1 SAMUEL 21

1David fokay kulo'o, nam kaliya, Yonatan kal kulo hay hoyok-ziyna may.

David pir hay Nob, hay Gat, hay zul-hiɗiyna vi Adullam, hay Mispe, hay juruta vi Heret

2David tun iram hay Nob, kat mul-ma-ɗifinna Akimelek, Akimelek kiram jaŋi ka dum ala: Naŋ ka tani vaŋ kepe, sa mara may hiɗi naŋɗi kay mige? 3David hot dit tam mul-ma-ɗifinna Akimelek ala: Mulla vulan gatta aya, nam dan ala, lawt ta nan gaŋ ka'ta hiɗi dita ta nan daŋgit ɗawni, hin sa huma'ɗi, nan col buur jaran hiɗi sumuna vanu. 4Wulin kayni, ka hay ɓaŋ mi mige? Naŋ ma vulan fun vasl lebo va mige kaw ma ka'a. 5Mul-ma-ɗifinna hot dit mi David, fun ma ɦawana may hay ɓanɗi, may mi fun ma lakay ɗifinna. La sumuna vaŋ tuwsi ka teli kay bur hiɗi boyna. 6David hot dit tam mul-ma-ɗifinna: Numa tel tuwma kay bur hiɗi boyn kayni, hay li ma nan kalay goyn pa, wulin kayn liy buur ɦidi, sumuna van kaf ka peldete; la kayni mi lop ma liwis kaw, vayd kayni van namna ma muɗum goy peldet gasiya. 7Nala mul-ma-ɗifinna vulum fun ma liy ɗifinna, kay hay na'ta ka kayni mi fun ma liy ɗifinna tuta, fun namna nisi yawamay goy vok Ma-Vatɗina kay vurna fu ma kun hay baŋalamu.#21:7 Yesu hot sli lawta kayni hay Mat 12:3-4; Mark 2:25; Luk 6:3. 8Hay buur na'ta kayni, san kep jar sa sunda vi Sawul, nam ka duki kalafi hay ziyna vi Ma-Vatɗina; namu mi sa ma Edomna, yum Doweg, mi ma ŋolla vi sa ŋom fok-dimina vi Sawul. 9David di tam Akimelek: Kawaya lebo kew-gaferaŋi kaw may hay ɓaŋɗi su? Kay nan sli may sli kew-gaferaŋ ay hay ɓanɗi lay, yaw sle-ma-duura van ay hay ɓanɗi lay, kay sunda vi mulla na' ir koliyo. 10Mul-ma-ɗifinna hot dit talam ala: Heɗe, Goliyat ma naŋ cum goyo hay liyn ma beɗna vi terebintena kew-gaferaŋa valam kayni, na' ka ɗuti hay sligara, goy bugol sligar-ŋoŋŋa, la naŋ min sla'a, slaŋga, kay kew mara may tanɗi. David di'e: Kew ma ŋray hiɗi na' kayni mayɗi, naŋ vulantiya.

11David fokay kulo'o, nam pir hay buur na'ta goy gine hiɗi Sawul. Nam co goy vi Akis, mulla vi Gat.

12Sa sunda vi Akis dumu: Naŋ damni mi David mulla vi nagata ɗisu? Ma sumun ka gi nul hiɗi seŋ ala:

Sawul ci sumun birim ɗaw

David ci sumun birim doogo naɗi su?

13David var kay lawt kayni, nala nam li nar ŋolo. Kay Akis, mul ma Gatna. 14Nam tun caw li tuwam kirsi ki sa ma ɦoyayn nala, tun caw tuwura; nam ɗo slen kulo tam vun-ziyna, hin nene ma vunamna jaŋ goy gaa kuɗ dumamu. 15Akis di tam sa sunda valamu: Nigi wi ŋaa'a ala san kayni yalla valam baya, nigi maram tanu kay mige? 16Sum sa hoyayna kiɗan tan su? Nigi maran hen kayni lo kay nan ma wi tuwurta valamu kay mige? Nigi min ala nam ma kal vo hay ziyna vanu su?

Currently Selected:

1 SAMUEL 21: Massana

Highlight

Copy

Compare