Filemón 1
1
Cartapa qallariyninmanta
1Kuyasqay llamkaqmasiyku Filemón, Cristo Jesusrayku preso kaq ñoqa Pablom iñiqmasinchik Timoteopiwan rimaykamuykiku. 2#Col 4.17.Rimaykamunikutaqmi kuyasqanchik paninchik Apiatapas hinaspa peleaqmasinchik Arquipotapas chaynataq wasikipi huñunakuq llapallan iñiqkunatapas. 3Dios Taytanchikwan Señorninchik Jesucristoyá kuyakuynintawan hawkayayninta qamkunaman qosunkichik.
Filemonpa kuyakuyninmantawan iñiyninmanta
4Qanmanta tukuy tiempo yuyarispaymi Diosniyta mañakuspay graciasta qoni. 5Qanmantam uyarini Señorninchik Jesucristo kuyasqaykita hinaspa paypi hapipakusqaykita, chaynallataq iñiqmasinchikkuna kuyasqaykitapas. 6Diostam mañakuchkani iñiqmasiyku kaspayki kuyasqayki Cristorayku tukuy allinkuna ruway atisqanchikta yachanaykipaq, 7kuyakuyniyuq kasqaykiwanmi llumpay kusisqa hinaspa kallpanchasqa kachkani. Wawqelláy, qanmi iñiqmasinchikkunapa sonqonta kusikuywan kallpanchaykurqanki.
Onesimopaq Pablo mañakusqanmanta
8Cristopa apostolnin kasqayraykuqa kanmi derechoy imam ruwanayki kamachinaypaq, 9ichaqa kuyakuywanmi ruegakamuyki. Ñoqa Pablom machuña kani kunanñataqmi Jesucristorayku preso kaspay 10#Col 4.9.ruegakamuyki churiy Onesimopaq, payqa carcelpi kaspa iñichisqaymi.
11Ñawpaqtaqa mana imapaq servisuqniki esclavom karqa, kunanmi ichaqa qampaqpas ñoqapaqpas servikuqña. 12Chaynaqa, kunanmi kutichimuyki, ñoqata chaskiwachkaq hinayá chaskiykuy. 13Munaymanmi ñoqawanña kananta chaynapi Cristomanta allin noticiata willakusqayrayku preso kasqaypi qampa rantikipi yanapawananta. 14Ichaqa manam imatapas ruwaymanchu mana simikiwanqa, chaynapi allin ruwasqaykiqa mana obligasqa kaspa sonqoykimanta kananpaq. 15Ichapas Onesimoqa chaypaq qanmanta karunchakururqa, chaynaqa chaskiykuyá wiñaypaqña qanwan kananpaq, 16amaña esclavota hinañachu aswanqa kuyasqayki wawqekita hinaña. Ñoqapas wawqeyta hinam kuyani chaynaqa qamqa astawanraqchá kuyanki, manam runamasinchik kasqanraykullachu aswanqa Señorninchikpi iñiqmasinchik kasqanraykum.
17Sichum iñiqmasikipaq hapiwaspaykiqa paytapas ñoqata hinayá chaskiykuy. 18Icha imapipas piñachisurqanki otaq manukusurqankipas hinaptinqa ñoqapa cuentaymanyá churaykuy. 19Ñoqa Pablom makiywanpuni qellqamuchkayki: “Ñoqam pagapusqayki”, nispa. Allilla rimaypiqa tukuy imayuq kasqaykimantawan pim kasqaykimantaqa qampas debewankim. 20Chaynaqa, wawqelláy, Señorninchikman iñiqmasiy kasqaykiraykuyá kay valekusqayta arí niykullaway. Cristopi wawqey kasqaykiraykuyá sonqoyta tiyaykachiy.
21Qellqamuchkaykiqa kasukunaykita hinaspa kay nimusqaykunamantapas aswanraq ruwanaykita yachaspaymi. 22Chaynaqa, hamuspay samaykunaypaqyá wasikita allichaykapuwachkay, Dios mañakusqaykichikman hinam huktawan qamkunaman watukuq hamuyta munachkani.
Cartapa tukuyninmanta
23 #
Col 1.7; 4.12. Cristorayku presomasiy Epafrasmi rimaykamusunki, 24#Hch 12.12, 25; 13.13; 15.37-39; Col 4.10.#Hch 19.29; 27.2; Col 4.10.#Col 4.14; 2 Ti 4.10.#Col 4.14; 2 Ti 4.11.rimaykamusunkitaqmi llamkaqmasiy Marcospas, Aristarcopas, Demaspas hinaspa Lucaspas.
25Señorninchik Jesucristoyá kuyakuyninta qamkunaman chaqchurimuchun. Amén.
Currently Selected:
Filemón 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012