Juan 7
7
Jesuspa wawqenkuna mana creesqanmanta
1Chaykunapa qepantam Jesús purirqa tukuy Galilea lawkunapi. Judea lawkunapim ichaqa mana purirqachu, llapa judiokuna wañurachiyta munasqankurayku. 2#Lv 23.34; Dt 16.13.Ichaqa judiokunapa Ramada fiestanku hichpamuptinmi, 3wawqenkuna nirqaku:
Kaymanta lloqsispa Judea lawkunaman riy, chaynapi imam ruwasqaykikunata qawanankupaq. 4Reqsichikuyta munaspaqa, manam pipas pakasqallapiqa imatapas ruwanchu. Kaykunata ruwachkaspaykiqa lliw runakunawanyá reqsichikamuy, nispanku.
5Chaynataqa nirqaku Jesuspi mana creesqankuraykum. 6Chaymi Jesusñataq nirqa:
Manaraqmi tiempoy chayamunraqchu, qamkunapaqmi ichaqa ima tiempopas allin. 7Qamkunataqa runakunapas manam cheqnisunkichikchu, ñoqatam ichaqa cheqniwanku tukuy mana allinkuna ruwasqankuta qawachisqayrayku. 8Qamkunallayá fiestamanqa riychik, ñoqaqa manam risaqchu, manaraqmi tiempoy chayamunraqchu, nispa.
9Chaynata nispanmi hina Galilea lawllapi qeparurqa.
Ramada fiestaman risqanmanta
10Wawqenkuna pasaptinkum Jesuspas fiestaman rirqa mana piwanpas rikuchikuspalla. 11Judiokunañataqmi fiestapi maskaspanku ninakurqaku:
¿Maypitaq chay runaqa kachkan? nispanku.
12Anchatam Jesusmanta runakuna rimarqaku. Wakiqninmi nirqaku:
Allin runam payqa, nispanku.
Wakinñataqmi nirqaku:
Manam payqa allinchu, runakunatam engañan, nispanku.
13Ichaqa manam pipas libretaqa rimarqachu judiokunata manchakusqankurayku.
14Chawpi fiesta kachkaptinñam temploman Jesús yaykuspan yachachiyta qallaykurqa. 15Chaymi judiokuna admirakuspa nirqaku:
¿Imaynataq kay runaqa tukuy imata yachan mana estudiachkaspaqa? nispanku.
16Hinaptinmi Jesusñataq nirqa:
Kay yachachisqayqa manam ñoqapachu aswanqa kachamuwaqniypam. 17Pipas Diospa munasqanta ruway munaqqa yachanqam kay yachachisqayqa Diosmanta kasqanta otaq kikillaymanta rimasqaytapas. 18Pipas kikillanmanta rimaqqa kikin alabasqa kayllatam maskan, pipas kachamuqnin alabasqa kananta maskaqmi ichaqa cheqapta riman, paypiqa manam pantayqa kanchu.
19¿Manachum leytaqa Moisés qosurqankichik? Chaytaqa manam mayqannikichikpas cumplinkichikchu. Chaynaqa, ¿imanasqataq wañuchiwaypi richkankichik? nispa.
20Chaymi runakunañataq nirqaku:
Qamqa demonioyuqmi kanki. ¿Pitaq wañuchiyta munasuchkanki? nispanku.
21Jesusñataqmi nirqa:
Huk milagrotam ruwarqani, chaywanmi admirasqallaña karqankichik. 22#Lv 12.3.#Gn 17.10.Moisesmi kamachikuyta qosurqankichik qari-kaynikichikta señalachikunaykichikpaq. Kaykunaqa karqa ñawpaq taytaykichikmantaraqmi, manam Moisesllamantachu, chaymi samana punchaw kachkaptinpas runata señalankichik. 23#Jn 5.9.Moisespa kamachikuyninta cumplinaykichikrayku samana punchawpipas runata señalaspaykichikchu ¿ñoqapaqñataq huk onqoqta samana punchawpi sanoyarachisqanmanta piñakunkichik? 24Amayá qawasqaykichikman hinallachu juzgaychikqa, aswanqa ama pimanpas sayapakuspayá allin arreglota ruwaychik, nispa.
Jesuspa maymantam hamusqanmanta
25Jerusalenpi yachaqkunamantam wakiqnin nirqaku:
¿Manachum payqa wañuchinankupaq maskasqanku runa? 26Waqaya kunanqa lliwpa qawasqantaña rimachkan, maytaq pipas imatapas ninñachu. Kamachikuqkunapas Cristo kasqantachá yacharunkuña. 27Ñoqanchikmi ichaqa yachanchik maylaw runam kasqantapas, Cristo hamuptinmi ichaqa maymantam kasqantapas mana yachasunchu, nispanku.
