Juan 20
20
Jesuspa kawsarimusqanmanta
(Mt 28.1-10. Mr 16.1-8. Lc 24.1-12)
1Domingo punchawtam tuta-tuta manaraq runa reqsiy horata sepulturaman rirqa Magdala llaqtayuq María, paymi rikururqa sepultura tapasqanku rumiqa suchurachisqaña kasqanta. 2Chaymi kallparqa Simón Pedropa kasqanman hinaspa Jesuspa kuyasqan discipulonpa kasqanman, paykunatam nirqa:
Señortam sepulturanmanta aparusqaku, manam yachanikuchu mayman churasqankutapas, nispa.
3Pedrowan huknin discipulom sepultura qawaq rirqaku. 4Iskayninkum rirqaku kallpaylla, hukninmi Pedromantapas apurawman kallpaspan puntata sepulturaman chayarurqa. 5Kurkuykuspa qawaykuptinmi sabanaskunallaña kachkasqa, ichaqa manam yaykurqachu. 6Simón Pedroñataqmi qepataña chayaramuspan sepulturaman yaykururqa, paypas rikuykurqam sabanaskuna churarayaqta. 7Rikurqataqmi Jesuspa umanman watasqanku telatapas, chaymi sabanaskunapa waklawninpi patarasqa kachkasqa. 8Sepulturaman punta chayaq discipulopas yaykururqam, chaymi tukuy chaykunata qawaykuspan cheqapaq kasqanpaq hapirqa. 9Paykunaqa manaraqmi entienderqakuchu Jesuspa kawsarimunanmanta Qellqapa nisqantaqa. 10Chaymantam discipulokunaqa wasinkuman kutikurqaku.
Magdala llaqtayuq Mariaman Jesuspa rikuriykusqanmanta
(Mr 16.9-11)
11Mariañataqmi waqastin qeparurqa sepulturapa waqtanpi. Waqaspanmi kurkuykuspa qawaykurqa sepulturapa ukunta. 12Chaynapim rikurqaku yuraq pachayuq iskay angelkunata. Paykunam tiyachkasqaku Jesuspa cuerpon churasqankupi, hukninmi kachkasqa sawnan lawpi hukninñataqmi haytan lawpi.
13Mariatam tapurqaku:
Warmi ¿imanasqataq waqachkanki? nispanku.
Payñataqmi nirqa:
Señorniytam aparusqaku chaymi mana yachanichu mayman churasqankutapas, nispa.
14Chaynata nispanmi muyuriykuspan rikururqa Jesusta chaypi sayachkaqta. Mariaqa manam yacharqachu Jesús kasqanta.
15Jesusmi tapurqa:
Warmi ¿imanasqataq waqachkanki? ¿Pitataq maskachkanki? nispan.
Mariañataqmi piensarqa huerta nanachikuq kasqanta, chaymi nirqa:
Señor, qam aparuspaykiqa willaykuwayá maypim churaramusqaykitapas chaynapi rispay apakunaypaq, nispa.
16Jesusñataqmi nirqa:
¡María! nispa.
Payñataqmi muyuriykuspan hebreo rimaypi nirqa:
¡Raboni! nispa. Chayqa “yachachikuq” ninanmi.
17Jesusmi nirqa:
Amaraq hapiwaychu, manaraqmi Taytaymanqa riniraqchu. Willamuyá wawqeykunaman, richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman.
18Chaymi Magdala llaqtayuq Mariañataq, Señorta rikusqanmanta discipulonkunaman willamurqa, willamurqataqmi kikin Señorpa imakunam kunasqantapas.
Discipulonkunaman Jesuspa rikuriykusqanmanta
(Mt 28.16-20. Mr 16.14-18. Lc 24.36-49)
19Hina chay punchawllam, domingo tutaykuyta, discipulonkuna huñunakuruspanku punkuta wichqakururqaku, chaynataqa ruwarqaku judiokunata manchakusqankuraykum. Jesusmi yaykuruspa discipulonkunapa chawpinpi sayaykuspa nirqa:
¡Hawkayay qamkunawan kachun! nispa.
20Chaynata niykuspanmi makinkunatawan waqtanta qawachikurqa, paykunañataqmi Señorta qawaykuspanku kusikurqaku. 21Huktawanmi Jesús nirqa:
¡Hawkayay qamkunawan kachun! Imaynam Taytay kachamuwarqa, chaynam qamkunatapas kachaykichik, nispa.
22Chaynata niykuspanmi paykunaman pukuykuspan nirqa:
Chuya Espirituta chaskiychik, nispan. 23#Mt 16.19; 18.18.Huchakuna pampachasqaykichikqa pampachasqam kanqa, mana pampachasqaykichikqa manataqmi pampachasqachu kanqa, nispa.
Tomasman Jesuspa rikuriykusqanmanta
24Mellizowan sutichasqa Tomasmi chunka iskayniyuqmanta huknin karqa. Jesús paykunaman rikuriykuptinqa payqa manam chaypichu karqa. 25Wakin discipulokunam willarqaku:
Señortam rikuramuniku, nispanku.
Tomasñataqmi nirqa:
Sichum mana rikusaqchu makinpi clavospa yaykusqanta chaynataq clavospa yaykusqanman dedoyta mana hinasaqchu chaynataq makiywan mana waqtan tuksisqa kasqanta llapchasaqchu, hinaspayqa manam creesaqchu, nispa.
26Pusaq punchawmantam discipulonkuna musoqmanta huk wasipi huñunakurqaku, Tomaspas paykunawanmi kachkarqa. Punku wichqarayachkaptinmi Jesusqa paykunapa chawpinkupi rikuriykuspan nirqa:
¡Hawkayay qamkunawan kachun! nispa.
27Hinaspam Tomasta nirqa:
Dedoykita kayman hinay hinaspa makiyta qaway chaynataq waqtaymanpas makikita hinay. Amayá mana iñiyniyuqqa kaychu aswanqa iñiyniyuqyá kay, nispa.
28Tomasñataqmi nirqa:
¡Señorlláy, Diosnilláy! nispa.
29Jesusmi nirqa:
Tomás ¿rikuykuwaspaykiñachu creerunki? ¡Mayna kusisqam kanqa mana rikuwachkaspan creeqkunaqa!
Kay libroqa imapaqmi qellqasqa kasqanmanta
30Jesusqa achkaq milagrokunataraqmi ruwarqa discipulonkunapa qawasqanta. Kay libropiqa chaykunaqa manam qellqasqachu kachkan. 31Kaykunaqa qellqasqa karqa Jesusqa Diospa Churin Cristo kasqanta creenaykichikpaqmi, creespaykichikñataq payrayku wiñay kawsayniyuq kanaykichikpaq, nispa.
Currently Selected:
Juan 20: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012