Juan 13
13
Discipulonkunapa chakinta Jesús mayllasqanmanta
1Pascua fiestapa ñawpaqnintaraqmi Jesusqa yacharqaña kay pachamanta Taytanpa kasqanman kutinanta. Kay pachapi paypa kaqkunatam kuyarqa, tukupaykamam kuyarqa.
2Jesusmi discipulonkunawan cenachkarqa, diabloqa Simonpa churin Judas Iscariotetam umacharurqaña Jesusta traicionananpaq. 3Jesusqa yacharqam tukuy imatapas Taytan payman qoykusqanta, yacharqataqmi paymanta hamuspa payman kasqallan kutinantapas. 4Jesusmi cenasqanmanta hatariykuspan capanta hurqokuykurqa, hinaspam toallata weqawninman watakuykurqa. 5Lavatorioman yakuta talliykuspanñataqmi discipulonkunapa chakinta mayllaspan weqawninpi toallawan chakichirqa. 6Simón Pedrota mayllananpaq kaptinmi payñataq nirqa:
Señorlláy ¿qamraqchu ñoqapa chakiyta mayllawankiman? nispa.
7Jesusñataqmi nirqa:
Kunanqa manaraqmi entiendenkichu kay ruwasqaykunataqa, qepatañam chaytaqa entiendenki, nispa.
8Chaymi Pedroñataq nirqa:
Chakiytaqa manapunim haykapipas mayllawaqchu, nispa.
Jesusñataqmi nirqa:
Mana mayllaptiyqa manam discipuloyqa kawaqchu, nispa.
9Chaymi Simón Pedroñataq nirqa:
Amayá chakillaytañachu mayllawayqa, aswanqa umaytawan chakiytawanyá, nispa.
10Jesusñataqmi nirqa:
Pipas bañasqañaqa manam necesitanñachu mayllanataqa, aswanqa chakillantañam, qamkunaqa limpioñam kachkankichik, ichaqa manam llapaykichikchu.
11Jesusqa yacharqañam pim traicionananta chaymi nirqa: “Manam llapaykichikchu kankichik limpioqa”, nispa.
12Discipulonkunapa chakinta mayllaruspanmi capanta churakuykuspa kasqallan tiyaykurqa mesaman, hinaspam nirqa:
¿Qamkunawan kay ruwasqayta entiendenkichikchu? 13Qamkunam sutichawankichik: “Yachachikuq hinaspa Señor”, nispa, chaytaqa allintam ninkichik, arí chaynam kani. 14Ñoqa Señornikichik hinaspa yachachiqnikichik kachkaspaymi chakikichikta mayllaruykichik, qamkunapas chaynayá chakikichikta mayllanakuychik. 15#Lc 22.27.Ejemplotam qamkunaman qoykichik qamkunawan ruwasqayta hina qamkunapas ruwanaykichikpaq. 16#Mt 10.24; Lc 6.40; Jn 15.20.Cheqaptapunim nikichik, sirvienteqa manam maschu patronninmantaqa, nitaqmi willakuq riqpas maschu kachaqninmantaqa. 17Kaykunata entienderuspa ruwaspaykichikqa kusisqam kankichik.
18 #
Sal 41.9. Manam llapallaykichikmantachu ñoqaqa rimachkani, reqsinim pikunam akllasqaytaqa. Qellqapa nisqanpi hina: “Mikuqmasiypas contraypim hatarirun” nisqanmi cumplikunan. 19Manaraq imapas pasakuchkaptinmi kunan nichkaykichik, ña pasakuruptinmi ichaqa creenkichik rimapayasuqnikichikqa pim kasqayta. 20#Mt 10.40; Mr 9.37; Lc 9.48; 10.16.Cheqaptapunim nikichik, ñoqapa kachasqayta pipas chaskiqqa ñoqatapunim chaskiwan, ñoqa chaskiwaqniyñataqmi kachamuwaqniy Taytayta chaskin.
Judas traicionananmanta Jesuspa willakusqanmanta
(Mt 26.20-25. Mr 14.17-21. Lc 22.21-23)
21Kaykunata nispanmi Jesusqa hukmanyarurqa hinaspam nirqa:
Cheqaptapunim qamkunamanta huknikichik traicionawanqa, nispa.
22Discipulonkunañataqmi qawanakurqaku:
Mayqanninchikmantaraq nichkan, nispanku.
23Huknin discipulonmi karqa Jesuspa llumpay kuyasqan, paymi waqtanpi kachkarqa. 24Paytam Simón Pedro señascharqa pimantas Jesús chayna nisqan tapunanpaq.
25Jesuspa waqtanpi kaqñataqmi Jesús lawman aswanraq waqtapaykuspa tapurqa:
Señorlláy ¿pitaq chay traicionasuqnikiqa? nispa.
26Chaymi Jesusñataq nirqa:
Chay runaqa tantata mikuyman challpuykuspa qosqaymi, nispa.
Tantata challpuykuspanmi qoykurqa Simonpa churin Judas Iscarioteman. 27Chayta mikuykuptillanmi Judasman Satanás yaykururqa. Chaymi Jesús nirqa:
Chay ruwanaykita utqayman ruway, nispa.
28Mesapi mikuqkunaqa manam mayqanninpas entienderqakuchu Judasman nisqantaqa. 29Qollqeta Judas waqaychasqanraykum wakiqnin piensarqaku Jesusqa: “Rantipakaramuy fiestapaq imapas munasqanchikta otaq imallatapas wakchakunaman qomuy”, nispa nisqanta. 30Tantata mikuruspa Judas lloqsiptinqa tutañam karqa.
Musoq kamachikuymanta
31Judas lloqsiramuptinmi Jesús nirqa:
Kunanmi hatunchasqa kanqa runapa Churinqa, paypitaqmi Diospa hatunchakuyninpas qawachikunqa. 32Sichum Dios hatunchakun paypi, hinaspaqa hatunchanqataqmi kikinpipas, payqa chayllam hatunchaykunqa. 33#Jn 7.34.Churillaykuna, manam unayñachu qamkunawanqa kasaq, chaymi maskawankichik. Imaynam judiokunaman nisqayta hinallam qamkunatapas nikichik: Ñoqapa risqaytaqa qamkunaqa manam riyta atiwaqchikchu, nispa. 34#Jn 15.12, 17; 1 Jn 3.23; 2 Jn 5.Musoq kamachikuytam qoykichik, huknikichikmanta huknikichikkama kuyanakuychik. Imaynam ñoqa kuyaykichik chaynatayá qamkunapas huknikichikmanta huknikichikkama kuyanakuychik. 35Sichum qamkunapura kuyanakuptikichikqa llapallan runakunam discipuloykuna kasqaykichikta yachanqaku.
Jesusmi willakun Pedropa negananmanta
(Mt 26.31-35. Mr 14.27-31. Lc 22.31-34)
36Simón Pedrom nirqa:
Señorlláy ¿maytataq rinkiqa? nispa.
Jesusñataqmi nirqa:
Ñoqapa risqaytaqa manam kunanqa qatiwankimanchu, ichaqa qepatañam qatiwankiqa, nispa.
37Chaymi Pedroñataq nirqa:
Señorlláy ¿imanasqataq kunanqa mana qatikimanchu? Vidaytapas qamraykuqa qosaqmi, nispa.
38Jesusñataqmi nirqa:
¿Vidaykitachu ñoqapaq qonki? Cheqaptapunim niki, manaraqpas utulu waqachkaptinmi kimsa kutikama negawanki, nispa.
Currently Selected:
Juan 13: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012