28Chayraykum Jesusqa templopi yachachichkaspan qaparispan nirqa:
Ñoqataqa reqsiwankichikmi, maylawmantam kasqaytapas yachankichikmi, ñoqaqa manam kikillaymantachu hamurqani, mana reqsisqaykichik kachamuwaqniymi ichaqa cheqap. 29Ñoqam ichaqa paymanta hamusqayrayku reqsini. Paymi ñoqataqa kachamuwarqa.
30Chaynakunata niptinmi presocharuyta munarqaku, ichaqa manaraq tiempon chayamusqanraykum mana presocharurqakuchu. 31Chaywanpas achka runakunam paypi iñirqaku, hinaspam nirqaku:
¿Yaqachu Cristo hamuspan paymanta aswan milagrokunataraq ruwanman? nispanku.
Jesusta presochay munasqankumanta
32Llapa fariseokunam Jesusmanta runakunapa rimasqanta yacharuspanku sacerdotekunapa kamachiqninkunapiwan tanteanakuruspanku guardiakunata kacharqaku Jesusta presochamunankupaq. 33Jesusñataqmi nirqa:
Pisi tiempollañam qamkunawan kasaq, ñam kutikusaqña kachamuwaqniyman. 34Maskawaspapas manam tariwankichikchu, ñoqapa kasqaymanqa manam chayayta atiwaqchikchu, nispa.
35Hinaptinmi judiokuna kikinkupura tapunakurqaku:
Mana tariy atinapaqqa ¿maymantaq kay runaqa rinqa? ¿Icha griegokunapa kasqanpi cheqesqa judiokunamanchu rinqa griegokunata yachachimunanpaq? 36¿Ima ninantataq niwachkanchik: “Maskawaspapas manam tariwankichikchu, ñoqapa kasqaymanqa manam chayayta atiwaqchikchu”, nispaqa?
Kawsachikuq yakumanta
37 #
Lv 23.36. Fiestapa tukupaynin punchawqa hatun punchawmi karqa. Chaypim Jesús sayaykuspan kaynata qaparirqa:
Pipas yakunayachikuqqa ñoqaman hamuspa tomachun. 38#Ez 47.1; Zac 14.8.Pipas ñoqapi iñiqmantaqa Qellqapa nisqanpi hinam ukunmanta kawsay qokuq mayu kallpanqa, nispa.
39Chaywanqa nichkarqa haykam paypi iñiqkuna Chuya Espirituta chaskinanmantam. Chuya Espirituqa manaraqmi hamurqaraqchu, hanaq pachaman Jesús manaraq kutisqanrayku.
Jesusqa rakinakuyta apamusqankumanta
40Runakunamantam Jesuspa rimasqanta uyarispanku wakiqnin nirqaku:
Cheqaptapunim kay runaqa suyasqanchik profeta, nispanku.
41Wakiqninñataqmi nirqaku:
Payqa Cristom, nispanku.
Wakinñataqmi nirqaku:
¿Imaynataqsi Galileamanta Cristo hamunman? 42#Miq 5.2.¿Manachum Qellqaqa nichkan: “Davidpa mirayninmantam Cristoqa hamunqa, hinaspam Belén llaqtapi nacenqa”, nispan?
43Chaynakunata nispankum Jesuspa causanpi llapa runakuna rakinakururqaku. 44Wakiqninmi Jesusta presochayta munarqaku, ichaqa manam pipas almitirqachu.
Kamachikuqkunapa mana creesqanmanta
45Guardiakunam sacerdotekunapa kamachiqninkunapa chaynataq fariseokunapa kasqanman kutirurqaku, hinaptinmi paykunata tapurqaku:
¿Imanasqataq mana pusamurqankichikchu? nispanku.
46Chaymi guardiakunañataq nirqaku:
Manam pipas pay hinaqa rimarqachu, nispanku.
47Fariseokunañataqmi nirqaku:
¿Qamkunapas engañarachikunkichikñachu? 48¿Yaqachu fariseokunamanta hinaspa kamachikuqkunamanta mayqanninkupas chay runapi iñirqaku? 49Kay runakunaqa Diospa leyninta mana yachasqankuraykum ñakasqa kachkanku, nispanku.
50 #
Jn 3.1-2. Fariseokunamanta kaq Nicodemom Jesuswan rimaq tutallan rirqa. Chay Nicodemom paykunata nirqa:
51Leyninchikman hinaqa manam pitapas cargochachwanchu, puntata imam nisqanta manaraq uyarichkaspaqa nitaq imam ruwasqanta manaraq yachachkaspaqa, nispa.
52Chaymi paykunañataq nirqaku:
¿Qampas Galilea llaqtayuqchu kanki? Qellqata qatipaspayá yachay, Galilea lawmantaqa manam ima profetapas hatarirqachu, nispanku.
53Chaymantam sapakama wasinkuman ripukurqaku.
Currently Selected:
Juan 7: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012