hay liy namnis pa David jik kulo hay liy ma jik lop ŋolla vi En-Gedi, nam mus ɗawni. 2Hay li ma Sawul digiɗ sa Filistin digiɗna, nisi co dum ala: David ka hay fulda vi En-Gedi. 3Sawul yaw sum sa wi duur birim ɦidi jar sa Israyella, nam kalay gar David ta-ta kulo kay hiɗiyta vi fok-ŋek ma fulla. 4Nam co hay guruna vi fok-dimina, ma ka goboy hiɗi hagata, hay liy namna zul hiɗiyn ka'a, nam kal haya kay bar selemu.#24:4 Bar selemu Tun sukamu lebo ok suɗoy klasige. Doli kayn David hiɗi sumuna valam ka gaa hay zul hiɗiy namna. 5Sumuna vi David dumu: Humaŋu, vaydi zawni mi buur ma Ma-Vatɗin di taŋ ala: Nan vul sa ma gaw kaŋŋa hay ɓaŋu; naŋ ma li talamu ki naŋ min nala. David fokay kulo hiɗi ŋali, nam ka vun sligara vi Sawul. 6Bugol kayni dikam tun caw ɓirimu, kay nam ka vun sligara vi Sawul. 7Bugolda nam di tam sumuna valamu: Mulla vanu ma Ma-Vatɗin ɦok mul kalamna, Ma-Vatɗin hinan a li va talamu kay tun ɓan talamɗi, kay namu mi ma Ma-Vatɗin ɦok mul kalamna. 8Hiɗi dit kayni David tel sumuna valamu, nam telsi kay ci Sawul goyo. Bugol kayni Sawul fokay kulo'o kay kal goy hay zul-hiɗiyna, nam kalay hay hagata valamu.

9Bugol kayni David fokay kulo'o, nam kalay goy hay zul-hiɗiyna pa. Nam tun caw siwel Sawul bugolom ala: Hey! Mulla, sam-ŋolla vanu! Sawul ɗuw bugolom na kayni, David girif gaa vokomu kay nagata. 10David di tam Sawul: Sum sa ka daŋ ala David ka gar kay laŋ joona naŋ humsi vunsi kayn kay mige? 11Wulini naŋ wi hiɗi iraŋawa ala Ma-Vatɗin vulaŋawa hay ɓan vaydi hay zul-hiɗiyna, nisi zutan kay caŋ goyo; may nan hulotaŋ goyo, nan disi ala: Nan as tun ɓan tam sa ŋolla vanɗi, kay namu mi ma mul ɦoki kalamna vi Ma-Vatɗina. 12Ɗuwaŋu bunu, vun-sligara vaŋ yaw hay ɓanni. Kay mige nan ka vun-sligara vaŋu may nan may caŋ goyɗi, naŋ ma wi ala nan giy kilani, va ma joo may hay dikanɗi, ŋel-vunda tay hay dikanɗi kaw, nan may li suluk kataŋɗi kaw. May naŋu, naŋ ka gan jawt vokanu kay can goyo. 13Ma-Vatɗin ma ka kitat jaraŋ hiɗi nanu, Ma-Vatɗin ma joban yan kataŋu; may nan hayɗin tun ɓan taŋɗi. 14Law ma nir-naramna ma ɓa-ɓana di ala: Joot may goy vi sa ma joon pa. Hiɗi kayn kaf nan as tun ɓan taŋɗi. 15Mulla vi Israyel min durum mi gige? Naŋ min garam mi gige? Diy ma miti su? Lebo ɗakɗari su?

16Ma-Vatɗin ma col kitata ta jaraŋ hiɗi nanta. Nam ma ɗuwa, ma gut kanu, nam ma ka kitata van hay liya'a, ma butan goy hay ɓaŋu.

17Hay li ma vun David vatna, Sawul di'e: Goora vanu David, kayni mi delaŋ naŋ gasiya su? Sawul tiy hiɗi delem kulo'o. 18Nam hot di tam David: Naŋ ɗiger suwan nanu; kay naŋ lan ŋaata. May nan laŋ joota. 19Vayd kayni ŋaata ta naŋ la' tanta naŋ ɗeka' goyo, kay Ma-Vatɗin vulan hay ɓaŋu, may naŋ may can goyɗi. 20La san ŋaf hiɗi sa ma gaw kalamna, nam as hinim tuɗ hay hagata valamu ki nam min nala su? Ma-Vatɗin ma wurakaŋu kay va ma naŋ lum tan vaydina. 21Wulin kayni humaŋu: Nan wi ala naŋ ma ti mulda, mulda vi Israyel ma hin ɗawn hay ɓaŋu. 22Naŋ ma yi va kaŋu vok Ma-Vatɗin ala jafna van ma bugolanna naŋ ma vatam goyɗi, semda vanu naŋ as vata' goy hay jafna vi bunɗi kaw. 23David yi va kalamu vok Sawul. Bugol kayni Sawul kalay hay ziyna valamu, David hiɗi sumuna valamu jik misi kulo kay hiɗiyna may.

Currently Selected:

1 SAMUEL 24: Massana

Highlight

Copy

Compare